ടി20 ലോകകപ്പിൻറെ രണ്ടാം സെമിയിൽ ഇംഗ്ലണ്ടിന് മുന്നിൽ ഒന്നു പതറിയെങ്കിലും വീഴാതെ ഇന്ത്യ ഫൈനലിൽ പ്രവേശിച്ചു.. ഇന്ത്യ ഉയർത്തിയ 254 റൺസിൻറെ കൂറ്റൻ വിജയലക്ഷ്യം പിന്തുടർന്ന ഇംഗ്ലണ്ട് ജേക്കബ് ബെഥേലിൻറെ വെടിക്കെട്ട് സെഞ്ചുറി കരുത്തിൽ ലക്ഷ്യത്തിന് അടുത്തെത്തിയെങ്കിലും 7 റൺസകലെ പൊരുതി വീണു.

നാലാമനായി ഇറങ്ങി 48 പന്തിൽ 105 റൺസടിച്ച ജേക്കബ് ബെഥേലാണ് ഇംഗ്ലണ്ടിൻറെ ടോപ് സ്കോറർ. പതിനെട്ടാം ഓവർ എറിഞ്ഞ ജസ്പ്രീത് ബുമ്ര ആറ് റൺസ് മാത്രമാണ് വഴങ്ങിയത്. പത്തൊമ്പതാം ഓവർ എറിഞ്ഞ ഹാർദ്ദിക് പാണ്ഡ്യ ഒമ്പത് റൺസ് വഴങ്ങി സാം കറൻറെ വിക്കറ്റെടുത്തപ്പോൾ ഇംഗ്ലണ്ടിൻറെ വിജയലക്ഷ്യം അവസാന ഓവറിൽ 30 റൺസായി.

ശിവം ദുബെ എറിഞ്ഞ അവസാന ഓവറിൽ ആദ്യ പന്തിൽ തന്നെ രണ്ടാം റണ്ണോടിയ ജേക്കബ് ബെഥേലിനെ ഹാർദ്ദിക് പാണ്ഡ്യയുടെ ത്രോയിൽ സഞ്ജു സാംസൺ റണ്ണൗട്ടാക്കിയതോടെ ഇംഗ്ലണ്ടിൻറെ പ്രതീക്ഷയ്ക്ക് മങ്ങലേറ്റു. അടുത്ത രണ്ട് പന്തുകളിൽ ഓരോ റണ്ണെടുക്കാനെ ആർച്ചർക്കും ഓവർടണും സാധിച്ചുള്ളൂ. നാലാം പന്തിൽ വൈഡ് വഴങ്ങിയ ദുബെ അവസാന മൂന്ന് പന്തിലും സിക്സ് വഴങ്ങിയെങ്കിലും ഏഴ് റൺസകലെ ഇംഗ്ലണ്ട് വീണു. ഞായറാഴ്ച
അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടക്കുന്ന ഫൈനലിൽ ന്യൂസിലൻഡാണ് ഇന്ത്യയുടെ എതിരാളികൾ.