സംസ്ഥാനത്ത് പ്രായപൂർത്തിയാകാത്തവർ ഉണ്ടാക്കുന്ന വാഹനാപകടങ്ങളിൽ ചോരപ്പുഴ ഒഴുകുമ്പോഴും, ഇനിയും പാഠം പഠിക്കാതെ റോഡുകളിൽ അപകടക്കളി തുടർന്ന് മലയാളി. തിരുവനന്തപുരം കഴക്കൂട്ടം എയർപോർട്ട് റോഡിലെ അനന്തപുരി ഫ്ലൈഓവറിലാണ് മാതാപിതാക്കളുടെ കൂസലില്ലാത്ത ക്രൂരവിനോദം അരങ്ങേറിയത്. ഡ്രൈവിംഗ് സീറ്റിൽ അച്ഛന്റെ മടിയിലിരുന്ന്, മണിക്കൂറിൽ 80 മുതൽ 100 കിലോമീറ്റർ വരെ വേഗതയിൽ പായുന്ന കാറിന്റെ സ്റ്റിയറിംഗ് പൂർണ്ണമായും നിയന്ത്രിക്കുന്നത് വെറും മൂന്നോ നാലോ വയസ്സ് മാത്രം പ്രായമുള്ള ഒരു പിഞ്ചുകുഞ്ഞാണ്!

സമീപത്ത് കൂടെ പോയ കൊല്ലം ഇളമ്പൽ സ്വദേശികളായ യാത്രക്കാർ ഹോൺ അടിച്ച് മുന്നറിയിപ്പ് നൽകിയിട്ടും അത് വകവെക്കാതെ, വീഡിയോ എടുക്കുന്നത് കണ്ടതോടെ വാഹനം വീണ്ടും വേഗത്തിൽ ഓടിച്ചുപോകുകയാണ് മാതാപിതാക്കൾ ചെയ്തത്. ദൃശ്യങ്ങൾ പുറത്തുവന്നതോടെ സംഭവത്തിൽ മോട്ടോർ വാഹന വകുപ്പും പൊലീസും അടിയന്തര അന്വേഷണം ആരംഭിച്ചിട്ടുണ്ട്.