സൗദി അറേബ്യയിൽ കഴിഞ്ഞിരുന്ന തിരുവനന്തപുരം സ്വദേശി ഹൃദയാഘാതം മൂലം മരിച്ചു. പതിനഞ്ച് വർഷമായി നാട്ടിൽ പോകാൻ കഴിയാതെ സൗദിയിലായിരുന്നു. കിളിമാനൂർ വിളക്കാട്ട്ക്കോണം പുണർതത്തിൽ അജയകുമാർ (56) ആണ് റിയാദിന് സമീപം ദവാദ്മിയിൽ നിര്യാതനായത്. കഴിഞ്ഞ വ്യാഴാഴ്ചയായിരുന്നു സംഭവം.

കഴിഞ്ഞ 36 വർഷമായി പെയിന്റിങ് തൊഴിലാളിയായി ജോലി ചെയ്തുവരികയായിരുന്ന അജയകുമാറിന്, താമസരേഖയായ ഇഖാമ 'ഹുറൂബ്' ആയതിനാലും മറ്റ് നിയമതടസ്സങ്ങൾ നിലനിന്നിരുന്നതിനാലുമാണ് ഇത്രയും കാലം നാട്ടിൽ പോകാൻ കഴിയാതിരുന്നത്.

താമസസ്ഥലത്ത് അബോധാവസ്ഥയിൽ കണ്ടെത്തിയ അജയകുമാറിനെ ഒരു സൗദി പൗരൻ വിവരമറിയിച്ചതിനെ തുടർന്ന് ആംബുലൻസ് അധികൃതരും പോലീസും ചേർന്ന് ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.

തുടർന്ന് പോലീസ് ഉദ്യോഗസ്ഥൻ കേളി ദവാദ്മി ഏരിയ ജീവകാരുണ്യ വിഭാഗം കൺവീനറെ വിവരമറിയിക്കുകയും, കേളി നേതൃത്വം നടത്തിയ അന്വേഷണത്തിൽ മരണപ്പെട്ടത് കിളിമാനൂർ സ്വദേശി അജയകുമാറാണെന്ന് സ്ഥിരീകരിക്കുകയുമായിരുന്നു. പ്രത്യേക സാഹചര്യം പരിഗണിച്ച്, നിലവിൽ ദവാദ്മി ജനറൽ ആശുപത്രി മോർച്ചറിയിൽ സൂക്ഷിച്ചിരിക്കുന്ന മൃതദേഹം ദവാദ്മിയിലെ പൊതുശ്മശാനത്തിൽ സംസ്കരിക്കും.