ദക്ഷിണ റെയിൽവേയിലെ ആദ്യ വിസ്റ്റാഡോം കോച്ചുകൾ കേരളത്തിലേക്ക്. കൊല്ലം - പുനലൂർ - ചെങ്കോട്ട പാത വഴി സർവീസ് നടത്തുന്ന മധുര - ഗുരുവായൂർ എക്സ്പ്രസിലാണ് (Train No. 16327/16328) ഈ പ്രത്യേക കോച്ച് അനുവദിച്ചിട്ടുള്ളത്. കേരളത്തിലൂടെ ഓടുന്ന ഒരു ട്രെയിനിൽ ആദ്യമായാണ് വിസ്റ്റാഡോം സൗകര്യം ലഭ്യമാകുന്നത്. ഈ മാസം 22 മുതൽ സർവീസ് ആരംഭിക്കുന്നതാണ്.

ചെങ്കുത്തായ മലനിരകൾ, തുരങ്കങ്ങൾ, പച്ചപ്പു നിറഞ്ഞ കുന്നിൻചരിവുകൾ, പുഴയോരങ്ങൾ എന്നിവയിലൂടെ കടന്നുപോകുന്ന കൊല്ലം - ചെങ്കോട്ട റൂട്ട് യാത്രക്കാർക്ക് എന്നും പ്രിയപ്പെട്ടതാണ്.

പശ്ചിമഘട്ടത്തിന്റെ മനോഹര കാഴ്ചകൾ ഇനി വലിയ ഗ്ലാസ് ജനലുകളിലൂടെ അടുത്തു കണ്ടുകൊണ്ട് യാത്ര ചെയ്യാവുന്നതാണ്. ഈ പാതയിൽ വിസ്റ്റാഡോം കോച്ചുകൾ അനുവദിക്കണമെന്നത് വർഷങ്ങളായുള്ള ആവശ്യമായിരുന്നു.

സർവീസ് വിവരങ്ങൾ
ട്രെയിൻ നമ്പറുകൾ: 16327 / 16328 (മധുര - ഗുരുവായൂർ - മധുര എക്സ്പ്രസ്)
കാലയളവ്: ഈമാസം 22 മുതൽ 2027 ജനുവരി 15 വരെ മധുര-ഗുരുവായൂർ സർവീസിലും, 23 മുതൽ 2027 ജനുവരി 16 വരെ ഗുരുവായൂർ-മധുര സർവീസിലും ഈ കോച്ച് ലഭ്യമായിരിക്കും.
അതേസമയം യാത്രക്കാർക്ക് പ്രകൃതിദൃശ്യങ്ങൾ തടസ്സമില്ലാതെ ആസ്വദിക്കാനായി പാകത്തിൽ കൂറ്റൻ ഗ്ലാസ് ജനലുകളും ഗ്ലാസ് മേൽക്കൂരയും (Glass Panels) അടങ്ങിയ പ്രത്യേക കോച്ചുകളാണ് വിസ്റ്റാഡോം കോച്ചുകൾ . കാഴ്ചകൾ കാണുന്നതിനനുസരിച്ച് തിരിക്കാൻ കഴിയുന്ന റൊട്ടേറ്റിങ് സീറ്റുകളും വിസ്റ്റാഡോം കോച്ചുകളുടെ പ്രത്യേകതയാണ്.