പാലാ ബിഷപ് ജേക്കബ് മുരിക്കന് വൃക്ക ദാനം ചെയ്യുന്നത് അന്യമതസ്ഥന്
സഹോദര സ്നേഹത്തിന്റെ മറ്റൊരു പേരായി ജേക്കബ് മുരിക്കന്. വൃക്കരോഗത്തിന് മുന്നില് ജീവിതം വഴിമുട്ടി നിന്ന യുവാവിന് വൃക്ക ദാനം ചെയ്യാനൊരുങ്ങി പാലാ രൂപതാ സഹായ മെത്രാന് മാര് ജേക്കബ് മുരിക്കന് മാതൃകയാകുന്നു. വൃക്കമാറ്റിവെക്കല് ശസ്ത്രക്രിയ കാത്തുകഴിയുന്ന തൃശ്ശൂര് വടക്കുംഭാഗം സ്വദേശി സൂരജിനാണ് (31) ഫാദര് ജേക്കബ് മുരിക്കന്റെ മഹാമനസ് പുതുജീവന് നല്കുന്നത്. ലോകചരിത്രത്തില് ആദ്യമായാണ് ജീവിച്ചിരിക്കെ ഒരു ബിഷപ്പ് വൃക്ക ദാനം ചെയ്യുന്നത്.
ഒന്നര വര്ഷമായി ഗുരുതരമായ വൃക്കരോഗത്തെ തുടര്ന്ന് ദുരിതം അനുഭവിക്കുകയാണ് കോട്ടയ്ക്കല് ആര്യവൈദ്യശാലയിലെ ജീവനക്കാരനും പ്രദേശവാസിയുമായ ഇ സൂരജ്. കിഡ്നി ഫൗണ്ടേഷന് ചെയര്മാന് ഫാദര് ഡേവിസ് ചിറമേലാണ് ഈ വൃക്കദാനത്തിന് പിന്നില് പ്രവര്ത്തിച്ചത്. വൃക്കദാനത്തിന് മുന്നോടിയായുള്ള പരിശോധനകള് കോട്ടയം മെഡിക്കല് കോളേജില് പൂര്ത്തിയായി. ജൂണ് ഒന്നിന് എറണാകുളം ലെയ്ക്ക്ഷോര് ആശുപത്രിയിലാണ് ശസ്ത്രക്രിയ നടക്കുന്നത്.
ലോക ചരിത്രത്തില് ആദ്യമായാണ് ഒരു ബിഷപ് ജീവിച്ചിരിക്കെ വൃക്ക ദാനം ചെയ്യാന് ഒരുങ്ങുന്നതെന്ന് കിഡ്നി ഫൗണ്ടേഷന് ചെയര്മാന് ഫാദര് ഡേവിസ് ചിറമേല് പറഞ്ഞു.
സൂരജിന്റെ അച്ഛന് നാലുവര്ഷം മുന്പ് പാമ്പുകടിയേറ്റ് മരിച്ചിരുന്നു. സഹോദരന് രണ്ടുവര്ഷം മുന്പ് ഹൃദ്രോഗം മൂലവും മരിച്ചു. ഇവരുടെ ചികിത്സാ ചെലവും മരണവും വരുത്തിയ ആഘാതത്തില്നിന്ന് മുക്തമാകും മുന്പാണ് ദുര്വിധി വൃക്കരോഗത്തിന്റെ രൂപത്തില് സുരജിനെയും കുടംബത്തേയും പിടികൂടിയത്. വൃക്കമാറ്റിവെക്കല് മാത്രമാണ് പോംവഴിയെന്ന് ഡോക്ടര്മാര് വ്യക്തമാക്കിയിരുന്നു.
വൃക്ക ലഭിച്ചെങ്കിലും തുടര്ചികിത്സകള്ക്കും മറ്റും നല്ലൊരു തുക ഇനിയും ആവശ്യമാണ്. ഇതിന് സുമനസുകളുടെ സഹായത്തിനായി കാത്തിരിക്കുകയാണ് കുടുംബം. സാമ്പത്തിക സഹായങ്ങള് സ്വരൂപിക്കുന്നതിനായി ഇ സൂരജ്, എസ്ബിടി, കോട്ടയ്ക്കല് ശാഖയില് 570221315721 (ഐഎഫ്എസ്ഇ കോഡ് എസ്ബിടിആര് 00269) എന്ന നമ്പരില് അക്കൗണ്ട് തുടങ്ങിയിട്ടുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
