തീരദേശപാതയില്‍ ബേക്കല്‍ പള്ളിക്കരയ്ക്കു സമീപം നിയന്ത്രണം വിട്ട കാര്‍ മരത്തിലിടിച്ചു നാലു സ്ത്രീകള്‍ ഉള്‍പ്പെടെ ബന്ധുക്കളായ ആറു പേര്‍ മരിച്ചു. കാസര്‍ഗോഡ് ചേറ്റുകുണ്ട് മുക്കോട് സ്വദേശി ഉപ്പു ഹമീദിന്റെ ഭാര്യ സക്കീന (45), സക്കീനയുടെ മക്കളായ സജീര്‍(18), സാനിറ (16), സക്കീനയുടെ സഹോദരന്റെ ഭാര്യ ഖൈറുന്നിസ (24), ഖൈറുന്നിസയുടെ മകള്‍ ഫാത്തിമ (2 വയസ്), സക്കീനയുടെ മകന്‍ ഇര്‍ഫാന്റെ ഭാര്യ റംസീന (25) എന്നിവരാണു മരിച്ചത്. അപകടത്തില്‍ സക്കീനയുടെ മകന്‍ അജ്മല്‍ (നാല്), ഇര്‍ഫാന്റെ എട്ടു മാസം പ്രായമുള്ള ആണ്‍കുട്ടി എന്നിവര്‍ നിസാര പരിക്കുകളോടെ രക്ഷപ്പെട്ടു. വാഹനത്തില്‍ ഇവരോടൊപ്പമുണ്ടായിരുന്ന സജീറിന്റെ സുഹൃത്ത് ചേറ്റുകുണ്ടിലെ ഇര്‍ഷാദ് (19) ഗുരുതര പരിക്കുകളോടെ ചികിത്സയിലാണ്.

ഇന്നലെ വൈകുന്നേരം 6.25നാണ് അപകടം. ചേറ്റുകുണ്ടിലെ വീട്ടില്‍നിന്നു കാസര്‍ഗോട്ടെ ബന്ധുവീട്ടിലേക്ക് പോകുംവഴിയാണ് സംഭവം. പണി നടന്നുകൊണ്ടിരിക്കുന്ന കാഞ്ഞങ്ങാട്-കാസര്‍ഗോഡ് കെഎസ്ടിപി റോഡില്‍ പള്ളിക്കര പഞ്ചായത്ത് ഓഫീസ് കെട്ടിടത്തിനു സമീപത്താണ് അപകടമുണ്ടായത്. റോഡില്‍ പണി നടക്കുന്ന ഭാഗത്തേക്കു കയറുന്നതിനിടെ കാര്‍ നിയന്ത്രണംവിട്ടു മറിയുകയായിരുന്നു. ഖൈറുന്നിസ, വാഹനമോടിച്ചിരുന്ന സജീര്‍, എന്നിവര്‍ സംഭവസ്ഥലത്തുതന്നെ മരിച്ചു. പരിക്കേറ്റ സക്കീന, സാനിറ എന്നിവരെ ഉദുമയിലെ സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിച്ചു.

ഗുരുതരമായി പരിക്കേറ്റ ഫാത്തിമയെ മംഗളൂരുവിലെ സ്വകാര്യ ആശുപത്രിയിലേക്കു കൊണ്ടുപോകുംവഴിയാണു മരിച്ചത്. ഇര്‍ഫാന്റെ എട്ടു മാസം പ്രായമുള്ള ആണ്‍കുട്ടി അപകടത്തിനിടെ വാഹനത്തില്‍നിന്നു തെറിച്ചുവീണതിനത്തുടര്‍ന്ന് നിസാര പരിക്കുകളോടെ രക്ഷപ്പെട്ടു.
കാസര്‍ഗോട്ടുള്ള ഖൈറുന്നിസയുടെ ബന്ധുവീട്ടില്‍ നോമ്പുതുറക്കാനായി പോവുകയായിരുന്നു സംഘം. നിയന്ത്രണംവിട്ട കാര്‍ റോഡില്‍നിന്നു തെന്നിമാറി ആല്‍മരത്തില്‍ ഇടിക്കുകയും തലകീഴായി മറിയുകയുമായിരുന്നു. കാര്‍ പൂര്‍ണമായും തകര്‍ന്നു. 
അപകടത്തെത്തുടര്‍ന്നു സ്ഥലത്ത് ഓടിയെത്തിയ നാട്ടുകാര്‍ തെറിച്ചുവീണ കുട്ടിയെയാണ് ആദ്യം രക്ഷപ്പെടുത്തിയത്. തുടര്‍ന്നു സക്കീന, സാനിറ, റംസീന എന്നിവരെ കാറില്‍നിന്നു പുറത്തെടുത്ത് ആശുപത്രിയിലേക്കു കൊണ്ടേപോയെങ്കിലും ജീവന്‍ രക്ഷിക്കാനായില്ല. സ്ഥലത്തെത്തിയ ബേക്കല്‍ പോലീസും കാഞ്ഞങ്ങാട് ഫയര്‍ഫോഴ്‌സും നാട്ടുകാരും ചേര്‍ന്നു കാര്‍ വെട്ടിപ്പൊളിച്ചാണു മറ്റുള്ളവരെ പുറത്തെടുത്തത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha