സഖാവിന് രാഷ്ട്രീയത്തില്‍ മാത്രമല്ല ഡബ്ബിങ്ങിലും തിളങ്ങാന്‍ കഴിയും
രാഷ്ട്രീയപ്രവര്‍ത്തനത്തില്‍ മാത്രമല്ല ഡബ്ബിങ്ങിലും കഴിവ് തെളിയിച്ച് ഭരണപരിഷ്‌കാര കമ്മീഷന്‍ ചെയര്‍മാന്‍ വിഎസ് അച്യുതാനന്ദന്‍ സിനിമരംഗത്തേക്ക്. സംവിധായകന്‍ ജീവന്‍ദാസ് ഒരുക്കുന്ന 'കാമ്ബസ് ഡയറി'യെന്ന ചിത്രത്തിലെ തന്റെ കഥാപാത്രത്തിന് ശബ്ദം നല്‍കിയാണ് വ്യാഴാഴ്ച വിഎസ് സിനിമാ ഡബ്ബിങ് മേഖലയില്‍ വിഎസ് ഹരിശ്രീ കുറിച്ചത്.
ചിത്രത്തില്‍ വിഎസ് അച്യുതാനന്ദന്‍ ആയിതന്നെയാണ് അദ്ദേഹം പ്രത്യക്ഷപ്പെടുന്നത്. കൂത്തുപറമ്പിലും പരിസരങ്ങളിലും നേരത്തേ ചിത്രീകരണം പൂര്‍ത്തിയായ ചിത്രത്തിന്റെ ഡബ്ബിങ് വ്യാഴാഴ്ചയാണ് ചിത്രാഞ്ജലിയില്‍ നടന്നത്. പരിസ്ഥിതിപ്രശ്‌നങ്ങള്‍ പ്രതിപാദിക്കുന്ന സിനിമയില്‍ വിദ്യാര്‍ത്ഥികളോടും നാട്ടുകാരോടും സംസാരിക്കുന്ന സീനിലാണ് വിഎസ് എത്തുന്നത്.
ആദ്യം ആശങ്കയുണ്ടായിരുന്നെങ്കിലും സംവിധായകനും പേഴ്‌സനല്‍ സ്റ്റാഫ് അംഗങ്ങളും ധൈര്യം കൊടുത്തതോടെ വിഎസിന് ആത്മവിശ്വാസമായി. സംഭാഷണങ്ങള്‍ സ്വതസിദ്ധമായ ശൈലിയില്‍തന്നെ വിഎസ് പറഞ്ഞു. കൂത്തുപറമ്ബിലെ ദൃശ്യ ആര്‍ട്‌സ് ക്‌ളബിന്റെ കൂട്ടായ്മയില്‍ ഒരുങ്ങുന്ന ചിത്രം ഒക്ടോബറില്‍ തിയറ്ററുകളിലെത്തും.
ചിത്രത്തിലെ മറ്റുകഥാപാത്രങ്ങളുടെ ഡബ്ബിങ് നേരത്തേ പൂര്‍ത്തിയായെങ്കിലും വി.എസിന്റെ സമയത്തിനായി സംവിധായകനും അണിയറ പ്രവര്‍ത്തകരും കാത്തിരിക്കുകയായിരുന്നു. വ്യാഴാഴ്ച ഡല്‍ഹിയില്‍നിന്നെത്തിയ അദ്ദേഹം യാത്രാക്ഷീണമൊക്കെ മാറ്റിവെച്ച് ചുറുചുറുക്കോടെ ഡബ്ബിങ്ങിനായി ചിത്രാഞ്ജലിയില്‍ എത്തുകയായിരുന്നു.
https://www.facebook.com/Malayalivartha
