അനന്തപുരിയിലെ നവരാത്രി ആഘോഷങ്ങള്ക്കായുള്ള വിഗ്രഹങ്ങള് കേരള പൊലീസിന്റ അകമ്പടിയോടെ ഘോഷയാത്രയായി പുറപ്പെട്ടു
അനന്തപുരിയിലെ നവരാത്രി ആഘോഷങ്ങള്ക്കായുള്ള വിഗ്രഹങ്ങള് കേരള പൊലീസിന്റെ അകമ്പടിയോടെ ഘോഷയാത്രയായി പുറപ്പെട്ടു. ഇന്നു രാവിലെ പദ്മനാഭപുരം കൊട്ടാരത്തില്, ചരിത്ര സ്മരണകള് നിറഞ്ഞ ഭക്തിനിര്ഭരമായ ചടങ്ങിനൊടുവിലാണ് ഘോഷയാത്ര പുറപ്പെട്ടത്. വിഗ്രഹ ഘോഷയാത്രയ്ക്ക് ഗാര്സ് ഒഫ് ഓണര് നല്കാനും അനുഗമിക്കാനും കേരള പൊലീസ് എത്തില്ലെന്ന പ്രചാരണം ഉണ്ടായിരുന്നെങ്കിലും അതിരാവില തന്നെ പൊലീസ് സ്ഥലത്ത് എത്തിയിരുന്നു. എ.ഡി.ജി.പി രാജേഷ് ദിവാനാണ് കേരളാ പൊലീസ് സംഘത്തെ നയിച്ചത്.
ശുചീന്ദ്രത്തു നിന്നും മുന്നൂറ്റിനങ്കയും കുമാര കോവിലില്നിന്നും കുമാരസ്വാമിയും പല്ലക്കില് എഴുന്നള്ളി കൊട്ടാര മുറ്റത്ത് എത്തിയ ശേഷമായിരുന്നു ചടങ്ങുകള് ആരംഭിച്ചത്. സംസ്ഥാന സര്ക്കാരിനെ പ്രതിനിധീകരിച്ച് മന്ത്രിമാരായ കടകംപള്ളി സുരേന്ദ്രന്, കടന്നപ്പള്ളി രാമചന്ദ്രന്, ദേവസ്വം ബോര്ഡ് പ്രസിഡന്റ് പ്രയാര് ഗോപാലകൃഷ്ണന് എന്നിവര് എത്തിയിരുന്നു. ആര്ക്കിയോളജി ഡയറക്ടര് പ്രേംകുമാര് മന്ത്രി കടകംപള്ളി സുരേന്ദ്രന് ഉടവാള് നല്കി അദ്ദേഹം അത് മന്ത്രി കടന്നപ്പള്ളി രാമചന്ദ്രന് നല്കി. കടന്നപ്പള്ളിയില് നിന്നും ദേവസം ബോര്ഡ് ജോയിന്റ് കമ്മിഷണര് ഭാരതി സ്വീകരിച്ചു. ഭാരതിയില് നിന്നും കന്യാകുമാരി ദേവസ്വം മാനേജര് സുദര്ശനന് ഉടവാള് സ്വീകരിച്ചതോടെയാണ് ഘോഷയാത്ര ആരംഭിച്ചത്. ഘോഷയാത്രയിലുടനീളം ഉടവാള് ഏന്തുന്നത് സുദര്ശനനാണ്. ഘോഷയാത്രയ്ക്ക് കേരള, തമിഴ്നാട് പൊലീസ് സേന സംയുക്ത ഗാര്ഡ് ഒഫ് ഓണര് നല്കി
ഒക്ടോബര് ഒന്നിന് നവരാത്രി വിഗ്രഹങ്ങളെ ഗവര്ണര് ജസ്റ്റിസ് പി.സദാശിവം സ്വീകരിക്കും. തുടര്ന്ന് സരസ്വതി വിഗ്രഹം ശ്രീപത്മനാഭ സ്വാമി ക്ഷേത്രത്തിലെ നവരാത്രി മണ്ഡപത്തിലും കുമാരസ്വാമിയേയും വെള്ളിക്കുതിരയേയും ആര്യശാല ദേവി ക്ഷേത്രത്തിലും മുന്നൂറ്റിനങ്ക ദേവിയെ ചെന്തിട്ട ദേവി ക്ഷേത്രത്തിലും പ്രതിഷ്ഠിക്കും.
https://www.facebook.com/Malayalivartha
