ബന്ധു നിയമനത്തില്‍ മുഖ്യമന്ത്രിയുടെ പങ്ക് അന്വേഷിക്കണമെന്ന് വി.എം. സുധീരന്‍ ആവശ്യപ്പെട്ടു. പരാതി ലഭിച്ചിട്ടിട്ടും നടപടിയെടുക്കാത്തത് വിജിലന്‍സ് ഡറക്ടറുടെ ഇരട്ടത്താപ്പാണ്. ജേക്കബ് തോമസ് എന്തു നടപടിയെടുക്കുമെന്ന് കേരളം കാത്തിരിക്കുകയാണെന്നും സുധീരന്‍ പറഞ്ഞു.
ബന്ധുനിയമന വിവാദവുമായി ബന്ധപ്പെട്ട് മന്ത്രി ഇ.പി.ജയരാജനെതിരെയും പി.കെ. ശ്രീമതിക്കെതിരെയും ആരോപണങ്ങളുയര്‍ന്നതിന് പിന്നാലെ ശ്രീമതി ടീച്ചറുടെ ഫെയ്‌സ്ബുക്ക് കുറിപ്പും വിവാദമായിരുന്നു. ഇതിന് പിന്നാലെയാണ് മുഖ്യമന്ത്രിയുടേതടക്കമുള്ള പാര്‍ട്ടി നേതാക്കളുടെ ബന്ധുക്കളുടെ നിയമനങ്ങള്‍ പുറത്ത് വന്നിരിക്കുന്നത്.
ബന്ധുനിയമനത്തില്‍ മുഖ്യമന്ത്രി പിണറായി വിജയനും കൂത്തുപറമ്പ് എംഎല്‍എ കെ.കെ.ശൈലജയ്‌ക്കെതിരെയാണ് പുതിയതായി ആരോപണമുയര്‍ന്നിരിക്കുന്നത്. മലിനീകരണ നിയന്ത്രണ ബോര്‍ഡ് സ്റ്റാന്‍ഡിങ് കോണ്‍സലായി നിയമിതനായ ടി. നവീന്‍ പിണറായിയുടെ ഭാര്യാസഹോദരിയുടെ മകനാണ്. ഇടത് സര്‍ക്കാര്‍ നിലവില്‍ വന്നയുടനെയായിരുന്നു നിയമനം. ശൈലജയുടെ മകനെ കണ്ണൂര്‍ വിമാനത്താവളത്തിലെ ഉയര്‍ന്ന പദവിയിലേക്കു പരിഗണിക്കുന്നതായാണ് ആരോപണം. ശൈലജയുടെ മകളെ കിന്‍ഫ്രയില്‍ നിയമിച്ചതായും ആരോപണമുയര്‍ന്നിട്ടുണ്ട്. എന്നാല്‍ തന്റെ മകന് അനധികൃതമായി ജോലി തരപ്പെടുത്തിയെന്ന തലത്തില്‍ ചില മാധ്യമങ്ങളില്‍ വരുന്ന വാര്‍ത്തകള്‍ അടിസ്ഥാനരഹിതമെന്ന് സിപിഐഎം കേന്ദ്രക്കമ്മിറ്റിയംഗവും ആരോഗ്യമന്ത്രിയുമായ കെകെ ശൈലജ പറഞ്ഞു.