ജയരാജനെതിരെ വിജിലന്‍സിന്റെ ത്വരിതഅന്വേഷണം.ഇത് സംബന്ധിച്ച് വിജിലന്‍സ് ഡയറക്ടര്‍ തോമസ് ഉത്തരവ് ഉത്തരവ് പുറപ്പെടുവിച്ചു. സ്‌പെഷല്‍ ഇന്‍വസ്റ്റിഗേറ്റീവ് യൂണിറ്റ് എസ്പി ജയകുമാറിനാണ് അന്വേഷണ ചുമതല. നിയമോപദേശത്തിന്റെ അടിസ്ഥാനത്തിലാണ് വിജിലന്‍സ് ഡയറക്ടര്‍ തീരുമാനമെടുത്തത്.ബന്ധു നിയമന വിവാദത്തില്‍ കുരുങ്ങിയ വ്യവസായ മന്ത്രി ഇപി ജയരാജന്‍ മുഖ്യമന്ത്രി പിണറായി വിജയന് രാജിക്കത്ത് നല്‍കി. മുഖ്യമന്ത്രി ആവശ്യപ്പെട്ടതു പ്രകാരമാണ് രാജി നല്‍കിയതെന്നാണ് സൂചന. നിയമന വിവാദത്തില്‍ ജയരാജനെതിരെ അന്വേഷണം നടത്തുന്നത് സംബന്ധിച്ച് വിജിലന്‍സ് തീരുമാനം വരാനിരിക്കെയാണ് നീക്കം. രാജി ഇന്നു തന്നെ മുഖ്യമന്ത്രി സ്വീകരിതച്ചേക്കുമെന്നാണ് അറിയുന്നത്. നാളെ നടക്കുന്ന സി.പി.ഐ.എം സംസ്ഥാന സെക്രട്ടറിയെറ്റിലെ ചര്‍ച്ചക്കും കേന്ദ്ര നേതൃത്വവുമായി കൂടിയാലോചനക്കും ശേഷമായിരിക്കും തീരുമാനമെന്നും റിപ്പോര്‍ട്ടുണ്ട്.
സര്‍ക്കാരിന്റെ പ്രതിച്ഛായ തകര്‍ന്ന ബന്ധു നിയമന വിവാദത്തില്‍ പാര്‍ട്ടിക്ക് പുറമെ മുന്നണിയും ജയരാജനെ കയ്യൊഴിഞ്ഞിരുന്നു. മുന്നണിയിലെ ഘടകകക്ഷികളായ സിപിഐയും ജനതാദളും എന്‍സിപിയും മന്ത്രിയുടെ രാജി ആവശ്യപ്പെടുകയും ചെയ്തിരുന്നു. അഴിമതി വിരുദ്ധ പ്രതിശ്ചായ ഉയര്‍ത്തി അധികാരത്തില്‍ വന്ന സര്‍ക്കാരിന്റെ മുഖം നഷ്ടപ്പെടുത്തുന്ന നടപടികളാണ് ജയരാജന്റെ ഭാഗത്തു നിന്ന് ഉണ്ടായതെന്നാണ് വിമര്‍ശനം.
സ്വജനപക്ഷപാതിത്വം കാണിച്ച മന്ത്രിക്കെതിരെ കേസെടുക്കണമെന്നാവശ്യപ്പെട്ട് സമര്‍പിച്ച ഹര്‍ജി വിജിലന്‍സ് കോടതി നാളെ പരിഗണിക്കാനിരിക്കെയാണ് ജയരാജന്‍ രാജിക്കത്ത് കൈമാറിയത്. ജയരാജനെതിരെ അന്വേഷണം വേണ്ടിവരുമെന്നാണ് വിജിലന്‍സിന് ലഭിച്ച നിയമോപദേശം. വിജിലന്‍സ് കേസില്‍ പ്രതി ചേര്‍ക്കപ്പെടുന്നതിനു മുന്‍പ് സ്വയം ഒഴിഞ്ഞു പോകാനുള്ള അവസരം എന്ന നിലയിലാണ് മുഖ്യമന്തി ജയരാജന്റെ രാജിക്കത്തു വാങ്ങിയതെന്നും കരുതുന്നു.
വിവാദങ്ങള്‍ അവസാനിപ്പിക്കാന്‍ മന്ത്രി ജയരാജന്‍ പാര്‍ട്ടി സംസ്ഥാന സെക്രട്ടറി കോടിയേരി ബാലകൃഷ്ണനെ രാജി സന്നദ്ധത അറിയിച്ചിരുന്നു. പാര്‍ട്ടി നടപടി എന്തായാലും അംഗീകരിക്കാമെന്നാണ് ജയരാജന്‍ അറിയിച്ചതായാണ് വിവരം. കൂടാതെ ജയരാജന്റെ വകുപ്പുമാറ്റവും പരിഗണിക്കുന്നുണ്ടെങ്കിലും പാര്‍ട്ടിയിലെയും മുന്നണിയിലെയും പൊതുധാരണ ജയരാജന്‍ പുറത്തുപോകണം എന്നുതന്നെയാണ്. ഉച്ചതിരിഞ്ഞ് മുഖ്യമന്ത്രി പിണറായി വിജയനും കോടിയേരിയും എകെജി സെന്‍രറില്‍ കൂടിക്കാഴ്ച്ച നടത്തുന്നുണ്ട്