വിജിലന്‍സ് ഡയറക്ടര്‍ ജേക്കബ് തോമസിനെതിരെ അഡീഷണര്‍ ചീഫ് സെക്രട്ടറി ഡോ.കെ.എം എബ്രഹാം മുഖ്യമന്ത്രി പിണറായി വിജയന് പരാതി നല്‍കി. തന്റെ വീട്ടില്‍ വിജിലന്‍സ് നടത്തിയ പരിശോധന നടപടി ക്രമങ്ങള്‍ പാലിച്ചല്ലെന്ന് ചൂണ്ടിക്കാട്ടിയാണ് ഡോ.കെ.എം എബ്രഹാം മുഖ്യമന്ത്രിക്ക് പരാതി നല്‍കിത്. വിജിലന്‍സ് ഡയറക്ടര്‍ ജേക്കബ് തോമസിന്റെ നിര്‍ദേശ പ്രകാരമാണ് പരിശോധന നടത്തിയതെന്ന് പരാതിയില്‍ ചൂണ്ടിക്കാട്ടുന്നു.

തന്നെപോലുള്ള മുതിര്‍ന്ന ഐ.എ.എസ് ഉദ്യോഗസ്ഥന്റെ വീട്ടില്‍ പരിശോധന നടത്തുമ്പോള്‍ ചില നടപടി ക്രമങ്ങള്‍ പാലിക്കേണ്ടതുണ്ട്. എന്നാല്‍ ഇതൊന്നും പാലിക്കാതെയാണ് ഒരു കൂട്ടം വിജിലന്‍സ് ഉദ്യോഗസ്ഥര്‍ തന്റെ വീട്ടില്‍ പരിശോധന നടത്തിയതെന്നും മൂന്ന് പേജുള്ള പരാതിയില്‍ കെ.എം എബ്രഹാം പറയുന്നു. വീട് പരിശോധിക്കാനുള്ള വാറണ്ട് ഉദ്യോഗസ്ഥരുടെ കയ്യിലുണ്ടായിരുന്നില്ല. ഇത് ചോദിച്ച തന്റെ ഭാര്യയോട് മുകളില്‍ നിന്നുള്ള നിര്‍ദേശ പ്രകാരമാണ് പരിശോധനയെന്ന് അറിയിക്കുകയായിരുന്നുവെന്നും പരാതിയില്‍ ചൂണ്ടിക്കാട്ടുന്നു.

അനധികൃത സ്വത്ത് സമ്ബാദന കേസില്‍ കോടതി ഉത്തരവ് പ്രകാരമാണ് കെ.എം എബ്രഹാമിനെതിരെ വിജിലന്‍സ് അന്വേഷണം നടക്കുന്നത്. ഇതിന്റെ ഭാഗമായിരുന്നു കഴിഞ്ഞ ദിവസം ഇദ്ദേഹത്തിന്റെ ജഗതിയിലെ വീട്ടില്‍ വിജിലന്‍സ് ഉദ്യോഗസ്ഥരെത്തി പരിശോധന നടത്തിയത്. എന്നാല്‍ വീടിന്റെ അളവെടുക്കുക മാത്രമാണ് ചെയ്തതെന്നും പരിശോധന നടത്തിയിട്ടില്ലെന്നുമാണ് വിജിലന്‍സ് അറിയിച്ചത്.