41 ദിവസത്തെ കഠിന വ്രതാനുഷ്ഠാനങ്ങള്‍ക്കു പരിസമാപ്തി കുറിച്ച് ശബരിമലയില്‍ ഇന്ന് മണ്ഡല പൂജ നടക്കും. തീര്‍ത്ഥാടനകാലത്തിന്റെ ആദ്യഘട്ട സമാപനമാണ് മണ്ഡലപൂജ. ശബരിമല ശ്രീധര്‍മ്മ ശാസ്താവിന് തങ്ക അങ്കി ചാര്‍ത്തിയാണ് മണ്ഡപൂജ നടക്കുക. ഭക്ത സഹസ്രങ്ങളുടെ ശരണം വിളികളുടെ അകമ്പടിയോടെയാണ് ഇന്നലെ ഘോഷയാത്രയായി സന്ധ്യാ ദീപാരാധനക്ക് തൊട്ടുമുമ്പ് അയ്യപ്പവിഗ്രഹത്തില്‍ ചാര്‍ത്താനുള്ള തങ്ക അങ്കി സന്നിധാനത്തെത്തിച്ചത്.
തന്ത്രി കണ്ഠരര് രാജീവരുടെയും മേല്‍ശാന്തി തെക്കുംപറമ്പത്ത് ഉണ്ണികൃഷ്ണന്‍ നമ്പൂതിരിയുടെയും നേതൃത്വത്തിലാണ് പൂജകള്‍ നടക്കുക.
കലശത്തോടെയും കളഭാഭിഷേകത്തോടെയുമാണ് മണ്ഡലപൂജയുടെ ചടങ്ങുകള്‍ ആരംഭിക്കുക. കിഴക്കേ മണ്ഡപത്തില്‍ തന്ത്രിയുടെ നേതൃത്വത്തില്‍ കളഭവും 25 കലശവും പൂജിക്കും. ബ്രഹ്മകലശത്തില്‍ കളഭം നിറച്ച് നീരാഞ്ജനം ഉഴിയും. ഇതിനു ശേഷം കലശം മേല്‍ശാന്തി ഏറ്റുവാങ്ങി അയ്യപ്പന് ഏറ്റുവാങ്ങി അയ്യപ്പന് അഭിഷേകം നടത്തും. ശേഷം പ്രസന്ന പൂജയ്ക്കായി നടയടയ്ക്കുന്ന സമയം വിഗ്രഹത്തില്‍ തങ്കഅങ്കി ചാര്‍ത്തി മംഗളാരതി ഉഴിയുന്നതോടെ മണ്ഡലപൂജ സമാപിയ്ക്കും. രാത്രി പത്തിന് ഹരിവരാസനം ചൊല്ലി നടയടയ്ക്കും. പിന്നീട് മകരവിളക്ക് തീര്‍ത്ഥാടനത്തിനായി ഡിസംബര്‍ 30 ന് നട തുറക്കും.