വെല്ലൂരിൽ രഥ ഘോഷയാത്രയ്ക്കിടെ രഥം മറിഞ്ഞു വീണ് 7 പേർക്ക് പരിക്ക്. 60 അടി ഉയരമുള്ള രഥമാണ് മറിഞ്ഞത്. മായന കൊല്ലൈ ഉത്സവത്തോടനുബന്ധിച്ച് വെല്ലൂർ, കാട്പാടി പ്രദേശങ്ങളിലാണ് രഥഘോഷയാത്ര നടന്നത്. ഇന്നലെ രാത്രി 11.40 നാണ് അപകടം സംഭവിച്ചത്.

വൈകുന്നേരം ഉത്സവത്തോടനുബന്ധിച്ച് അലങ്കരിച്ച രഥം വെല്ലൂർ പുതിയ ബസ് സ്റ്റാൻഡിലേക്ക് എത്തിച്ചിരുന്നു. ഓരോ രഥ സംഘവും പാലത്രങ്കരൈയിലേക്ക് എത്തി ആചാരപരമായ ചടങ്ങുകൾ പൂർത്തിയാക്കി രഥങ്ങൾ അതത് സ്ഥലങ്ങളിലേക്ക് തിരികെ കൊണ്ടുപോയി.

ചടങ്ങിനുശേഷം പാലത്രങ്കരൈയിൽ നിന്ന് തിരികെ വരുമ്പോഴാണ് 60 അടി ഉയരമുള്ള ഒരു രഥം മറിഞ്ഞുവീണത്. രഥത്തിൽ ഇരുന്നിരുന്ന പത്തിലധികം പേർ രഥത്തിനടിയിൽ കുടുങ്ങി. അ​ഗ്നിരക്ഷാ സേനയും പൊതുജനങ്ങളും ചേർന്ന് രക്ഷാപ്രവർത്തനം നടത്തുകയും ചെയ്തു.

പരിക്കേറ്റവരെ ചികിത്സയ്ക്കായി സമീപത്തെ സ്വകാര്യ ആശുപത്രിയിൽ പ്രവേശിപ്പിച്ചിരിക്കുകയാണ്. കലക്ടർ സുബ്ബുലക്ഷ്മി, പൊലീസ് സൂപ്രണ്ട് ശിവരാമൻ എന്നിവർ സ്ഥലത്തെത്തി പരിശോധനകൾ നടത്തുകയും ചെയ്തു. വൻ ദുരന്തം ഒഴിവായത് തലനാരിഴയ്ക്കാണ് .