ഹോളിവുഡ് ചരിത്രത്തിലെ ഏറ്റവും മികച്ച നടന്മാരില്‍ ഒരാളായി കണക്കാക്കപ്പെടുന്ന ഹോളിവുഡ് ഇതിഹാസം റോബര്‍ട്ട് ഡുവാള്‍ അന്തരിച്ചു.'ഗോഡ്ഫാദര്‍', 'അപ്പോക്കലിപ്‌സ് നൗ' തുടങ്ങിയ വിഖ്യാത ചിത്രങ്ങളിലൂടെ ലോകമെമ്പാടുമുള്ള ചലച്ചിത്ര പ്രേമികളുടെ മനസ്സില്‍ ഇടംപിടിച്ച വിശ്വപ്രസിദ്ധ അമേരിക്കന്‍ നടനാണ് റോബര്‍ട്ട് ഡുവാള്‍. 95 വയസ്സായിരുന്നു. ഏഴ് പതിറ്റാണ്ടിലേറെ നീണ്ടുനിന്ന തന്റെ അഭിനയജീവിതത്തിനാണ് റോബര്‍ട്ട് ഡുവാള്‍ തിരശ്ശീലയിട്ടത്.

1962ല്‍ 'ടു കില്‍ എ മോക്കിംഗ്‌ബേര്‍ഡ്' എന്ന ചിത്രത്തിലൂടെയാണ് ഡുവാള്‍ അരങ്ങേറ്റം കുറിച്ചത്. ഫ്രാന്‍സിസ് ഫോര്‍ഡ് കൊപ്പോളയുടെ 'ദി ഗോഡ്ഫാദര്‍' പരമ്പരയിലെ ടോം ഹേഗന്‍ എന്ന കഥാപാത്രം അദ്ദേഹത്തെ ആഗോള പ്രശസ്തനാക്കി. 'അപ്പോക്കലിപ്‌സ് നൗ' എന്ന ചിത്രത്തിലെ ലഫ്റ്റനന്റ് കേണല്‍ ബില്‍ കില്‍ഗോര്‍ എന്ന വേഷം സിനിമാ ചരിത്രത്തിലെ തന്നെ ഏറ്റവും മികച്ച പ്രകടനങ്ങളിലൊന്നായി വിലയിരുത്തപ്പെടുന്നു.

1983ല്‍ 'ടെന്‍ഡര്‍ മേഴ്‌സീസ്' എന്ന ചിത്രത്തിലെ അഭിനയത്തിന് അദ്ദേഹത്തിന് മികച്ച നടനുള്ള ഓസ്‌കാര്‍ ലഭിച്ചു. ഇതിന് പുറമെ നാല് ഗോള്‍ഡന്‍ ഗ്ലോബ് പുരസ്‌കാരങ്ങളും രണ്ട് എമ്മി അവാര്‍ഡുകളും ബാഫ്റ്റ പുരസ്‌കാരവും അദ്ദേഹം സ്വന്തമാക്കിയിട്ടുണ്ട്.നടന്‍ എന്നതിലുപരി സംവിധായകന്‍ എന്ന നിലയിലും അദ്ദേഹം കഴിവ് തെളിയിച്ചിട്ടുണ്ട്. 'ദി അപ്പസ്‌തോലന്‍' (1997) ഉള്‍പ്പെടെയുള്ള ചിത്രങ്ങള്‍ അദ്ദേഹത്തിന്റെ സംവിധാന മികവിന് ഉദാഹരണങ്ങളാണ്.