ശിവരാത്രി ദിവസം വിഷ്ണുനാമം ജപിച്ച് ശിവക്ഷേത്രദർശനം നടത്തുന്ന കന്യാകുമാരി ജില്ലയിലെ പ്രാചീന ആചാരമായ ശിവാലയ ഓട്ടത്തിന് തുടക്കം കുറിച്ചു. പാർവതീവല്ലഭനായ ശ്രീപരമേശ്വരനെ ധ്യാനിച്ച് ഭക്തർ ആചരിക്കുന്ന ശിവരാത്രി ആഘോഷം ഞായറാഴ്ചയാണ്.

കന്യാകുമാരി ജില്ലയിലെ 12 ശിവക്ഷേത്രങ്ങളിൽ ദർശനക്രമം വരുന്ന ശിവാലയ ഓട്ടം ഇന്നലെ വൈകുന്നേരം ആരംഭിച്ചു. മാർത്താണ്ഡത്തിനു സമീപം മുഞ്ചിറ തിരുമല മഹാദേവക്ഷേത്രത്തിൽ നിന്നാണ് ഓട്ടം തുടങ്ങിയത്. ഞായറാഴ്ച പകലും രാത്രിയും നീളുന്ന ഓട്ടം തിങ്കളാഴ്ച രാവിലെ സമാപിക്കും.

കുംഭമാസത്തിലെ കൃഷ്ണപക്ഷ നാളിലാണ് ശിവരാത്രി ആഘോഷിക്കുന്നത്. ദേവാസുരന്മാർ പാലാഴി കടഞ്ഞതുമായി ബന്ധപ്പെട്ട ഐതിഹ്യമാണ് ശിവരാത്രിക്ക് പിന്നിലുള്ളത്. ശിവരാത്രി ആഘോഷത്തിന് എല്ലാ പ്രമുഖ ശിവക്ഷേത്രങ്ങളും ഒരുങ്ങി. എല്ലായിടത്തും ഇന്ന് പകൽ നല്ല ഭക്തജനത്തിരക്കാണ് പ്രതീക്ഷിക്കുന്നത്.

ക്ഷേത്രങ്ങൾ പിറ്റേന്ന് പുലരുവോളം തുറന്നിരിക്കും. എല്ലാ ശിവക്ഷേത്രങ്ങളിലും രാത്രി ഇടവിട്ട് യാമപൂജകൾ നടക്കും. ഭക്തർ ശിവരാത്രി വ്രതം നോറ്റ് ക്ഷേത്രദർശനം നടത്തും. കൂവളത്തിലകൾ സമർപ്പിച്ചും ഉപവാസമനുഷ്ടിച്ചും രാത്രി ഉറങ്ങാതെയും ഭക്തർ ശിവരാത്രി പുണ്യത്തിനായി പ്രാർഥിക്കും.
‌‌
ശിവാലയ ഓട്ടത്തിൽ പാരമ്പര്യമായി ഭക്തർ കാൽനടയായാണ് ഓടി ക്ഷേത്രദർശനം നടത്തുന്നത്. തിരുമല കഴിഞ്ഞാൽ തിക്കുറിശ്ശി, തൃപ്പരപ്പ്, തിരുനന്തിക്കര, പൊന്മന, പന്നിപ്പാകം, കൽക്കുളം, മേലാങ്കോട്, തിരുവിതാംകോട്, തിരുവിടയ്‌ക്കോട്, തൃപ്പന്നികോട്, തിരുനട്ടാലം എന്നിവയാണ് ഓട്ടത്തിലെ ദർശനക്രമം വരുന്ന മറ്റ് ശിവാലയങ്ങൾ.

ഒരു രാത്രിയും പകലും കൊണ്ട് കാൽനടയായി ഭക്തർ 12 ക്ഷേത്രങ്ങളിലും ദർശനം നടത്തുന്നതാണ് ആചാരരീതി. ‘ഗോവിന്ദാ ഗോപാലാ’ എന്ന മന്ത്രമുരുക്കഴിച്ചാണ് ഭക്തർ ക്ഷേത്രദർശനം നടത്തുന്നത്.

മഹാഭാരതത്തിൽ ധർമപുത്രർ നടത്തിയ രാജസൂയ യാഗവുമായി ബന്ധപ്പെട്ട ഐതിഹ്യമാണ് ഓട്ടത്തിന് ആധാരമായി പറയുന്നത്. പാരമ്പര്യഓട്ടക്കാർക്കു പുറമെ വാഹനങ്ങളിൽ ദർശനത്തിനെത്തുന്നവരും നിരവധിയാണ്.

ശുചീന്ദ്രം ക്ഷേത്രത്തിലും തിരുവനന്തപുരം ജില്ലയിൽ ശ്രീകണ്‌ഠേശ്വരം, പാറശ്ശാല, ആറയൂർ, തലയൽ, ചെഴുങ്ങാനൂർ, നെയ്യാറ്റിൻകര രാമേശ്വരം, പൊഴിയൂർ, ചെങ്കൽ മഹേശ്വരം, കഠിനംകുളം, വലിയശാല കാന്തള്ളൂർ തുടങ്ങിയ ശിവക്ഷേത്രങ്ങളിൽ ശിവരാത്രി പ്രധാനമേറിയതാണ്.