മരത്തിന്റെ കട്ടകളുപയോഗിച്ചു നിർമിതികളുണ്ടാക്കുന്ന ജനപ്രിയ ഗെയിമായ 'കപ്‌ല' കണ്ടുപിടിച്ച ഡച്ച് ആർക്കിടെക്റ്റ് ടോം വാൻ ഡെർ ബ്രഗൻ (80) അന്തരിച്ചു. ദീർഘനാളായി ഹൃദ്രോഗബാധിതനായിരുന്നു അദ്ദേഹം.

നാല് പതിറ്റാണ്ടിലേറെയായി ലോകമെങ്ങുമുള്ള കുട്ടികളേയും ആർക്കിടെക്ചർമാരേയും ഏറെ സ്വാധീനിച്ചതാണ് ഈ ബിൽഡിങ് ബ്ലോക്ക് ഗെയിം. 1987ലാണ് തെക്കൻ ഫ്രാൻസിൽ സ്വന്തമായി ഒരു കോട്ട രൂപകൽപ്പന ചെയ്യുന്നതിനിടെ ബ്രഗൻ കപ്‌ല ഗെയിം സൃഷ്ടിക്കുന്നത്.

പൈൻ മരങ്ങളിൽ നിന്നു കൊത്തിയെടുത്ത ചതുരക്കട്ടകൾ ഉപയോഗിച്ചായിരുന്നു അത്. അന്ന് ഈ കട്ടകളുപയോഗിച്ച് അദ്ദേഹം കോട്ടയുടെ മാതൃകയുണ്ടാക്കി. പിന്നീട് ഈ ഗെയിം ഫ്രാൻസിൽ പ്രചാരം നേടി. കളിപ്പാട്ടക്കടകളിലെല്ലാം ഇവ ലഭിക്കാനും തുടങ്ങി. കപ്‌ല ഗെയിം ബോക്‌സുകൾ പിൽക്കാലത്ത് ഡസനിലേറെ രാജ്യങ്ങളിലായി കോടിക്കണക്കിനാണ് വിറ്റഴിച്ചത്.