ഗതാഗതമന്ത്രിയാകുക എന്ന വെല്ലുവിളി ഏറ്റെടുക്കുന്നുവെന്ന് കുട്ടനാട് എംഎല്‍എ തോമസ് ചാണ്ടി. കെഎസ്ആര്‍ടിസിയെ ലാഭത്തിലാക്കുക എന്നത് ഭാരിച്ച ഉത്തരവാദിത്തമാണെന്നും നിയുക്ത ഗതാഗതമന്ത്രി പറഞ്ഞു. എന്‍സിപിയുടെ മന്ത്രിയായി പിണറായി മന്ത്രിസഭയിലേക്ക് നാളെ വൈകിട്ട് നാല് മണിക്കാണ് തോമസ് ചാണ്ടിയുടെ സത്യപ്രതിജ്ഞ.
ആരോപണമുക്തനായി എകെ ശശീന്ദ്രന്‍ തിരിച്ചു വന്നാല്‍ മാറിക്കൊടുക്കുമെന്നും തോമസ് ചാണ്ടി പറഞ്ഞു. ക്ലീന്‍ചിറ്റുമായി ശശീന്ദ്രന്‍ മടങ്ങിവരുമ്പോള്‍ മാറിക്കൊടുക്കുമെന്ന കാര്യത്തില്‍ സംശയമില്ല. എല്‍ഡിഎഫ് യോഗമാണ് എന്‍സിപിയുടെ നിര്‍ദേശ പ്രകാരം തോമസ് ചാണ്ടിയെ മന്ത്രിയായി തീരുമാനിച്ചത്. എകെ ശശീന്ദ്രനെതിരായ ജൂഡീഷ്യല്‍ അന്വേഷണം നടക്കട്ടെയെന്നും ശശീന്ദ്രന്‍ മാറിനില്‍ക്കുന്നത് തന്നെയാണ് നല്ലതെന്നുമാണ് എല്‍ഡിഎഫ് യോഗത്തില്‍ ഉണ്ടായ പൊതു വികാരം. ഇതോടെയാണ് സിപിഐഎം കേന്ദ്ര നേതൃത്വം പരസ്യമായി എതിര്‍പ്പ് പ്രകടിപ്പിച്ച തോമസ് ചാണ്ടിക്ക് പിണറായി വിജയന്‍ മന്ത്രിസഭയില്‍ അംഗമാകാന്‍ അവസരം ലഭിച്ചത്