ജിഷ്ണുവിന്റെ കുടുംബത്തിന്റെ സമരവുമായി ബന്ധപ്പെട്ട് ഗൂഢാലോചനാകുറ്റം ചുമത്തി പൊലീസ് അറസ്റ്റ് ചെയ്ത് ജയിലിലടച്ച തോക്കുസ്വാമി എന്ന ഹിമവല്‍ ഭദ്രാനന്ദ മുഖ്യമന്ത്രി പിണറായി വിജയനെ ന്യായീകരിച്ച് രംഗത്ത്. സംഭവത്തെക്കുറിച്ച് മുഖ്യമന്ത്രി പറഞ്ഞതാണ് ശരിയെന്ന് പറഞ്ഞ തോക്കുസ്വാമി, സമരം കൊണ്ട് ജിഷ്ണുവിന്റെ അമ്മ എന്തുനേടിയെന്ന് ചോദിച്ചു.

പൊലീസ് ആസ്ഥാനത്തെ സംഭവത്തിന് പിന്നില്‍ യു.ഡി.എഫിലെയും ബി.ജെ.പിയിലെയും ഒരു വിഭാഗത്തിന്റെ ഗൂഢാലോചനയുണ്ടെന്ന് ഹിമവല്‍ ഭദ്രാനന്ദ വാര്‍ത്താസമ്മേളനത്തില്‍ ആരോപിച്ചു. തനിക്കൊപ്പം ജയിലിലടച്ചവരെ കാണാന്‍ കോണ്‍ഗ്രസ്, ബി.ജെ.പി നേതാക്കളെത്തിയത് ഗൂഢാലോചനയുടെ തെളിവാണ്. കള്ളക്കേസില്‍ കുടുക്കി ജയിലിലടച്ച പൊലീസുകാര്‍ക്കെതിരെ മനുഷ്യാവകാശ കമ്മീഷനില്‍ പരാതി നല്‍കും.

പിണറായി വിജയന്റെ രക്തം സ്‌ട്രോയിട്ട് കുടിക്കാന്‍ നടക്കുന്ന ചിലരുണ്ട്. പിണറായിയെ ക്രിമിനലും ഗുണ്ടയുമാക്കാനാണ് ചിലരുടെ ശ്രമം. പാര്‍ട്ടിപ്രവര്‍ത്തകരെ സംരക്ഷിക്കുന്നതുപോലെയാണ് മുഖ്യമന്ത്രി പൊലീസിനെയും സംരക്ഷിക്കുന്നത്. പൊലീസ് സ്വന്തം ആളുകളാണെന്ന് മുഖ്യമന്ത്രി തെറ്റിദ്ധരിച്ചിരിക്കുകയാണ്. പൊലീസില്‍ 30 ശതമാനം മാത്രമാണ് മോശക്കാര്‍. യു.ഡി.എഫ്, ബി.ജെ.പി അനുഭാവികളായ പൊലീസുകാരാണ് പൊലീസ് ആസ്ഥാനത്തിന് മുന്നില്‍ നടന്ന സംഭവത്തില്‍ തെറ്റ് ചെയ്തത്. ജിഷ്ണുവിന്റെ അമ്മയെയും കുടുംബത്തെയും തൊഴിലാളി യൂണിയനുകളെ നേരിടുന്നതുപോലെയാണ് പൊലീസ് കൈകാര്യം ചെയ്തത്.

പൊലീസ് ആസ്ഥാനം സമരത്തിന് പറ്റിയ വേദിയല്ല. സമരം നടത്തണമായിരുന്നുവെങ്കില്‍ സെക്രട്ടറിയേറ്റിന് മുന്നിലാകാമായിരുന്നു. പൊലീസ് ആസ്ഥാനത്ത് സമരം നടത്താന്‍ മഹിജയെ ഉപദേശിച്ചതും ഇത്തരമൊരു സാഹചര്യം സൃഷ്ടിച്ചതും ആരാണെന്ന് കണ്ടെത്തണമെന്നും ഹിമവല്‍ ഭദ്രാനന്ദ പറഞ്ഞു.