എസ്ബിടിഎസ്ബിഐ ഡേറ്റ ലയനം തുടങ്ങി; അക്കൗണ്ടുകളുടെ പ്രവര്ത്തനം സ്തംഭിച്ചു, ലയനത്തിന്റെ പേരില് തട്ടിപ്പുണ്ടാകാന് സാധ്യത, ജനങ്ങള് ജാഗ്രതയോടെയിരിക്കണമെന്ന് ബാങ്കുകളുടെ മുന്നറിയിപ്പ്
എസ്ബിടിക്കു കീഴിലുള്ള എല്ലാ അക്കൗണ്ടുകളും എസ്ബിഐയിലേക്കു ലയിപ്പിക്കുന്ന പ്രവൃത്തി ഇന്നലെ രാത്രി 11.15ന് ആരംഭിച്ചതോടെ ഇരുബാങ്കുകളുടെയും സകല ഇടപാടുകളും രാജ്യവ്യാപകമായി സ്തംഭിച്ചു. ഇന്നു രാവിലെ ആറിന് എസ്ബിഐയും രാവിലെ 11.30നു പഴയ എസ്ബിടി അക്കൗണ്ടുകളും വീണ്ടും പ്രവര്ത്തനസജ്ജമാകും. ഡേറ്റ കൈമാറ്റത്തിനു ശേഷം ബാങ്ക് ഇടപാടുകള്ക്കു ബുദ്ധിമുട്ടു നേരിടുന്നുണ്ടോ എന്നു പരിശോധിക്കാന് സംസ്ഥാനത്തെ 100 മുന് എസ്ബിടി ശാഖകളോട് ഇന്നും നാളെയും പ്രവര്ത്തിക്കാന് നിര്ദേശിച്ചിട്ടുണ്ട്.
പണം പിന്വലിക്കല്, നിക്ഷേപിക്കല്, എടിഎം ഉപയോഗം, അക്കൗണ്ട് തുറക്കല്, വായ്പ അനുവദിക്കല് തുടങ്ങിയ എല്ലാ നടപടികളും സുഗമമാണോ എന്ന് ഈ ശാഖകളില് പരിശോധിക്കും. ഇടപാടുകാര്ക്കു പ്രവേശനം ഉണ്ടായിരിക്കില്ല. ലയിച്ചു കഴിഞ്ഞ എസ്ബിടി ശാഖകളില് തിങ്കള് മുതല് എല്ലാ ഇടപാടുകളും സാധ്യമാകുന്ന തരത്തിലാണു ക്രമീകരണങ്ങള്.
കഴിഞ്ഞ ഒന്നിന് എസ്ബിടിഎസ്ബിഐ ലയനം നടന്നെങ്കിലും എസ്ബിടി ഇടപാടുകാര്ക്ക് എസ്ബിഐ ശാഖകളില് നിന്നു സേവനം ലഭിച്ചിരുന്നില്ല. ഡേറ്റ കൈമാറ്റം ഇന്നു പൂര്ത്തിയാകുന്നതിനാല് തിങ്കള് മുതല് എസ്ബിടി ഇടപാടുകാര്ക്കു രാജ്യത്തെ ഏത് എസ്ബിഐ ശാഖയിലുമെത്തി സേവനം തേടാം.
ഇന്റര്നെറ്റ് ബാങ്കിങ്, മൊബൈല് ബാങ്കിങ്, ഡെബിറ്റ് കാര്ഡ് ഉപയോഗിച്ചുള്ള പണം പിന്വലിക്കല്, അടയ്ക്കല് തുടങ്ങിയ സേവനങ്ങള് ഡേറ്റ കൈമാറ്റത്തിന്റെ ഭാഗമായി തടസ്സപ്പെട്ടു. അഞ്ച് അനുബന്ധ ബാങ്കുകളില് എസ്ബിടിയുമായാണ് എസ്ബിഐയുടെ ആദ്യ ഡേറ്റാ കൈമാറ്റം. തുടര്ന്നുള്ള ആഴ്ചകളില് മറ്റ് അനുബന്ധ ബാങ്കുകളുടെ ഡേറ്റ എസ്ബിഐയുമായി സംയോജിപ്പിക്കുന്നതിനാല് മേയ് 27 വരെ എസ്ബിഐ ഇടപാടുകള് ഇടയ്ക്കിടെ തടസ്സപ്പെടും.
എസ്ബിടിയും അനുബന്ധ ബാങ്കുകളും മൊബൈല് ബാങ്കിങ്ങിനായി നല്കിയിരുന്ന 'എസ്ബി എനിവേര്' എന്ന ആപ്ലിക്കേഷന് 'എസ്ബി എനിവേര് പഴ്സനല്' എന്നാക്കി മാറ്റിയിട്ടുണ്ട്. ഇപ്പോഴുള്ള യൂസര്നെയിമും പാസ്വേഡും തുടരാം.
എസ്ബിടി എസ്ബിഐ ഡേറ്റ കൈമാറ്റം ഇന്നലെയും ഇന്നുമായി നടക്കുന്നതു കണക്കിലെടുത്തു രാജ്യത്തു വ്യാപകമായി തട്ടിപ്പിനു സാധ്യതയുണ്ടെന്നു ബാങ്കുകളുടെ മുന്നറിയിപ്പ്. ഡേറ്റാ ലയനം നടക്കുന്ന സമയത്തു തട്ടിപ്പു നടത്താന് കഴിയില്ലെങ്കിലും ഉച്ച മുതല് കാര്ഡുകള് വീണ്ടും പ്രവര്ത്തിച്ചു തുടങ്ങുമ്പോള് ഫോണ്വിളികള് എത്താം.
കാര്ഡ് നമ്പര്, പിന് നമ്പര്, ഫോണിലേക്ക് എസ്എംഎസ് ആയി എത്തുന്ന ഒറ്റത്തവണ പാസ്വേഡ് തുടങ്ങിയ വിശദാംശങ്ങളൊന്നും ആരുമായും പങ്കുവയ്ക്കരുത്. ഇടപാടുകാരുടെ അക്കൗണ്ട് വിവരങ്ങള് തിരക്കി ബാങ്കുകളില് നിന്നു വിളിക്കാറില്ല. ഇത്തരത്തിലുള്ള കോളുകള് പ്രോല്സാഹിപ്പിക്കരുത്.
https://www.facebook.com/Malayalivartha
