നേമത്ത് ഇന്നലെ അര്‍ദ്ധരാത്രിയുണ്ടായ രണ്ട് ബൈക്ക് അപകടങ്ങളിലായി രണ്ടു യുവാക്കള്‍ മരിച്ചു. പാപ്പനംകോട് എസ്‌റ്റേറ്റ് ജംഗ്ഷന് സമീപം രാത്രി 12ഓടെ രണ്ടു ബൈക്കുകള്‍ കൂട്ടിയിടിച്ചുണ്ടായ അപകടത്തില്‍ പാപ്പനംകോട് പേരേക്കോണം വടക്കേവിളാകത്ത് വീട്ടില്‍ ശിവാനന്ദന്റെ മകന്‍ കണ്ണന്‍ എന്ന സജിത്ത് (22) മരിച്ചു. ബൈക്കുകളിലുണ്ടായിരുന്ന സത്യന്‍ നഗര്‍ സ്വദേശികളായ സന്ദീപ് (23), അജിത്ത് (22), വിളവാതുക്കല്‍ സ്വദേശി രാഹുല്‍ (26) എന്നിവരെ ഗുരുതരാവസ്ഥയില്‍ മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചു.

പാപ്പനംകോട് ജംഗ്ഷനില്‍ പോയശേഷം വീട്ടിലേക്ക് മടങ്ങുകയായിരുന്നു ഇവര്‍. എതിരെ വന്ന ബൈക്കുമായി ഇവര്‍ സഞ്ചരിച്ചിരുന്ന ബൈക്ക് കൂട്ടിയിടിക്കുകയായിരുന്നു. നാട്ടുകാര്‍ ചേര്‍ന്നാണ് പരിക്കേറ്റവരെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചത്. അപകടത്തിന്റെ ആഘാതത്തില്‍ തലയ്‌ക്കേറ്റ പരിക്കും അമിത രക്തസ്രാവവുമാണ് സജിത്തിന്റെ മരണത്തിന് കാരണാമായതെന്ന് പൊലീസ് പറയുന്നു. പോസ്റ്റുമോര്‍ട്ടത്തിനുശേഷം സജിത്തിന്റെ മൃതദേഹം ബന്ധുക്കള്‍ക്ക് വിട്ടുനല്‍കി. തെരുവുവിളക്കുകളുണ്ടെങ്കിലും ലൈറ്റിനുവെളിച്ചം കുറവായതിനാല്‍ പലപ്പോഴും എതിരവരുന്ന വാഹനം കാണാതെ ഇവിടെ അപകടങ്ങള്‍ നടക്കുന്നത് പതിവാണ്. ആന്ധ്രാപ്രദേശിയില്‍ ഉപരിപഠനം നടത്തുകയായിരുന്നു സജിത്ത്. ഷൈലജയാണ് അമ്മ. 

രണ്ടാമത്തെ അപകടം നടന്നത് നേമം പൂഴിക്കുന്നിന് സമീപത്തയിരുന്നു. മതിലില്‍ ബൈക്കിടിച്ചുണ്ടായ അപകടത്തില്‍ പൂഴിക്കുന്ന് അശ്വതിയില്‍ സോമന്‍ നായരുടെ മകന്‍ കുട്ടന്‍ എന്ന ബിജു (30) മരിച്ചു. നേമത്തുപോയശേഷം വീട്ടിലേക്ക് മടങ്ങുകയായിരുന്നു ബിജു. നിയന്ത്രണം വിട്ട ബൈക്ക് മതിലില്‍ ഇടിക്കുകയായിരുന്നു. നാട്ടുകാരാണ് ബിജുവിനെ തിരുവനന്തപുരം മെഡിക്കല്‍ കോളേജ് ആശുപത്രിയില്‍ പ്രവേശിപ്പിച്ചത്. കൊല്ലത്തെ സ്വകാര്യ സ്ഥാപനത്തിലെ ജീവനക്കാരനായിരുന്നു.