നടന്‍ ദിലീപിന് ശക്തമായ പിന്‍തുണയുമായി പി.സി ജോര്‍ജ് എം.എല്‍.എ രംഗത്ത്. ദിലീപിനെതിരെയുള്ള കേസ് കെട്ടിച്ചമച്ചതാണെന്നും കേരളത്തിലെ ജനങ്ങള്‍ ഇതിന് ക്ഷമ പറയണ്ടി വരുമെന്നും അദ്ദേഹം പറഞ്ഞു. പിണറായി വിജയനും നടനെ ഉപേക്ഷിച്ച് പോയ സ്ത്രീയും ഒരുമിച്ച് വേദി പങ്കിട്ടതിന് ശേഷമാണല്ലോ ഗൂഢാലോചന ഉയര്‍ന്ന് വന്നതെന്നും അദ്ദേഹം ചോദിച്ചു.

ദിലീപിനെതിരെ തെളിവില്ലെന്ന് സ്ഥാനമൊഴിഞ്ഞ ശേഷം സെന്‍കുമാര്‍ പറഞ്ഞതാണ്. ഒന്നര ദിവസം കഴിഞ്ഞപ്പോള്‍ ദിലീപ് അറസ്റ്റിലായി. ഇതിലെന്താണ് ന്യായം, ഇത് കള്ള കേസാണ്. സര്‍ക്കാരിന്റെ തെറ്റായ നയങ്ങള്‍ മൂലം ജനജീവിതം പൊറുതിമുട്ടിയ സാഹചര്യത്തില്‍ ജനങ്ങളുടെ ശ്രദ്ധ തിരിച്ച് വിടാന്‍ ദിലീപിനെ ബലിയാടാക്കിയിരിക്കുകയാണെന്നും പി.സി ജോര്‍ജ് ഉന്നയിച്ചു. രാഷ്ട്രീയ മുതലെടുപ്പ് നടത്തുന്ന നാണം കെട്ടവന്‍മാരുടെ ഭരണമാണ് സംസ്ഥാനത്ത് നടക്കുന്നതെന്നും പി.സി ജോര്‍ജ് ആരോപിച്ചു.