നടന്‍ ദിലീപുമായി തനിക്ക് വസ്തു,സാമ്പത്തിക ഇടപാടുകള്‍ ഒന്നും തന്നെ ഉണ്ടായിരുന്നില്ലെന്ന് ആക്രമണത്തിനിരയായ നടി പറഞ്ഞു. ഇത്തരത്തിലുള്ള തെറ്റായ പ്രചരണങ്ങള്‍ മാദ്ധ്യമങ്ങള്‍ ഒഴിവാക്കണമെന്നും നടി പ്രസ്താവനയില്‍ ആവശ്യപ്പെട്ടു.

ഭൂമിയിടപാടുമായി ബന്ധപ്പെട്ട ഏത് അന്വേഷണത്തിനും രേഖകള്‍ ഹാജരാക്കാന്‍ തയ്യാറാണ്. തുടര്‍ച്ചയായി ഇത്തരം ആരോപണങ്ങള്‍ വരുന്നതുകൊണ്ടാണ് ഇത്തരത്തില്‍ വിശദീകരണം നല്‍കേണ്ടി വന്നത്. അറസ്റ്റിലായ നടനുമായി കുടുംബപരമായ സൗഹൃദമുണ്ടായിരുന്നു. എന്നാലത് കുറച്ചുനാളുകള്‍ക്ക് ശേഷം ഇല്ലാതായി. ഇത് എല്ലാവര്‍ക്കും അറിയാവുന്നതാണ്, ഇതല്ലാതെ മറ്റു ബിസിനസ് ബന്ധങ്ങള്‍ ആരുമായും ഉണ്ടായിട്ടില്ല. എന്നെ ഉപദ്രവിച്ചവരുടെ പേരുവിവരങ്ങള്‍ അന്വേഷണ സംഘത്തോട് പറഞ്ഞിട്ടില്ല. അറസ്റ്റ് ചെയ്യപ്പെട്ടവര്‍ കുറ്റവാളികള്‍ ആണെങ്കില്‍ ശിക്ഷിക്കപ്പെടുകയും നിരപരാധികള്‍ ആണെങ്കില്‍ അവര്‍ കുറ്റവിമുക്തരായി പുറത്തുവരുകയും വേണമെന്നാണ് എന്റെ ആഗ്രഹം നടി പറഞ്ഞു.

തന്റേതെന്ന പേരില്‍ സമൂഹമാദ്ധ്യമങ്ങളില്‍ പ്രചരിക്കുന്ന വീഡിയോ വ്യാജമാണ്. തനിക്ക് ഇപ്പോള്‍ ഫേസ്ബുക്ക്, ട്വിറ്റര്‍ അക്കൗണ്ടുകള്‍ ഒന്നും തന്നെ ഇല്ലെന്നും നടി വ്യക്തമാക്കി.