അപ്പുണ്ണിയെ കിട്ടിയാല് കൂടുതല് സത്യങ്ങള് പുറത്തുവരും; ഞെട്ടിക്കുന്ന വെളിപ്പെടുത്തലുമായി ലിബര്ട്ടി ബഷീര്
നടിയെ ആക്രമിച്ച കേസില് ദിലീപിന് ജാമ്യം നിഷേധിച്ച സംഭവത്തില് പ്രതികരണവുമായി ലിബര്ട്ടി ബഷീര്. ഈ വിധിയോടെ ദിലീപ് കുറ്റക്കാരനാണെന്ന് കേരളത്തിലെ ജനങ്ങള്ക്ക് ബോധ്യമായെന്ന് ലിബര്ട്ടി ബഷീര് പറഞ്ഞു.
'ഞാനും കോടിയേരി ബാലകൃഷ്ണനും ഗൂഢാലോച നടത്തിയാണ് ദിലീപിനെ കുടുക്കിയതെന്ന് പിസി ജോര്ജ് എംഎല്എ കഴിഞ്ഞ ദിവസം പറഞ്ഞിരുന്നു. എന്നാല് ഹൈക്കോടതി വിധിയോടെ അതൊക്കെ കള്ളമാണെന്ന് ബോധ്യമായിരിക്കുകയാണ്. '
'നിഷാം കേസില് എന്ത് സംഭവിച്ചോ അതേ അവസ്ഥയാണ് ദിലീപിന്റെ കേസിലും നടക്കാന് പോകുന്നത്. കാലാകാലം ദിലീപ് ജയിലില് കിടക്കേണ്ടി വരും. കേസ് ഡയറില് നടനെതിരെയുളള കുറ്റം കൃത്യമായി എഴുതിയിട്ട് കാണും.
ഇതിലും വലിയ ക്വട്ടേഷന് നടത്താന് ഉദ്ദേശിച്ച വ്യക്തിയാണ് ദിലീപ്. ഇത് പാളിപ്പോയത് കൊണ്ടാണ് അത് നടക്കാതിരുന്നത്. അല്ലെങ്കില് ശ്രീകുമാര്, സംയുക്താ വര്മ, ഗീതു മോഹന്ദാസ് എന്നിവര്ക്കെതിരെ ആക്രമണം നടന്നേനെ. അവരൊക്കെ എന്തൊ ഭാഗ്യം കൊണ്ട് രക്ഷപ്പെട്ടതാണ്. ദിലീപിന്റെ എല്ലാക്കാര്യങ്ങളും നോക്കുന്നത് അപ്പുണ്ണിയാണ്. അപ്പുണ്ണിയെ കിട്ടിയാല് കൂടുതല് സത്യങ്ങള് പുറത്തുവരും.–ലിബര്ട്ടി ബഷീര് പറഞ്ഞു.
അതേസമയം ഗൂഢാലോചനകേസില് തെളിവില്ലെന്ന ദിലീപിന്റെ വാദം ഹൈക്കോടതി തള്ളി. ഗൂഢാലോചന നടത്തിയതിന് പ്രഥമദൃഷ്ട്യാ കൃത്യമായ തെളിവുകളുണ്ട്. പ്രതി പ്രമുഖ നടനാണ്. ജാമ്യം നല്കിയാല് സാക്ഷികളെ സ്വാധീനിച്ചേക്കാം. അപൂര്വമായ കേസുകളില് ഒന്നാണിത്.
അന്വേഷണം നിര്ണായക ഘട്ടത്തിലാണെന്നും കേസ് ഗുരുതര സ്വഭാവമുള്ളതാണെന്നും കോടതി നിരീക്ഷിച്ചു. കേസ് ഡയറി വിശദമായി വിലയിരുത്തിയതിനു ശേഷമായിരുന്നു കോടതിയുടെ നിരീക്ഷണങ്ങള്.
പ്രോസിക്യൂഷന് വാദം
സംഭവത്തിന്റെ സൂത്രധാരന് ദിലീപ് ആണെന്നായിരുന്നു പ്രോസിക്യൂഷന് വാദിച്ചത്. ഇന്ത്യന് ക്രിമിനല് നിയമചരിത്രത്തിലെ ആദ്യ ലൈംഗികാതിക്രമ ക്വട്ടേഷനാണ്. കേസില് പ്രധാന തെളിവായ ദൃശ്യം പകര്ത്തിയ മൊബൈല് ഫോണും മെമ്മറി കാര്ഡും കണ്ടെടുത്തിട്ടില്ല. ഇനിയും പ്രതികളുണ്ടാകാന് സാധ്യതയുണ്ട്. അന്വേഷണം തീര്ന്നിട്ടില്ലെന്നും ഈ ഘട്ടത്തില് ജാമ്യം നല്കരുതെന്നും പ്രോസിക്യൂഷന്സ് ഡയറക്ടര് ജനറല് ബോധിപ്പിച്ചതു കോടതി പരിഗണിച്ചു. ഇന്ത്യന് ക്രിമിനല് നിയമചരിത്രത്തിലെ ആദ്യ ലൈംഗികാതിക്രമ ക്വട്ടേഷനാണിത്. എല്ലാ മൊഴികളും വിരല് ചൂണ്ടുന്നതു ദിലീപിന്റെ പങ്കിലേക്കാണ്. ദിലീപിന്റെ പങ്ക് വ്യക്തമാക്കുന്ന തെളിവുകള് പ്രത്യേകാന്വേഷണ സംഘത്തിനു ലഭിച്ചിട്ടുണ്ടെന്നും പ്രോസിക്യൂഷന് പറഞ്ഞു.
ദിലീപിന്റെ അഭിഭാഷകന്റെ വാദം
ഗൂഢാലോചനയ്ക്കു തെളിവില്ലെന്നും രണ്ടുപേര് തമ്മില് കണ്ടാല് ഗൂഢാലോചനയാവില്ലെന്നും ദിലീപിന്റെ അഭിഭാഷകന് വാദിച്ചു. ഒട്ടേറെ കേസുകളില് പ്രതിയും ക്രിമിനലുമായ സുനില്കുമാറിന്റെ (പള്സര് സുനി) മൊഴിയുടെ അടിസ്ഥാനത്തില് ദിലീപിനെ പ്രതിചേര്ത്ത് അറസ്റ്റ് ചെയ്തതില് ന്യായീകരണമില്ല. ഉന്നതതലത്തില് ആഴമേറിയ ഗൂഢാലോചന നടത്തിയാണു ദിലീപിനെ കേസിലുള്പ്പെടുത്തിയത്. സിനിമാ ജീവിതം തകര്ക്കാനും സമൂഹമധ്യേ അപഹാസ്യനാക്കാനും ലക്ഷ്യമിട്ടാണു കേസ്.
ഒട്ടേറെ സിനിമ പ്രോജക്ടുകളില് ഒപ്പുവച്ചിട്ടുള്ള ദിലീപിനെ ഇനിയും തടവില് വയ്ക്കുന്നതു സിനിമാ ജീവിതത്തെ ബാധിക്കും. അന്തിമ കുറ്റപത്രം നല്കി ഏറെക്കാലം കഴിഞ്ഞാണു ദിലീപിനെ കേസിലുള്പ്പെടുത്തിയത്. ആദ്യം 13 മണിക്കൂര് തുടര്ച്ചയായി ചോദ്യം ചെയ്തു. അന്വേഷണവുമായി പൂര്ണമായി സഹകരിച്ചിട്ടും അറസ്റ്റ് ചെയ്തു. അറസ്റ്റ് ദിവസവും 10 മണിക്കൂര് ചോദ്യം ചെയ്തുവെന്നും വാദിച്ചു.
https://www.facebook.com/Malayalivartha
