അയല്വാസിയായ വീട്ടമ്മയെ പീഡിപ്പിച്ചെന്ന കേസില് അറസ്റ്റിലായ എം. വിന്സന്റിന്റെ മൊബൈല് ഫോണ് ഫൊറന്സിക് പരിശോധനയ്ക്ക് അയക്കും
അയല്വാസിയായ വീട്ടമ്മയെ പീഡിപ്പിച്ചെന്ന കേസില് അറസ്റ്റിലായ കോവളം എംഎല്എ എം.വിന്സന്റിന്റെ മൊബൈല് ഫോണ് ഫൊറന്സിക് പരിശോധനയ്ക്ക് അയക്കും. പരാതിക്കാരിയുമായുള്ള ഫോണ് സംഭാഷണങ്ങള് വീണ്ടെടുക്കാനാണു പൊലീസിന്റെ ശ്രമം.
സുരക്ഷാപ്രശ്നങ്ങളുള്ളതിനാല് എംഎല്എയുമായി തെളിവെടുപ്പിനില്ലെന്നു പൊലീസ് അറിയിച്ചു. എം.വിന്സന്റ് ഇന്നു വൈകിട്ടു നാലുവരെ പൊലീസ് കസ്റ്റഡിയിലാണ്. വിന്സന്റിന്റെ ജാമ്യാപേക്ഷ നെയ്യാറ്റിന്കര മജിസ്ട്രേട്ട് കോടതി തള്ളി.
അഞ്ചുദിവസം കസ്റ്റഡിയില് വേണമെന്നാണു പൊലീസ് ആവശ്യപ്പെട്ടിരുന്നതെങ്കിലും ഒരു ദിവസം മാത്രമാണ് കോടതി അനുവദിച്ചത്. അതേസമയം, തനിക്കെതിരായ കേസ് സിപിഎമ്മിന്റെ ഗൂഢാലോചനയെന്നു എം.വിന്സന്റ് പറഞ്ഞു. ഗൂഢാലോചനയ്ക്കു പിന്നില് സിപിഎം ജില്ലാ സെക്രട്ടറിയും നെയ്യാറ്റിന്കര എംഎല്എയുമാണ്. ജില്ലാ സെക്രട്ടറിയുടെ ഫോണ്വിളികള് അന്വേഷിക്കണം.
താനൊരു തെറ്റും ചെയ്തിട്ടില്ല. കേസ് നിയമപരമായി നേരിടും. നോട്ടിസ് പോലും നല്കാതെ സമീപിച്ചിട്ടും പൊലീസുമായി പൂര്ണമായി സഹകരിക്കുകയായിരുന്നു വിന്സന്റ് പറഞ്ഞു. കൂടിയ അളവില് ഉറക്കഗുളിക കഴിച്ച് അവശയായാണു വീട്ടമ്മയെ ആശുപത്രിയില് എത്തിച്ചത്. നെയ്യാറ്റിന്കര ആറാലുംമൂട്ടിലെ ആശുപത്രിയില് ചികില്സയിലായിരുന്ന വീട്ടമ്മയെ തിങ്കളാഴ്ച ബാലരാമപുരത്തെ വീട്ടിലേക്കു കൊണ്ടുവന്നപ്പോള് സമീപത്തെ സ്ത്രീകള് പ്രതിഷേധിച്ചു. എംഎല്എയെ കുടുക്കിയെന്നു കുറ്റപ്പെടുത്തിയായിരുന്നു പ്രതിഷേധം.
https://www.facebook.com/Malayalivartha
