ഭര്‍ത്താവ് ഒരു വര്‍ഷം മുമ്പെ വിവാഹമോചനം നേടി. എന്നാല്‍ ഭാര്യ അറിയുന്നത് വീട്ടില്‍ നിന്നും ഇറക്കിവിടാന്‍ ശ്രമിച്ചപ്പോള്‍. വീട്ടില്‍ നിന്നും ഇറക്കിവിടാന്‍ ശ്രമിച്ചപ്പോള്‍ എതിര്‍ത്ത ഭാര്യയെ വിവാഹമോചനം അനുവദിച്ചുകൊണ്ടുള്ള കോടതി വിധിയുടെ പകര്‍പ്പ് കാണിക്കുകയായിരുന്നു. പയ്യന്നൂര്‍ കാനായി സ്വദേശിനിയായ യുവതിയാണ് വിവാഹമോചനത്തിന്റെ ഇരയായി മാറിയത്. ഇതേ തുടര്‍ന്ന് യുവതി ഭര്‍ത്താവ് ഉദിനൂര്‍ തടിയന്‍കൊവ്വലിലെ ശ്രീജിത്തിനെതിരെ കുടുംബകോടതിയെ സമീപിച്ചു.

അഞ്ച് വയസും രണ്ട് വയസും പ്രായമുള്ള രണ്ട് മക്കളും ശ്രീജിത്തും മാതാപിതാക്കള്‍ക്കുമൊപ്പം വിവാഹം കഴിഞ്ഞ നാള്‍ മുതല്‍ യുവതി ഭര്‍തൃവീട്ടില്‍ ഒരുമിച്ചാണ് കഴിയുന്നത്. ഇടയ്ക്കിടെ ഇവര്‍ തമ്മില്‍ കുടുംബവഴക്ക് ഉണ്ടാകാറുമുണ്ട്. എന്നാല്‍ കഴിഞ്ഞ ദിവസമാണ് ഭാര്യയെ ശ്രീജിത്ത് വീട്ടില്‍ നിന്നും ഇറക്കിവിടാന്‍ ശ്രമിച്ചത്.

എന്നാല്‍ ഈ കേസുമായി ബന്ധപ്പെട്ട് ഒരു വിവരവും തനിക്കറിയില്ലെന്നും കോടതിയില്‍ നിന്നും കേസ് സംബന്ധിച്ച ഒരു സമന്‍സ്‌പോലും തനിക്ക് ലഭിച്ചിട്ടില്ലെന്നും യുവതി പറയുന്നു. തന്റെ ഭാഗം കേള്‍ക്കാതെ വിവാഹമോചന കേസില്‍ കോടതി എങ്ങനെ തീര്‍പ്പുണ്ടാക്കിയെന്നതാണ് ഇന്നും ഈ യുവതിയെ കുഴക്കുന്നത്. ഇതിന്റെ അടിസ്ഥാനത്തില്‍ കാസര്‍കോട് വനിതാ സെല്ലില്‍ ജനാധിപത്യമഹിളാ അസോസിയേഷന്‍ നേതാവും ജില്ലാ പഞ്ചായത്തംഗവുമായ സുബൈദ മുഖേന പരാതി നല്‍കി.

തുടര്‍ന്ന് ശ്രീജിത്തിനെ വിളിച്ച് സംസാരിച്ചെങ്കിലും വിവാഹമോചനത്തില്‍ നിന്നും പിന്മാറാന്‍ തയ്യാറായില്ല. ഇതേ തുടര്‍ന്ന് വിധി റദ്ദാക്കി കിട്ടണമെന്നാവശ്യപ്പെട്ട് യുവതി കോടതിയെ സമീപിച്ചിട്ടുണ്ട്. വിവാഹമോചന വിധി പ്രഖ്യാപിച്ച് അപ്പീലിനുള്ള സമയവും കഴിഞ്ഞതിന് ശേഷമാണ് ഇങ്ങനെ ഒരു വിധിയുണ്ടാക്കിയ കാര്യം ശ്രീജിത്ത് ഭാര്യയെ അറിയിച്ചത്.

ശ്രീജിത്തും മറ്റൊരു യുവതിയും തമ്മിലുള്ള അരുതാത്ത ബന്ധത്തിന്റെ ദൃശ്യം ശ്രീജിത്തിന്റെ ഫോണില്‍ കണ്ടതിനെ ചോദ്യം ചെയ്തതിനെ തുടര്‍ന്നാണ് ശ്രീജിത്തും ഭാര്യയും തമ്മിലുള്ള വഴക്ക് ഉടലെടുത്തത്. എന്നാല്‍ ഭാര്യ അറിയാതെ ഇയാള്‍ എങ്ങനെ വിവാഹമോചന വിധി ഉണ്ടാക്കിയെന്നാണ് ആര്‍ക്കും അറിയാത്തത്. എന്നാല്‍ കൃത്യമായി കോടതിയില്‍ കേസ് വിളിച്ചപ്പോള്‍ താന്‍ ഹാജരാകുകയും തുടര്‍ന്ന് എക്‌സ്പാര്‍ട്ടി വിധി ഉണ്ടായതാണെന്നും ശ്രീജിത്ത് പറയുന്നു.

കോടതിയില്‍ കേസ് നടക്കുമ്പോഴും വിധി വന്നപ്പോഴും ഇപ്പോഴും ഭാര്യയോടൊപ്പം തന്നെയാണ് ശ്രീജിത്ത് കഴിയുന്നത്. വീട്ടില്‍ നിന്നും ഇറങ്ങിപ്പോകാന്‍ ദിവസവും ആവശ്യപ്പെടുന്നുണ്ടെങ്കിലും മരുമകളെയും കൊച്ചുമക്കളെയും കൈവിടാന്‍ ശ്രീജിത്തിന്റെ മാതാപിതാക്കള്‍ തയ്യാറല്ല. തങ്ങളുടെ മരുമകള്‍ ഒരു തെറ്റും ചെയ്തിട്ടില്ലെന്നും അവരെ പറഞ്ഞുവിടില്ലെന്നുമാണ് ശ്രീജിത്തിന്റെ മാതാപിതാക്കള്‍ പറയുന്നത്.