ചെറായി ബീച്ചില്‍ നാട്ടുകാര്‍ നോക്കി നില്‍ക്കേ യുവതി യുവാവ് കുത്തിക്കൊന്നു. വരാപ്പുഴ സ്വദേശി ശീതള്‍ (30) ആണ് മരിച്ചത്. സമീപത്തെ ഒരു പി.എസ്.സി കോച്ചിംഗ് സ്ഥാപനത്തില്‍ വന്ന യുവതി പിന്നീട് യുവാവിനൊപ്പം ബീച്ചില്‍ എത്തുകയായിരുന്നു. ഇവര്‍ തമ്മിലുണ്ടായ വാക്കുതര്‍ക്കത്തിനിടെയാണ് യുവതിക്ക് കുത്തേറ്റത്. സംഭവത്തില്‍ കോട്ടയം സ്വദേശി പ്രശാന്തിനെ പോലീസ് കസ്റ്റഡിയില്‍ എടുത്തു.

വെള്ളിയാഴ്ച രാവിലെ 10.30 ഓടെയാണ് സംഭവം. യുവതിക്ക് ആറു തവണ കുത്തേറ്റിട്ടുണ്ട്. ആക്രമണത്തിനു ശേഷം ഓടിരക്ഷപ്പെട്ട യുവാവിനെ പിന്നീട് കസ്റ്റഡിയില്‍ എടുക്കുകയായിരുന്നു. കുത്തേറ്റ ശീതള്‍ സമീപത്തെ സ്വകാര്യ റിസോർട്ടിൽ ഓടിക്കയറി രക്ഷിക്കണമെന്ന് അഭ്യർത്ഥിച്ചു. ഇവിടുത്തെ ജീവനക്കാരാണ് യുവതിയെ ആശുപത്രിയില്‍ എത്തിച്ചത്.

ആദ്യം ചെറായിലെ സ്വകാര്യ ആശുപത്രിയില്‍ എത്തിച്ചുവെങ്കിലും മുറിവുകള്‍ ഗുരുതരമായതിനാല്‍ എറണാകുളത്തെ സ്വകാര്യ ആശുപത്രിയിലേക്ക് കൊണ്ടുപോയി. എങ്കിലും മരണം സംഭവിച്ചിരുന്നു. പ്രണയ നൈരാശ്യത്തെ തുടർന്നാണ് യുവാവ് കോട്ടയം സ്വദേശിയായ യുവാവ് ശീതളിനെ കുത്തികൊന്നതെന്നാണ് റിപ്പോർട്ടുകൾ.