'ദേവക്ഷേത്രത്തില് അസുരപ്രതിമ വേണ്ട';മഹാബലി പ്രതിമയ്ക്ക് ഭീഷണിയുമായി ഹിന്ദുഐക്യവേദി; ഓണം വാമനജയന്തിയെന്ന് ആവര്ത്തിച്ച് സംഘപരിവാര്
തിരുവോണമടുത്തതോടെ മഹാബലി വീണ്ടും വിവാദത്തില്. തൃക്കാക്കര വാമനക്ഷേത്രത്തില് മഹാബലിയുടെ പ്രതിമ സ്ഥാപിക്കുന്നതിനെതിരേ ഹിന്ദു ഐക്യവേദി പ്രതിഷേധവുമായി രംഗത്ത്. ഒരു കോടി രൂപയോളം ചെലവഴിച്ചാണ് പ്രതിമ നിര്മ്മിക്കുന്നത്.
കൊച്ചിന് ദേവസ്വം ബോര്ഡിനു കീഴിലുള്ള ക്ഷേത്രത്തില് മഹാബലിയുടെ സ്മൃതിമണ്ഡപം സ്ഥാപിക്കുന്നത് നിര്ത്തിവയ്ക്കണന്നും അസുരനായ മഹാബലി ദേവഗണത്തില് പെടുന്ന വാമനമൂര്ത്തിയുടെ ക്ഷേത്രത്തില് പാടില്ലെന്നുമാണു ഹിന്ദു ഐക്യവേദിയുടെ നിലപാട്. സ്മൃതി മണ്ഡപ നിര്മ്മാണത്തിനെതിരെ ഹിന്ദു ഐക്യവേദി നിലപാട് സ്വീകരിക്കുന്നതായി റിപ്പോര്ട്ട് ചെയ്യുന്നു.
മലയാളികള് മഹാബലിയെ ആരാധിക്കുന്നതിനോ ഓണം ആഘോഷിക്കുന്നതിനോ ഞങ്ങള് എതിരല്ല. എന്നിരുന്നാലും, വാമന മൂര്ത്തിയുടെ ഏക ക്ഷേത്രമായ ഇവിടെ മഹാബലിയുടെ പ്രതിമ സ്ഥാപിക്കുന്നത് എന്തിനാണ്? തൃക്കാക്കര മുനിസിപ്പാലിറ്റിയിലോ കളമശ്ശേരി മുനിസിപ്പാലിറ്റിലോ പ്രതിമ സ്ഥാപിക്കാമല്ലോ എന്തിനാണ് ക്ഷേത്രത്തിന്റെ പ്രവേശന കവാടത്തിനരിക്കില് ഇത് സ്ഥാപിക്കുന്നതെന്തിനാണ്.
ഇ. എസ്. ബിജു, ഹിന്ദു ഐക്യ വേദി ജനറല് സെക്രട്ടറി
ഇക്കാര്യമുന്നയിച്ചു നല്കിയ ഹര്ജിയില്, ഇത് ആചാരങ്ങളുടെ ലംഘനമാണെന്ന ഹിന്ദു ഐക്യവേദിയുടെ നിലപാടിനോടു യോജിക്കാനാകില്ലെന്നും മഹാബലിയുടെ പ്രതിമ സ്ഥാപിക്കുന്നതു ദേവസ്വംബോര്ഡ് വിലയ്ക്കു വാങ്ങിയ സ്ഥലത്താണെന്നും ഹൈക്കോടതിയില് വിശദീകരിച്ചിരുന്നു. പ്രതിമ സ്ഥാപിക്കുന്നത് ഹിന്ദുഐക്യവേദി എതിര്ക്കുന്നതിനാല് പൊലീസ് ഇടപെടണമെന്നും ദേവസ്വം ബോര്ഡ് കോടതിയില് ആവശ്യപ്പെട്ടിരുന്നു. ക്രമസമാധാന പ്രശ്നങ്ങള് ഉണ്ടായാല് പൊലീസ് നടപടി സ്വീകരിക്കണമെന്ന് കോടതി നിര്ദേശിച്ചിട്ടുണ്ട്. മഹാബലിയുടെ പ്രതിമ നിര്മ്മാണം ആരംഭിച്ചതായി ദേവസ്വം ബോര്ഡ് പ്രസിഡന്റ് പ്രയാര് ഗോപാലകൃഷ്ണന് പറഞ്ഞു.
വാമനനെയും മഹാബലിയെയും ഒരേ പ്രാധാന്യത്തോടെ സ്വീകരിക്കുന്ന ചിന്താധാരയാണ് ദേവസ്വം ബോര്ഡിന്റേത്. ദേവസ്വം ബോര്ഡിന്റെ ഭരണത്തിനു കീഴിലുള്ള തൃക്കാക്കര ക്ഷേത്രത്തില് വാമനാവതാരം അസുര രാജാവായ മഹാബലിയെ ചവിട്ടിതാഴ്ത്തുന്ന രൂപത്തിലുള്ള വിഗ്രഹമാണ് നിര്മ്മിക്കുന്നത്.
പ്രയാര് ഗോപാലകൃഷ്ണന്, ദേവസ്വം ബോര്ഡ് പ്രസിഡന്റ്
തിരുവോണം മഹാബലിയുടെ ഓര്മ്മ പുതുക്കുന്ന ഉത്സവമല്ലെന്നും വാമനജയന്തിയാണെന്നുമാണു സംഘപരിവാറിന്റെ പ്രചാരണം. ആര്.എസ്.എസിന്റെ മുഖമാസികയായ കേസരിയില് ഓണം വാമനജയന്തിയാണെന്നു ലേഖനവും പ്രസിദ്ധീകരിച്ചു. ഹിന്ദു ഐക്യവേദി നേതാവ് കെ.പി. ശശികലയും ഇതേ നിലപാടുമായി രംഗത്തുവന്നിരുന്നു. ഇതിന്റെ തുടര്ച്ചയെന്ന നിലയിലാണിപ്പോള് തൃക്കാക്കരയിലെ ക്ഷേത്രത്തില് മഹാബലിയുടെ സ്മൃതിമണ്ഡപം സ്ഥാപിക്കുന്നതിനെതിരേ ഐക്യവേദി രംഗത്തുവന്നതെന്നാണു ദലിത് സംഘടനാ പ്രവര്ത്തകരുടെ നിരീക്ഷണം.
https://www.facebook.com/Malayalivartha
