സിബിഐ കുറ്റപത്രം കോടതിയില്‍ സമര്‍പ്പിക്കപ്പെട്ടതോടെ പി.ജയരാജന്റെ രാഷ്ട്രീയ ജീവിതം തുലാസിലായി. തെളിയിക്കപ്പെടാത്ത അഴിമതി ആരോപണത്തിന്റെ പേരില്‍ മന്ത്രി സ്ഥാനം രാജിവയ്‌ക്കേണ്ടി വന്ന ഇ.പി.ജയരാജന്റെ ശാപമാണോ പി.ജയരാജനുമേല്‍ വന്നു ഭവിച്ചതെന്നാണ് രാഷ്ട്രീയ കേരളം കൗതുകത്തോടെ ചോദിക്കുന്നത്.

കതിരൂര്‍ മനോജ് വധക്കേസ് ഇല്ലാതിരുന്നെങ്കില്‍ പി.ജയരാജന്‍ പിണറായി വിജയന്‍ മന്ത്രിസഭയില്‍ വ്യവസായ മന്ത്രി ആയേനെ. അങ്ങനെയാണ് ഇ.പി.മന്ത്രിയായത്. മുഖ്യമന്ത്രിയുടെ വിശ്വസ്തനാണ് പി.ജയരാജന്‍. സുഖദു:ഖങ്ങളില്‍ പിണറായിക്കൊപ്പം ഉറച്ചുനിന്ന വ്യക്തിത്വമാണ് അദ്ദേഹത്തിന്റേത്. കണ്ണൂരിലെ മുന്നു ജയരാജന്‍മാര്‍ എക്കാലവും വാര്‍ത്തയില്‍ നിറഞ്ഞിരുന്നു.

കതിരൂര്‍ മനോജ് വധക്കേസില്‍ യു എപിഎ ചുമത്താനുള്ള കുറ്റം അദ്ദേഹം ചെയ്തിട്ടുണ്ടോ എന്ന് തീരുമാനിക്കേണ്ടത് കോടതിയാണ്. സി ബി ഐ കുറ്റപത്രം ആര്‍ എസ് എസിന്റെ ദാസ്യവേലയാണെന്നാണ് സി പി എം പറയുന്നത്. ഇത് ഏറെക്കുറെ ശരിയുമാണ്. കാരണം സിബിഐ മന്‍മോഹന്‍ സര്‍ക്കാരിന്റെ കാലത്ത് പ്രവര്‍ത്തിച്ചതു പോലെയല്ല ഇപ്പോള്‍ പ്രവര്‍ത്തിക്കുന്നത്. സി ബി ഐ കൂട്ടിലിട്ട തത്തയാണെന്ന് കോടതി പറഞ്ഞത് വെറുതെയല്ലെന്ന് തെളിയിക്കുന്ന തരത്തിലാണ് അവരുടെ നീക്കങ്ങള്‍.

കേന്ദ്ര ആഭ്യന്തര മന്ത്രി നേരിട്ട് ഇടപെട്ടാണ് മനോജ് വധക്കേസ് സി ബി ഐ യെ കൊണ്ട് ഏറ്റെടുപ്പിച്ചത്. ആര്‍ എസ് എസ് നേതാവ് രാംമാധവ് കണ്ണൂരെത്തി സി പി എം നേതാക്കളെ പ്രതിചേര്‍ക്കുമെന്ന് പ്രഖ്യാപിക്കുകയും ചെയ്തു.

പി.ജയരാജനെ പ്രതിചേര്‍ക്കുമെങ്കില്‍ അദ്ദേഹത്തെ ശിക്ഷിക്കാനും സിബിഐക്ക് അറിയാം. രാഷ്ട്രീയ കുതന്ത്രങ്ങള്‍ക്ക് കേന്ദ്ര സര്‍ക്കാരിനെ ആരും പഠിപ്പിക്കേണ്ടതില്ല. എന്നാല്‍ പി ജയരാജനെ പ്രതി ചേര്‍ത്തിട്ടും ഇ.പി.ജയരാജന്‍ ഒന്നും പ്രതികരിക്കാത്തതിലാണ് രാഷ്ട്രീയ കേരളത്തിനു അത്ഭുതം. സി പി എം ചട്ടക്കൂട്ടില്‍ വിള്ളല്‍ വീണു എന്നതിന്റെ തെളിവാണ് ഇത്. താന്‍ പ്രതിസന്ധിയിലായപ്പോള്‍ തന്നെ സഹായിക്കണമെന്ന് ഇ.പി, പി.ജയരാജനോട് ആവശ്യപ്പെട്ടിരുന്നു എന്ന് കേള്‍ക്കുന്നുണ്ട്. എന്നാല്‍ സഹായിച്ചില്ലെന്ന് മാത്രമല്ല ദ്രോഹിക്കുകയും ചെയ്തു. ഇതില്‍ ശ്രീമതിയും ഇ പി യും ഉള്‍പ്പെടെയുള്ള കണ്ണൂര്‍ ടീം പി.ജയരാജനും മുഖ്യമന്ത്രിക്കും എതിരായി. പാര്‍ട്ടി ഇ പി ക്കൊപ്പം നില്‍ക്കാത്തതാണ് അദ്ദേഹത്തിന് വിനയായത്. കണ്ണൂര്‍ ഘടകം തനിക്കൊപ്പം നിന്നിരുന്നെങ്കില്‍ രാജിവയ്‌ക്കേണ്ടി വരില്ലായിരുന്നു എന്നാണ് ഇ.പി ഇന്നും വിശ്വസിക്കുന്നത്.

അപ്പോള്‍ പി. ജയരാജന്റെ പതനം ഇ.പിയെ ആഹ്ലാദ ചിത്തനാക്കും. തനിക്ക് വന്നത് പി.ജയരാജനും വന്നല്ലോ എന്നതായിരിക്കും സന്തോഷ കാരണം.