ദിലീപിനെ രക്ഷിക്കാന്‍ മോഡിയുടെ സഹായം വരുമോ. നടക്കുന്നത് കടുത്ത അനീതിയും മനുഷ്യാവകാശ ലംഘനവുമെന്ന് പരാതി. ദിലീപിന്റെ റിമാന്റ് കാലാവധി നീട്ടിക്കൊണ്ടു പോവുന്നതില്‍ ദുരൂഹതയുണ്ടെന്നും ദിലീപിനെതിരെ ആലുവ പോലീസ് ക്ലബിലെ കാവല്‍കാരനായ പൊലീസുകാരന്‍ നല്‍കിയ സാക്ഷിമൊഴി വിശ്വാസ്യ യോഗ്യമല്ലെന്നും ചൂണ്ടിക്കാട്ടിയാണ് സലിം പ്രധാനമന്ത്രിയ്ക്ക് സന്ദേശം അയച്ചത്. .
ദിലീപിനെതിരെ ആലുവ പോലീസ് ക്ലബിലെ പോലീസ് ഉദ്യോഗസ്ഥന്‍ നല്‍കിയ മൊഴി വിശ്വാസ യോഗ്യമല്ലെന്നാണ് സലിം സന്ദേശത്തില്‍ പറയുന്നത്. ദിലീപിന്റെ ജാമ്യാപേക്ഷ തള്ളുന്നതിന് പ്രധാന കാരണമായത് പോലീസുകാരന്റെ മാപ്പപേക്ഷയില്‍ പറഞ്ഞ കാര്യങ്ങളായിരുന്നു.
നടിയെ ആക്രമിച്ച കേസില്‍ ദിലീപിന് ഹൈക്കോടതി രണ്ടാമതും ജാമ്യം നിഷേധിച്ച സാഹചര്യത്തില്‍ പ്രധാനമന്ത്രിയുടെ ഇടപെടല്‍ ആവശ്യപ്പെട്ട് ഫെഫ്ക അംഗവും ചലച്ചിത്ര പ്രവര്‍ത്തകനുമായ സലിം ഇന്ത്യ പ്രധാനമന്ത്രിക്ക് ഫാക്‌സ് സന്ദേശം അയച്ചു. 
ദിലീപിന്റെ എല്ലാം മനുഷ്യാവകാശങ്ങളും ലംഘിക്കപ്പെട്ടിരിക്കുന്നുവെന്നും ഈ വിഷയത്തില്‍ പ്രധാനമന്ത്രിയുടെ അടിയന്തിര ശ്രദ്ധ പതിയേണ്ടതുണ്ടെന്നും സലിം പത്രക്കുറിപ്പില്‍ വ്യക്തമാക്കി. 
അറസ്റ്റിലായതിനു പിന്നാലെ ആലുവ പോലീസ് ക്ലബില്‍ കൊണ്ടുവന്നപ്പോള്‍ പള്‍സര്‍ സുനി തന്റെ മൊബൈലില്‍ നിന്ന് ദിലീപിനെയും കാവ്യയെയും വിളിച്ചുവെന്നാണ് പോലീസ് ഉദ്യോഗസ്ഥന്റെ മൊഴി. ആദ്യം ഇക്കാര്യം മറച്ചുവച്ച ഉദ്യോഗസ്ഥന്‍ പിന്നീട് മാപ്പപേക്ഷയില്‍ എല്ലാം വെളിപ്പെടുത്തുകയായിരുന്നു. 
അന്വേഷണസംഘത്തിന്റെ ഈ കള്ളനും പൊലീസുംകളിയില്‍ ഒരു സാദാരണപൗരന് സംശയം തോന്നത്തക്കതായി പലതുമുണ്ട്. കേസന്വേഷണത്തിന്റെ അങ്ങേത്തലയ്ക്കല്‍ ഒരു കള്ളന്‍! ഇങ്ങേത്തലയ്ക്കല്‍ ഒരു പൊലീസ്! പ്രഥമവിവരറിപ്പോര്‍ട്ടില്‍ ആക്രമിക്കപ്പെട്ട നടിയുടെ മൊഴിയില്‍ ദിലീപിനെതിരെ ഒരു സൂചനപോലും ഇല്ലാതിരിക്കെയാണ് കുപ്രസിദ്ധനായ ഒന്നാം പ്രതിയുടെ വെളിപ്പെടുത്തലിനെ അടിസ്ഥാനമാക്കി കഴിഞ്ഞ 53 ദിവസമായി ദിലീപ് ജയിലില്‍ കഴിഞ്ഞുവരുന്നത്. ആലുവയിലെ കോണ്‍സ്റ്റബിളിന്റെ വെളിപ്പെടുത്തല്‍ സംഭവത്തിന്റെ നിജസ്ഥിതയെക്കാള്‍ ദുരൂഹത വര്‍ദ്ധിപ്പിക്കുന്നതാണ്. മാന്യമായി ജീവിക്കാനുള്ള ദിലീപ് എന്ന പൗരന്റെ എല്ലാ അവകാശങ്ങളും ഇവിടെ നിഷേധിക്കപ്പെട്ടിരിക്കുന്നു. –സലിം ഇന്ത്യ പത്രക്കുറിപ്പില്‍ പറയുന്നു. 
ഇതേ ആവശ്യം ഉന്നയിച്ച് സലീം ഇന്ത്യ സംസ്ഥാന മനുഷ്യാവകാശ കമ്മീഷനില്‍ നല്‍കിയ ഹജര്‍ജിയില്‍ മനുഷ്യാവകാശ കമ്മീഷന്‍ അംഗം കെ. മോഹന്‍ കുമാര്‍ ആലുവ റൂറല്‍ എസ്.പിയോടും ഹര്‍ജിക്കാരനായ സലീം ഇന്ത്യയോടും വിശദീകരണം തേടിയിട്ടുണ്ട്.