ഫീസ് ഇളവുള്ളവരുടെ പട്ടിക പ്രസിദ്ധീകരിച്ചില്ല നിര്ധന വിദ്യാര്ഥികളുടെ മെഡിക്കല് പഠനം അനിശ്ചിതത്വത്തില്
മെഡിക്കല് പ്രവേശനം നേടിയ വിദ്യാര്ഥികളുടെ ബി.പി.എല്, എസ്.ഇ.ബി.സി വിദ്യാര്ഥികളുടെ പട്ടിക പ്രസിദ്ധീകരിക്കാത്തത് നൂറുകണക്കിന് വിദ്യാര്ഥികളുടെ തുടര്പഠനം അനിശ്ചിതത്വത്തിലാക്കി. കഴിഞ്ഞ വര്ഷം സ്വാശ്രയ മെഡിക്കല് കോളജുകളിലെ ഫീസ് ഇളവുള്ള 20 ശതമാനം സീറ്റുകളില് പ്രവേശനം നേടിയവരുടെ പട്ടിക പ്രവേശന പരീക്ഷ കമീഷണറേറ്റ് പ്രസിദ്ധീകരിക്കാത്തതാണ് പ്രശ്നം.
പട്ടിക കോളജുകള്ക്ക് കൈമാറിയാല് മാത്രമേ ഈ വിദ്യാര്ഥികള്ക്ക് ഫീസ് ഇളവ് അനുവദിക്കുകയുള്ളൂ. പ്രവേശന പരീക്ഷ കമീഷണറേറ്റിന്റെ നടപടി അനിശ്ചിതമായി വൈകിയതോടെ ഈ വിദ്യാര്ഥികളോട് ഈ വര്ഷം ഉയര്ന്ന ഫീസ് അടയ്ക്കാന് കോളജുകള് നിര്ദേശം നല്കിയിട്ടുണ്ട്. ഫീസ് അടച്ചില്ലെങ്കില് പഠനം തുടരാനാകില്ലെന്ന് മുന്നറിയിപ്പും നല്കിയിട്ടുണ്ട്.
കഴിഞ്ഞ വര്ഷം സര്ക്കാറുമായി കരാര് ഒപ്പിട്ട 17 സ്വാശ്രയ മെഡിക്കല് കോളജുകളിലെ 20 ശതമാനം വീതം സീറ്റുകളിലെ വിദ്യാര്ഥികള്ക്കാണ് ഫീസ് ഇളവിന് അര്ഹതയുള്ളത്. ഇവര്ക്ക് വാര്ഷിക ഫീസ് സര്ക്കാര് മെഡിക്കല് കോളജുകളിലേതിന് തുല്യമായി 25,000 രൂപയാണ്. എന്നാല്, പ്രവേശന സമയത്ത് ഇവരോട് 2.5 ലക്ഷം രൂപയാണ് വാങ്ങിയിട്ടുള്ളത്.
അര്ഹതയുള്ള ബി.പി.എല്, എസ്.ഇ.ബി.സി വിദ്യാര്ഥികളുടെ പട്ടിക പ്രവേശന പരീക്ഷ കമീഷണര് നല്കുന്നതോടെ അധികം വാങ്ങിയ തുക രണ്ടാം വര്ഷത്തെ ഫീസിലേക്ക് അഡ്ജസ്റ്റ് ചെയ്യുകയും ബാക്കി തുക തിരികെ നല്കുകയുമാണ് കോളജുകളുടെ രീതി.
കഴിഞ്ഞ വര്ഷം പ്രവേശനം നേടിയവരില് ഫീസ് ഇളവിന് അര്ഹതയുള്ളവരുടെ പട്ടിക നല്കാതായതോടെ ഈ വര്ഷത്തെ ഫീസായി 2.5 ലക്ഷം രൂപ ഉടന് അടയ്ക്കാനാണ് കോളജുകള് നിര്ദേശിച്ചിരിക്കുന്നത്. ഈ വിഭാഗത്തില് പ്രവേശനം നേടിയത് നിര്ധന വിദ്യാര്ഥികളാണ്. ആദ്യ വര്ഷം വായ്പയെടുത്തും കടംവാങ്ങിയുമാണ് ഇവരില് മിക്കവരും 2.5 ലക്ഷം രൂപ ഫീസായി ഒടുക്കിയത്.
ഇതില് രണ്ടു വര്ഷത്തെ ഫീസ് എടുത്ത് ബാക്കി തുക തിരികെ നല്കേണ്ടതാണ്. പരീക്ഷ കമീഷണറേറ്റ് കഴിഞ്ഞ വര്ഷങ്ങളില് ജൂലൈ അവസാനത്തിലോ ആഗസ്റ്റ് ആദ്യവാരത്തിലോ പട്ടിക പ്രസിദ്ധീകരിക്കാറുണ്ട്. എന്നാല്, ഇത്തവണ സെപ്റ്റംബര് ആദ്യവാരം പിന്നിട്ടിട്ടും പട്ടിക ലഭിക്കാതായതോടെയാണ് നിര്ധന വിദ്യാര്ഥികളില്നിന്ന് കോളജുകള് ഉയര്ന്ന ഫീസ് ഈടാക്കാന് കോളജുകള് സമ്മര്ദം ആരംഭിച്ചത്.
ഫീസ് അടച്ചില്ലെങ്കില് പിഴ ചുമത്തുമെന്നാണ് കോളജുകളുടെ ഭീഷണി. പുറത്താക്കുമെന്ന ഭീഷണി വരെ ചില കോളജുകള് ഉയര്ത്തിയിട്ടുണ്ട്. 100 സീറ്റുകളില് 20 സീറ്റുകളിലേക്കാണ് ഫീസ് ഇളവ് നല്കിയിരുന്നത്. ഇതില് ഏഴ് സീറ്റുകള് ബി.പി.എല് വിദ്യാര്ഥികള്ക്കും 13 സീറ്റുകള് എസ്.ഇ.ബി.സി വിദ്യാര്ഥികള്ക്കുമാണ് നീക്കിവെച്ചിരുന്നത്.
https://www.facebook.com/Malayalivartha
