ഇന്ത്യയിലെ ഏറ്റവും പ്രായമുള്ള ടെസ്റ്റ് ക്രിക്കറ്റ് താരവും ഇതിഹാസവുമായ സിഡി ഗോപിനാഥ് അന്തരിച്ചു. 96ാം വയസിലാണ് അന്ത്യം. ചെന്നൈയിൽ വച്ചാണ് അന്ത്യം സംഭവിച്ചത്. ‌ഒരു ടെസ്റ്റ് പോരാട്ടം ചരിത്രത്തിലാദ്യമായി ഇന്ത്യ വിജയിച്ചപ്പോൾ അന്ന് ടീമിൽ കളിച്ച താരങ്ങളിലെ അവസാന കണ്ണിയാണ് ഓർമയായത്. ഇന്ത്യയുടെ ക്രിക്കറ്റ് ചരിത്രത്തിലെ സുപ്രധാന അധ്യായത്തിലെ അവസാന താരമായിരുന്നു.

1952ൽ ചെന്നൈയിൽ ഇംഗ്ലണ്ടിനെതിരെയാണ് ഇന്ത്യയുടെ ചരിത്രത്തിലെ ആദ്യ ടെസ്റ്റ് ക്രിക്കറ്റ് വിജയം. ഇന്ത്യക്കായി 8 ടെസ്റ്റുകളാണ് അദ്ദേഹം കളിച്ചത്. 242 റൺസും നേടി. ഒരു അർധ സെഞ്ച്വറിയും നേടിയിട്ടുണ്ട്.
ഇന്ത്യയുടെ ആഭ്യന്തര ക്രിക്കറ്റ് ചരിത്രത്തിലെ അതുല്യ പ്രതിഭകളിൽ ഒരാൾ കൂടിയാണ്. അന്നത്തെ മദ്രാസിനെയാണ് അദ്ദേഹം പ്രതിനിധീകരിച്ചത്. 83 ആഭ്യന്തര മത്സരങ്ങളിൽ നിന്നു 4259 റൺസ് നേടി. 9 സെഞ്ച്വറികളും നേടിയിട്ടുണ്ട്.

ബെർട് സട്ക്ലിഫും ജോൺ റീഡും അടങ്ങിയ ന്യൂസിലൻഡ് ടീമിനെതിരെ സൗത്ത് സോണിനായി നേടിയ സെഞ്ച്വറിയാണ് അദ്ദേഹത്തിന്റെ ഏറ്റവും മികച്ച ബാറ്റിങ് പ്രകടനമായുള്ളത്. ആ പോരാട്ടത്തിൽ അദ്ദേഹം 175 റൺസാണ് അടിച്ചെടുത്തത്.

കളിയിൽ നിന്നു വിരമിച്ച ശേഷം ഇന്ത്യൻ ക്രിക്കറ്റിന്റെ ഭരണ സംവിധാനത്തിലേക്കും എത്തി. ചീഫ് സെലക്ടറായും പിന്നീട് ഇന്ത്യൻ ടീം പരിശീലകനായും അദ്ദേഹം സേവനം ചെയ്തിട്ടുണ്ട്. 1979ൽ ഇംഗ്ലണ്ടിലേക്ക് പര്യടനം നടത്തിയ ഇന്ത്യൻ ടീമിന്റെ കോച്ച് അദ്ദേഹമായിരുന്നു.