വിനോദസഞ്ചാരത്തിനിടെ കാണാതായ പാലക്കാട് സ്വദേശി ശ്രീനന്ദയുടെ മരണത്തില്‍ ദുരൂഹത ആരോപിച്ച് കുടുംബം. കര്‍ണാടകയിലെ ചിക്കമഗളൂരുവില്‍ ശ്രീനന്ദയെ കാണാതായ സമയത്തു തന്നെ മൃതദേഹം കണ്ടെത്തിയ സ്ഥലം പൊലീസടക്കം പരിശോധിച്ചിരുന്നുവെന്നു വല്യച്ഛന്‍ ശശിധരന്‍ പറഞ്ഞു.

അപ്പോള്‍ കണ്ടെത്താന്‍ കഴിയാത്ത മൃതദേഹം ഇപ്പോള്‍ കണ്ടെത്തിയതില്‍ ദുരൂഹതയുണ്ട്. കുട്ടിയെ കാണാതായിട്ടു നാലുദിവസമായെങ്കിലും മൃതദേഹത്തിന് അത്രയും പഴക്കമില്ലെന്നും ശശിധരന്‍ വിശദീകരിച്ചു. മാണിക്കധാര വെള്ളച്ചാട്ടത്തില്‍ നിന്ന് കയറിവരുന്നയിടത്താണ് വാഹനം പാര്‍ക്ക് ചെയ്തിരുന്നത്. മൃതദേഹം മറുവശത്തായിരുന്നു. എന്നാല്‍ ഇവിടേക്ക് ശ്രീനന്ദ പോയിട്ടില്ലെന്നും, കാണാതായത് വ്യൂപോയിന്റില്‍ നിന്നാണെന്നും അദ്ദേഹം പറഞ്ഞു. പൊലീസ് നായ മണംപിടിച്ചെത്തിയത് ഒരു കടയുടെ അടുത്തേക്കാണ്. കടയുടമയെ പൊലീസ് ചോദ്യം ചെയ്തില്ല. പ്രദേശവാസികളില്‍നിന്നു വിവരം തേടിയില്ലെന്നും കുടുംബം ആരോപിക്കുന്നു.

പാലക്കാട് കടമ്പഴിപ്പുറം കൂത്തറ വീട്ടില്‍ രമേഷിന്റെയും രോഹിണിയുടെയും മകളാണ് ശ്രീനന്ദ. ചിക്കമഗളൂരുവിലെ ബാബാബുഡാന്‍ ഗിരികുന്നിലെ മാണിക്കധാര വെള്ളച്ചാട്ടം കാണാനാണ് ഈമാസം 4നു പെണ്‍കുട്ടിയുടെ കുടുംബം ഉള്‍പ്പെടെ 40 പേര്‍ അടങ്ങിയ സംഘം യാത്ര ആരംഭിച്ചത്.