നടി ആക്രമിക്കപ്പെട്ടതിന്റെ ഗൂഢാലോചനക്കേസില്‍ ജയിലില്‍ കഴിയുന്ന നടന്‍ ദിലീപിന് അനുകൂലമായി ചലച്ചിത്ര മേഖലയില്‍ സമ്മര്‍ദം കനക്കുന്നതിനെതിരെ മുഖ്യമന്ത്രിയും പാര്‍ട്ടിയും നിലപാട് കര്‍ശനമാക്കുന്നു. ബാഹ്യ സമ്മര്‍ദത്തിന് വഴങ്ങേണ്ടെന്ന നിലപാടിലാണ് സര്‍ക്കാരും സി.പി.എം നേതൃത്വവും സ്വീകരിച്ചിരിക്കുന്നത്. കേസില്‍ ഇതുവരെ നടന്ന സംഭവവികാസങ്ങള്‍ സൃഷ്ടിച്ച പ്രതിച്ഛായക്ക് ഭംഗം വരുത്തുന്നതൊന്നും പാടില്ലെന്ന ധാരണയാണ് സി.പി.എം നേതൃത്വത്തിലുള്ളത്. സര്‍ക്കാരിന്റെ ഒരു തരത്തിലുള്ള ഇടപെടലും ഉണ്ടാവില്ലെന്ന സന്ദേശം മുഖ്യമന്ത്രി ഇടത് ജനപ്രതിനിധികള്‍ക്കടക്കം നല്‍കിക്കഴിഞ്ഞു.

നടന്‍ ദിലീപിനെ ജയിലില്‍ സന്ദര്‍ശിച്ച നടനും ഇടത് എം.എല്‍.എയുമായ കെ.ബി. ഗണേശ് കുമാര്‍ ദിലീപിന് അനുകൂലമായി നടത്തിയ പരസ്യ പ്രതികരണത്തിനെതിരെ സി.പി.എം, ഇടത് അണികളില്‍ നിന്ന് രൂക്ഷ വിമര്‍ശനമാണ് സമൂഹ മാദ്ധ്യമങ്ങളിലടക്കം ഉയരുന്നത്. 

അതേ സമയം, കേസില്‍ പോലീസിന് തെറ്റ് പറ്റിയെങ്കില്‍ മുഖ്യമന്ത്രി ഇടപെട്ട് തിരുത്തിക്കണമെന്ന ഗണേശിന്റെ പരസ്യ പ്രസ്താവന കേസന്വേഷണത്തില്‍ മുഖ്യമന്ത്രി ഇടപെടണമെന്ന സൂചനയായി വ്യാഖ്യാനിക്കപ്പെടുന്നു. ഗണേശിനെ രൂക്ഷമായി വിമര്‍ശിച്ച് മുതിര്‍ന്ന സി.പി.ഐ നേതാവ് പന്ന്യന്‍ രവീന്ദ്രന്‍ രംഗത്തെത്തി. എന്നാല്‍ ,കൂടുതല്‍ വിവാദങ്ങള്‍ ഇതേച്ചൊല്ലി മുന്നണിയില്‍ ഉണ്ടാവാത്തത്, പതിവില്‍ കവിഞ്ഞ ഗൗരവം അതിന് വേണ്ടെന്ന ധാരണയിലാണ്.

നടന്‍ ശ്രീനിവാസന്‍ നടത്തിയ പ്രസ്ഥാവനും ഏറെ വിവാദമായിരുന്നു. താന്‍ വിശ്വസിക്കുന്ന ദിലീപ് അങ്ങനെ ചെയ്യില്ലെന്നാണ് ശ്രീനിവാസന്‍ പറഞ്ഞത്. ഇതിനെതിരെ നടന്റെ വീട്ടില്‍ കരിയോയില്‍ ഒഴിക്കുകയും ചെയ്തിരുന്നു.

ആക്രമിക്കപ്പെട്ട നടിക്കെതിരെ പരാമര്‍ശം നടത്തിയ പി.സി. ജോര്‍ജ് എം.എല്‍.എയ്‌ക്കെതിരായ കേസിലും നിയമം നിയമത്തിന്റെ വഴിക്കെന്ന സന്ദേശമാണ് പൊലീസിന് മുഖ്യമന്ത്രിയുടെ ഓഫീസ് കൈമാറിയത്. ദിലീപിന്റെ സഹായം പറ്റിയവര്‍ മടിച്ചു നില്‍ക്കാതെ അദ്ദേഹത്തിന് വേണ്ടി രംഗത്ത് വരണമെന്ന ഗണേശിന്റെ പ്രസ്താവനയ്‌ക്കെതിരെ പൊലീസ് കോടതിയെ സമീപിച്ചിട്ടുണ്ട്. ഇക്കാര്യത്തില്‍ വിശദമായ അന്വേഷണത്തിന് പൊലീസ് തീരുമാനിച്ചതും ഉന്നതതലത്തില്‍ നിന്ന് ലഭിച്ച സന്ദേശത്തിന് ശേഷമാണ്.