കരുനാഗപ്പള്ളി അമൃതാനന്ദമയീ മഠത്തിലെ ദുരുഹസംഭവ വികാസങ്ങളെ കുറിച്ച് സംസ്ഥാന ഇന്റലിജന്‍സ് അന്വേഷണം തുടങ്ങി. രാഷ്ട്രപതി ആശ്രമം സന്ദര്‍ശിച്ചതിന്റെ തലേന്ന് രാത്രി ആശ്രമത്തില്‍ നടന്ന ദുരുഹതകളാണ് ഇന്റലിജന്‍സ് അന്വേഷിക്കുന്നത്. ആശ്രമത്തില്‍ ഇത്തരം സംഭവങ്ങള്‍ സാധാരണമാണെന്നും എതിര്‍ശബ്ദം ഉയര്‍ന്നാല്‍ ജീവന് ഭീഷണിയുണ്ടെന്നും പോലീസിന് വിവരം ലഭിച്ചിട്ടുണ്ടെന്നാണ് സൂചന.

ആശ്രമത്തില്‍ ധാരാളം വിദേശികള്‍ താമസിക്കുന്നുണ്ട്. പലരെയും ദുരുഹ സാഹചര്യത്തില്‍ കാണാതായിട്ടുണ്ട്. ആശ്രമത്തിലെ പ്രധാന തസ്തികകളില്‍ പ്രവര്‍ത്തിക്കുന്നത് ഉയര്‍ന്ന വിദ്യാഭ്യസവും സംസ്‌കാരവുമുള്ള സ്വദേശികളും വിദേശികളുമായ യുവാക്കളാണ്. പലരും അമ്യതാനന്ദമയിയോടുള്ള ആരാധനയുടെ ഫലമായാണ് ആശ്രമത്തിലെത്തുന്നത്. ആശ്രമത്തിലെത്തിയാല്‍ സേവനമെന്ന പേരില്‍ ഇവരെ ഉപയോഗിക്കും. പിന്നീട് ഇവര്‍ ഇവിടെ പെട്ടു പോകാറാണ് പതിവ്. ആശ്രമത്തില്‍ തന്നെ വിവിധ തസ്തികകളില്‍ നിയമിക്കും. പ്രതിഫലം നല്‍കാറില്ല. ചോദിച്ചാല്‍ സേവനമാണെന്നു പറയും.

അടുത്തകാലത്ത് സ്വാമിമാരും അമ്മയുടെ ബന്ധുക്കളും രണ്ടു ഗ്രൂപ്പായി തിരിഞ്ഞു. ഇക്കാലമത്രയും സ്വാമിമാരുടെ കൈയിലായിരുന്നു ആശ്രമം. എന്നാല്‍ അവിടേക്ക് അമ്മയുടെ ബന്ധുക്കള്‍ കടന്നുവന്നു. ഇപ്പോള്‍ സ്വാമിമാര്‍ക്ക് ആശുപത്രിയുടെയും ചാനലിന്റെയും നടത്തില്‍ കാര്യമായ പങ്കൊന്നുമില്ല. ആശ്രമം സേവനത്തില്‍ നിന്നും ലാഭത്തിലേക്ക് നീങ്ങുകയാണ്.

സത്‌നാം സിംഗിന്റെ മരണം കൊലപാതകമാണെന്ന് അക്കാലത്ത് ആക്ഷേപങ്ങളുണ്ടായി. എന്നാല്‍ ആരും അത് അന്വേഷിക്കാന്‍ മിനക്കെട്ടില്ല. ആശ്രമത്തിലെ ചെയ്തികള്‍ ചോദ്യം ചെയ്തതിനാണ് സത്‌നാം സിംഗ് മര്‍ദ്ദനത്തിനിരയായത്. ഇടിച്ചു ചതച്ച് തിരുവനന്തപുരം മാനസികാരോഗ്യ കേന്ദ്രത്തിലെത്തിച്ച സിംഗിനെ കൊല്ലത്ത് നിന്നെത്തിയ പോലീസുകാര്‍ മാനസികാരോഗ്യ കേന്ദ്രത്തിലിട്ട് കൊന്നെന്നാണ് പറയപ്പെടുന്നത്. അന്വേഷണം ഒരിടത്തുമെത്തിയില്ല. സത്‌നംസിംഗിന് ഭ്രാന്താണെന്ന് അധികൃതര്‍ തന്നെ വരുത്തി തീര്‍ത്തു. അമേരിക്കന്‍ സ്വദേശിക്കും ഇതേ ഗതി വരുമായിരിക്കാം.

പിണറായി വിജയന്റെ സര്‍ക്കാര്‍ മതാചാര്യന്‍മാരുടെ കൈ മുത്താന്‍ പോകാറില്ല. അവരുടെ ആലിംഗനങ്ങള്‍ക്ക് വിധേയരാകാറുമില്ല. അതാണ് ഏക ആശ്വാസം. ഉത്തരേന്ത്യയിലെ ആശ്രമങ്ങളില്‍ ഇത്തരം സംഭവങ്ങള്‍ സര്‍വസാധാരണമാണ്. കേരളത്തിലും ഇതേ സംസ്‌കാരം വ്യാപിച്ചോ എന്ന് കണ്ടറിയാം.