കണ്ണൂര്‍ വീണ്ടും സംഘര്‍ഷത്തിലേക്ക് നീങ്ങുമെന്ന് ആശങ്ക. ബി.ജെ.പി ഓഫീസ് പരിസരത്തു നിന്ന് ബോംബുകളും ആയുധങ്ങളും പൊലീസ് പിടിച്ചെടുത്തത് സി.പി.എമ്മിന്റെ രാഷ്ട്രീയ പകപോക്കലാണെന്ന് നേതാക്കള്‍ ആരോപിക്കുന്നു. കത്തി, വാളുകള്‍, വടിവാള്‍, ബോംബ് നിര്‍മിക്കാനുപയോഗിക്കുന്ന പൈപ്പുകള്‍ എന്നിവ ലഭിച്ചെന്നാണ് പൊലീസ് പറയുന്നത്.

എന്നാല്‍ തിങ്കളാഴ്ച രാത്രി ആരോ ഓഫീസ് പരിസരത്ത് ഇവ മന:പൂര്‍വം ഉപേക്ഷിച്ചതാണെന്നും പൊലീസിനെ ഉപയോഗിച്ച് സി.പി.എം രാഷ്ട്രീയം കളിക്കുകയാണെന്നും ബി.ജെ.പി ആരോപിക്കുന്നു. പാര്‍ട്ടി സംസ്ഥാന അധ്യക്ഷന്‍ കുമ്മനം രാജശേഖരന്‍ നയിക്കുന്ന ജനരക്ഷാ മാര്‍ച്ചിന് കണ്ണൂര്‍ ജില്ലയില്‍ വലിയ വരവേല്‍പ്പാണ് ലഭിച്ചത്. ഇതില്‍ സി.പി.എം വിളറി പൂണ്ടിരിക്കുകയാണെന്നും നേതാക്കള്‍ ചൂണ്ടിക്കാട്ടി. ഓഫീസ് പരിസരത്ത് പൊലീസ് എത്തിയത് പ്രവര്‍ത്തകരെയും നേതാക്കളെയും ചൊടിപ്പിച്ചിട്ടുണ്ട്. അതിനാല്‍ സംഘര്‍ഷം ഉണ്ടാകാനുള്ള സാധ്യത കൂടുതലാണ്. 

കണ്ണൂരിലെ സമാധാനയോഗ തീരുമാനങ്ങളുടെ നഗ്നമായ ലംഘനമാണ് ജനരക്ഷായാത്രയ്ക്ക് ശേഷം അരങ്ങേറുന്നത്. യാത്ര കടന്നുപോയതിനുശേഷം തലശേരി, പാനൂര്‍ ഖേലകളിലാണ് രൂക്ഷമായ ആക്രമണങ്ങളും ബോംബേറും നടന്നത്. ഇങ്ങനെ ജനരക്ഷായാത്ര പരാജയപ്പെട്ടതിനെത്തുടര്‍ന്ന് ഇടയ്ക്കുവച്ച് ദേശീയ അധ്യക്ഷന്‍ അമിത് ഷാ പിണങ്ങിപ്പോയിരുന്നു. ഇതിനുപിന്നാലെയാണ് കണ്ണൂരില്‍ അക്രമങ്ങള്‍ പൊട്ടിപ്പുറപ്പെട്ടത്. രാജ്യവ്യാപകമായും സിപിഐഎം ഓഫീസുകള്‍ക്ക് നേരെ ആക്രമണമുണ്ടായി. ഇതോടനുബന്ധിച്ചാണ് കണ്ണൂരിലും തുടര്‍ച്ചയായ അക്രമങ്ങള്‍ റിപ്പോര്‍ട്ട് ചെയ്യപ്പെടുന്നത്. ജനരക്ഷായാത്രയില്‍ ജനപങ്കാളിത്തം കുറഞ്ഞതിന് പിന്നില്‍ കെഎസ്ഇബിയാണെന്ന് ആരോപിച്ച് കോഴിക്കോട്ട് ബിജെപി പ്രവര്‍ത്തകര്‍ കഴിഞ്ഞദിവസം പ്രതിഷേധം സംഘടിപ്പിച്ചിരുന്നു.

സിപിഐഎം ജില്ലാ സെക്രട്ടറി പി ജയരാജന്റെ കൈവെട്ടണമെന്നതടക്കമുള്ള പ്രകോപന മുദ്രാവാക്യങ്ങളുമായി ജനരക്ഷായാത്ര കണ്ണൂര്‍ ജില്ലയിലൂടെ കടന്നുപോയതിന് പിന്നാലെയായിരുന്നു ആക്രമണപരമ്പര. പാനൂരിനടുത്ത കൈവേലിക്കലില്‍ ഞായറാഴ്ചച വൈകിട്ട് പ്രതിഷേധപ്രകടനത്തിന് നേരെയുള്ള ബോംബേറാണ് ഏറ്റവും ക്രൂരമായ അക്രമണം. കുട്ടികളും വൃദ്ധരും സ്ത്രീകളുമുള്‍പ്പെടെ പങ്കെടുത്ത പ്രകടനത്തിന് നേരെയാണ് ബോംബേറുണ്ടായത്. പൊലീസ് വാഹനത്തിന് നേരെയും ബോംബേറുണ്ടായി. സംഭവത്തില്‍ 11 സിപിഐഎം പ്രവര്‍ത്തകര്‍ക്കും പാനൂര്‍ സി ഐ ഉള്‍പ്പെടെ അഞ്ചു പൊലീസുകാര്‍ക്കും പരുക്കേറ്റിരുന്നു.