നാളെ വേങ്ങര പോളിംഗ് ബൂത്തിലേക്ക് പോകുമ്പോള്‍ മലപ്പുറം ചുവക്കുമോ എന്നറിയാനുള്ള ആകാംക്ഷയിലാണ് മലയാളികള്‍. അങ്ങനെ സംഭവിച്ചാല്‍ അത്ഭുതപ്പെടേണ്ടതില്ലെന്നാണ് വേങ്ങരക്കാര്‍ പറയുന്നത്. കാരണം അഖില എന്ന ഹാദിയ തന്നെയാണ്.

ഹാദിയ വേങ്ങരയിലെ മുസ്ലീങ്ങളുടെ അഭിമാന പ്രശ്‌നമായി മാറിയിരിക്കുകയാണ്. മുസ്ലീം ലീഗ് ഒരു ഘട്ടത്തില്‍ ഹാദിയ വിഷയം ഏറ്റെടുക്കുകയും പിന്നീട് അതില്‍ നിന്നും പിന്‍മാറുകയും ചെയ്തു. കിട്ടാവുന്ന ഹിന്ദു വോട്ടുകള്‍ സമാഹരിക്കുകയായിരുന്നു ലക്ഷ്യം. എന്നാല്‍ അമിത് ഷാ കേരളത്തില്‍ നടത്തിയ പ്രചരണ പരിപാടികളിലൂടെ യു ഡി എഫിന്റെ പ്രതീക്ഷ മുഴുവന്‍ ചോര്‍ന്നു. യു ഡി എഫിന് പരമ്പരാഗതമായി ലഭിച്ചിരുന്ന വോട്ടുകള്‍ ബി ജെ പി കൊണ്ടു പോകുമെന്ന് ഉറപ്പായി.

തെരഞ്ഞടുപ്പിന് രണ്ടു ദിവസം ബാക്കിനില്‍ക്കെ സി പി എം സര്‍ക്കാര്‍ അടിച്ച ഒരു ഗോളാണ് വേങ്ങരയില്‍ തീരെ സാധ്യതയില്ലാതിരുന്ന സി പി എമ്മിന്റെ സാധ്യതകള്‍ വര്‍ധിപ്പിച്ചത്.

ഹാദിയയും ശഫിന്‍ ജഹാനും തമ്മിലുള്ള വിവാഹം റദ്ദാക്കിയ കേരള ഹൈക്കോടതിയുടെ വിധി നിയമ വിരുദ്ധമാണെന്നാണ് സംസ്ഥാന സര്‍ക്കാര്‍ സുപ്രീം കോടതിയെ അറിയിച്ചത്. മുന്‍ ഹൈക്കോടതി ജഡ്ജി കൂടിയായ മുതിര്‍ന്ന സുപ്രീം കോടതി അഭിഭാഷകന്‍ വി ഗിരിയെ ഇറക്കിയാണ് സംസ്ഥാന സര്‍ക്കാര്‍ സമസ്ത വിഭാഗം മുസ്ലീങ്ങളുടെ പ്രീതി നേടിയെടുത്തത്. ഇതിനെ തെരഞ്ഞടുപ്പിന്റെ അച്ചടക്കലംഘനമാണെന്ന് പറയാനും നിവൃത്തിയില്ല. കാരണം സുപ്രീം കോടതിയില്‍ സംസ്ഥാന സര്‍ക്കാരിന്റെ അഭിപ്രായം ഫയല്‍ ചെയുന്നതില്‍ എന്താണ് തെറ്റെന്ന് തിരികെ ചോദിക്കാം.

എന്നാല്‍ വേങ്ങര ഇലക്ഷന് മണിക്കൂറുകള്‍ മാത്രം ബാക്കി നില്‍ക്കെ എന്തിന് ഇപ്രകാരമൊരു ഹര്‍ജി ഫയല്‍ ചെയ്തു എന്ന ചോദ്യത്തിന് ഇതിനെയാണ് രാഷ്ട്രീയം എന്നു വിളിക്കുന്നത്.

മുഖ്യമന്ത്രി പിണറായി വിജയന്റെ നിര്‍ദ്ദേശാനുസരണമാണ് ഹാദിയക്ക് അനുകൂലമായ നിലപാട് സംസ്ഥാന സര്‍ക്കാര്‍ സ്വീകരിച്ചത്. ഹാദിയയുടെ പിതാവ് അശോകന്‍ സി പി എം പ്രവര്‍ത്തകനാണ്. എന്നിട്ടും ഹാദിയക്ക് അനുകൂലമായ നിലപാട് സ്വീകരിച്ചാല്‍ മതിയെന്ന് മുഖ്യമന്ത്രി നിര്‍ദ്ദേശിച്ചു. അത് വേങ്ങര മുന്നില്‍ കണ്ടിട്ട് തന്നെയാണ്. തങ്ങളുടെ സ്വന്തം പെണ്‍കുട്ടിക്ക് അനുകൂലമായി ഒരു സര്‍ക്കാര്‍ നിലപാട് എടുത്താല്‍ അവരെയല്ലാതെ മറ്റാരെയാണ് വോട്ടര്‍മാര്‍ പിന്തുണക്കുക?

ഹാദിയ വീട്ടില്‍ നിന്നും മോചിക്കപ്പെടുകയാണെങ്കില്‍ അതിന് കാരണം സംസ്ഥാന സര്‍ക്കാര്‍ മാത്രമായിരിക്കും.