വേങ്ങരയില്‍ ഇന്ന് നിശബ്ദ പ്രചരണം അവസാനിച്ചു, ഇനി വിധിയെഴുത്ത്. മുന്നണികള്‍ എല്ലാം തികഞ്ഞ ആത്മവിശ്വാസത്തിലാണ്.കഴിഞ്ഞ തവണത്തേക്കാള്‍ മികച്ച ഭൂരിപക്ഷം നേടാനാവും എന്ന വിശ്വസത്തിലാണ് യുഡിഎഫ് ക്യാമ്പ് എന്നാല്‍ സര്‍ക്കാരിന്റെ മികച്ച പ്രവര്‍ത്തനങ്ങളുടെ പ്രതിഫലനമാകും തെരഞ്ഞെടുപ്പ് ഫലമെന്ന് ഉറച്ചു വിശ്വസിക്കുകയാണ് എല്‍ഡിഎഫ്. നില മെച്ചപ്പെടുത്താന്‍ കഴിയും എന്ന വിശ്വാസത്തിലാണ് ബിജെപി. 

വേങ്ങരയില്‍ സ്ഥാനാര്‍ത്ഥികള്‍ ഇന്ന് നിശബ്ദമായപ്പോള്‍ ചൂടന്‍ ചര്‍ച്ചയായി മാറിയത് കള്ളപ്പണ വേട്ടയാണ്.വേങ്ങരയിലേക്ക് കൊണ്ടുവന്ന 79 ലക്ഷം രൂപയുടെ കള്ളപ്പണമാണ് പിടികൂടിയത്. ഇത് മണ്ഡലത്തില്‍ വലിയ തോതില്‍ ചര്‍ച്ചയായിട്ടുണ്ട്. വാഹന പരിശോധനയ്ക്കിടെ കുറ്റിപ്പുറത്ത് വച്ചാണ് പണം പിടിച്ചെടുത്തത്. സംഭവത്തില്‍ വേങ്ങര സ്വദേശികളായ അബ്ദുല്‍ റഹ്മാന്‍, സിദ്ദിഖ് എന്നിവരെ കസ്റ്റഡിയിലെടുത്തു. കള്ളപ്പണം ലീഗിന് വേണ്ടി കൊണ്ടുവന്നതാണെന്നു സിപിഎം ആരോപിച്ചു എന്നാല്‍ ലീഗ് ആരോപണം നിഷേധിച്ചിട്ടുണ്ട്.

ഉപതെരഞ്ഞെടുപ്പ് നടക്കുന്ന വേങ്ങര നിയമസഭാ മണ്ഡലത്തില്‍ നാളെ സര്‍ക്കാര്‍ ഓഫീസുകള്‍ക്കും വിദ്യാഭ്യാസ സ്ഥാപനങ്ങള്‍ക്കും പൊതു അവധി പ്രഖ്യാപിച്ചു. സര്‍ക്കാര്‍, അര്‍ദ്ധസര്‍ക്കാര്‍ സ്ഥാപനങ്ങള്‍ക്കും വാണിജ്യ സ്ഥാപനങ്ങള്‍ക്കും വേതനത്തോടുകൂടിയ അവധിയും ദൂരസ്ഥലത്ത് ജോലിചെയ്യുന്ന മണ്ഡലത്തിലെ വോട്ടര്‍മാര്‍ക്ക് അവധി നല്‍കണമെന്നും പ്രഖ്യാപിച്ചിട്ടുണ്ട്.