ശബരിമലയിലും അബ്രാഹ്മണശാന്തി നിയമനം സര്ക്കാര് പരിഗണനയില്
ശബരിമലയിലും അബ്രാഹ്മണ ശാന്തി നിയമനം സര്ക്കാര് പരിഗണിക്കുമെന്ന് ദേവസ്വം മന്ത്രി കടകംപള്ളി സുരേന്ദ്രന് പറഞ്ഞു. തിരുവിതാംകൂര് ദേവസ്വം ബോര്ഡിന്റെ ക്ഷേത്രങ്ങളുടെ ചരിത്രത്തില് ആദ്യമായി ആറ് ദളിതരടക്കം 36 അബ്രാഹ്മണ ശാന്തിമാരെ നിയമിച്ചത് ഒരു നിശബ്ദ വിപ്ലവമാണ്. ഇതിന് തുടര്ച്ചയുണ്ടാവും. ദേവസ്വം ബോര്ഡിന്റെ മൂവായിരം ഒഴിവുകളില് നിയമനത്തിനുള്ള നടപടികള് ദേവസ്വം റിക്രൂട്ട്മെന്റ് ബോര്ഡ് ആരംഭിച്ചു. മലബാര് ദേവസ്വം നിയമത്തില് വിപ്ലവകരമായ മാറ്റം വരുത്താനുള്ള നടപടി അടുത്ത നിയമസഭാ സമ്മേളനത്തിലുണ്ടാവുമെന്നും മന്ത്രി വ്യക്തമാക്കി.
പി. എസ്. സി മാതൃകയില് എഴുത്തുപരീക്ഷയും അഭിമുഖവും നടത്തിയാണ് പാര്ട്ട് ടൈം ശാന്തി നിയമന പട്ടിക ദേവസ്വം റിക്രൂട്ട്മെന്റ് ബോര്ഡ് തയ്യാറാക്കിയത്. അഴിമതിക്ക് അവസരം നല്കാതെ മെരിറ്റ് പട്ടികയും സംവരണ പട്ടികയും ഉള്പ്പെടുത്തി നിയമനം നടത്തണമെന്ന് ദേവസ്വം മന്ത്രിയെന്ന നിലയില് നിര്ദ്ദേശം നല്കിയിരുന്നു. പട്ടികജാതി പട്ടിക വര്ഗക്കാര് മലനട ദുര്യോധന ക്ഷേത്രം പോലുള്ള ചില ക്ഷേത്രങ്ങളില് മാത്രമേ പൂജ ചെയ്തിരുന്നുള്ളൂ.
ദേവസ്വം ബോര്ഡിന്റെ മാത്രമല്ല, ട്രസ്റ്റുകളുടെയും മറ്റും അധീനതയിലുള്ള പ്രധാന ക്ഷേത്രങ്ങളിലൊന്നും ദളിതരെ ശാന്തിയായി നിയമിക്കുമായിരുന്നില്ല. ചില സംഘടനകളുടെയും കുടുംബങ്ങളുടെയും ക്ഷേത്രങ്ങളില് പിന്നാക്ക സമുദായക്കാരെയോ ദളിതരെയോ കഴകം ഉള്പ്പെടെയുള്ള അകംജോലികളില് ഒന്നും തന്നെ നിയമിക്കാത്ത സാഹചര്യമാണ്. ഇപ്പോള് അവരെ നിയമിച്ചത് സംവരണത്തിന്റെ ബലത്തില് മാത്രമല്ല. താന്ത്രിക പരിശീലനം നേടിയ, ആചാരാനുഷ്ഠാനങ്ങള് അറിയാവുന്നവരെ തന്നെയാണ് നിയമിച്ചത്.
നേരത്തെ പൂജാദികര്മ്മങ്ങളില് പ്രാവീണ്യമില്ലാത്തവരെ മേല്സമുദായക്കാരെന്ന പരിഗണനയില് കൈക്കൂലി വാങ്ങി നിയമിക്കുന്ന പതിവുണ്ടായിരുന്നു. ആ അഴിമതിക്ക് കൂടിയാണ് സര്ക്കാര് തടയിട്ടിരിക്കുന്നത്. രാജ്യമാകെ ഈ നിശബ്ദവിപ്ലവം അറിയിച്ച എല്ലാ മാദ്ധ്യമങ്ങളോടും നന്ദിയുണ്ട്. ഈ തീരുമാനത്തിന് ആവേശപൂര്വ്വം പിന്തുണ അറിയിച്ച പ്രിയനടന് കമലഹാസന്, ഡി.എം.കെ നേതാവ് എം.കെ. സ്റ്റാലിന് തുടങ്ങിയവരോടും കേരള സമൂഹത്തോടും നന്ദിയുണ്ടെന്നും മന്ത്രി പറഞ്ഞു.
https://www.facebook.com/Malayalivartha
