തിരുവനന്തപുരം: വേങ്ങരയില്‍ ഉപതെരഞ്ഞെടുപ്പ് തുടങ്ങി ഏതാനും മണിക്കൂറുകള്‍ക്കുള്ളില്‍ സോളാര്‍ അന്വേഷണ കമ്മീഷന്‍ റിപ്പോര്‍ട്ട് പുറത്ത് വിട്ട് മുഖ്യമന്ത്രി പിണറായി വിജയന്‍ യു.ഡി.എഫ് തേത്വത്തെയും മുന്നണിയിലെ രണ്ടാമത്തെ പ്രധാനകക്ഷിയായ മുസ്ലിംലീഗിനെയും മുള്‍മുനയിലാക്കി. ഇന്ന് റിപ്പോര്‍ട്ട് പുറത്ത് വിടുമെന്ന് ആരും പ്രതീക്ഷിച്ചിരുന്നില്ല. എന്നാല്‍ പതിവില്‍ നിന്ന് വ്യത്യസ്തമായി മന്ത്രിസഭാ യോഗത്തിന് ശേഷം രാവിലെ മുഖ്യമന്ത്രിയുടെ വാര്‍ത്താസമ്മേളനം ഉണ്ടെന്ന സന്ദേശം മാധ്യമപ്രവര്‍ത്തകര്‍ക്ക് ലഭിച്ചപ്പോഴും സോളാര്‍ റിപ്പോര്‍ട്ടിലെ വിവരങ്ങള്‍ അദ്ദേഹം പറയുമെന്ന് കരുതിയിരുന്നില്ല. എന്നാല്‍ ഉമ്മന്‍ചാണ്ടി അടക്കമുള്ള നേതാക്കള്‍ക്ക് നേരത്തെ സൂചന ലഭിച്ചതായി അറിയുന്നു. എന്നാല്‍ എങ്ങനെ പ്രതിരോധിക്കണമെന്ന് ആശയക്കുഴപ്പമുണ്ടായിരുന്നു. 

വേങ്ങര മണ്ഡലത്തില്‍ നല്ലൊരു ശതമാനം സ്ത്രീ വോട്ടര്‍മാരുണ്ട്. ഇതാണ് ലീഗിനെ വെട്ടിലാക്കിയിരിക്കുന്നത്. അതേസമയം യു.ഡി.എഫ് നേതാക്കള്‍ പരസ്പ്പര വിരുദ്ധമായി പ്രതികരിക്കരുതെന്ന് കര്‍ശന നിര്‍ദ്ദേശം നല്‍കിയിട്ടുണ്ട്. വോട്ടര്‍മാര്‍ പോളിംഗ് ബൂത്തുകളില്‍ നില്‍ക്കേ, രാഷ്ട്രീയ പ്രേരിതമായാണ് റിപ്പോര്‍ട്ട് പുറത്ത് വിട്ടതെന്നും കേസിനെ നിയമപരമായും രാഷ്ട്രീയമായും നേരിടുമെന്ന് കെ.പി.സി.സി ജനറല്‍ സെക്രട്ടറി തമ്പാനൂര്‍ രവി പറഞ്ഞു. സോളാര്‍ കേസ് അട്ടിമറിക്കാന്‍ ശ്രമിച്ചതിനും ഉമ്മന്‍ചാണ്ടിയെ കേസില്‍ നിന്ന് രക്ഷിക്കാന്‍ സഹായിച്ചതിനും തമ്പാനൂര്‍ രവിക്കെതിരെ ക്രിമിനല്‍ കേസ് എടുക്കണമെന്ന് കമ്മീഷന്‍ റിപ്പോര്‍ട്ടില്‍ ശുപാര്‍ശയുണ്ട്. 

വോട്ടിംഗ് പുരോഗമിക്കുന്നതിനിടെ ബൂത്തിലെത്തുന്ന വോട്ടര്‍മാരോട് എങ്ങനെ വോട്ട് അഭ്യര്‍ത്ഥിക്കണമെന്നും അവരുടെ പ്രതികരണം എങ്ങനെയായിരിക്കും എന്ന ആശങ്ക ലീഗ് പ്രവര്‍ത്തകര്‍ക്കും നേതാക്കള്‍ക്കുമുണ്ട്. മണ്ഡലത്തിലെ പല കേന്ദ്രങ്ങളിലായി യോഗം ചേര്‍ന്ന്, വികാരപ്രകടനങ്ങള്‍ നടത്താതെ തെരഞ്ഞെടുപ്പ് പ്രവര്‍ത്തനങ്ങളില്‍ മാത്രം ശ്രദ്ധകേന്ദ്രീകരിക്കാന്‍ നിര്‍ദ്ദേശം നല്‍കി. യാതൊരുവിധത്തിനുള്ള സംഘര്‍ഷങ്ങളും ഉണ്ടാകരുതെന്നും പ്രവര്‍ത്തകര്‍ക്ക് കര്‍ശന നിര്‍ദ്ദേശം നല്‍കിയിട്ടുണ്ട്.