ഒടുവില്‍ ഹൈക്കോടതി അഭിഭാഷകനായ ഉദയഭാനുവിനെ രാജീവ് വധക്കേസില്‍ ഏഴാം പ്രതിയാക്കാന്‍ പോലീസ് നിര്‍ബന്ധിതമായത് മുഖ്യമന്ത്രിയുടെ ഇടപെടലിനെ തുടര്‍ന്ന് . ഉദയഭാനുവുമായി പ്രതി ജോണിക്ക് ബന്ധമില്ലെന്ന് വരുത്തി തീര്‍ക്കാന്‍ പോലീസ് ശ്രമിച്ചിരുന്നു. ഇതിന് സി പി എം പിന്തുണയുമുണ്ടായിരുന്നു.

എന്നാല്‍ തൃശൂര്‍ എസ്.പി. യതീഷ് ചന്ദ്ര സത്യം പുറത്തുവരണം എന്ന പിടിവാശിയിലായിരുന്നു. യതീഷ് ചന്ദ്ര നേരിട്ടാണ് ഉദയഭാനുവിനെ ചോദ്യം ചെയ്തത്.

ഭൂമിയിടപാടു കേസില്‍ കൊല്ലപ്പെട്ട രാജീവിനെ കൊന്ന മുഖ്യപ്രതി ജോണി പിടിയിലായെങ്കിലും കൊലപാതകത്തിന്റെ സൂത്രധാരകനെന്ന് സംശയിക്കുന്ന ഉദയഭാനുവിന്റെ പേര് പ്രതി പറയുന്നില്ലെന്നായിരുന്നു പോലീസിന്റെ കണ്ടെത്തല്‍. ജോണി അന്വേഷണവുമായി സഹകരിക്കുന്നില്ലെന്ന് പറയാനും പോലീസ് മറന്നില്ല. ഇതിനിടെ ഉദയഭാനുവിന്റെ പേര് കേസില്‍ വലിച്ചിഴക്കരുതെന്ന് ഹൈക്കോടതിയും ആവശ്യപ്പെട്ടു. കേസിലെ പ്രതിയും അഭിഭാഷകനും തമ്മില്‍ സംസാരിച്ചാല്‍ എങ്ങനെ കേസില്‍ പ്രതിയാകും എന്നാണ് ഹൈക്കോടതി ചോദിച്ചത്. ചില സി പി എം ഉന്നതരുടെ നിര്‍ദ്ദേശാനുസരണമാണ് ഉദയഭാനു ഹൈക്കോടതിയെ സമീപിച്ചത്.

കോയമ്പത്തൂര്‍ വിമാനത്താവളം വഴി രാജ്യം വിടാന്‍ ഒരുങ്ങുന്നതിനിടയിലാണ് അതിസമര്‍ത്ഥമായി പോലീസ് ജോണിയെ കുരുക്കിയത്. ഏതാനും നിമിഷങ്ങള്‍ വൈകിയിരുന്നെങ്കില്‍ ജോണി രാജ്യം വിട്ടേനെ. എന്തിനും പോന്ന കേരള പോലീസ് ജോണിയെ സമര്‍ത്ഥമായി വലയില്‍ വീഴ്ത്തുകയായിരുന്നു.

ജോണിയെ പിടികൂടുമ്പോള്‍ തന്നെ ഉയഭാനുവിനെ രക്ഷിക്കാന്‍ ശ്രമങ്ങള്‍ തുടങ്ങിയിരുന്നുവെന്നാണ് വിവരം. പല പ്രമുഖ സി പി എം നേതാക്കളുടെയും കേസുകള്‍ സൗജന്യമായി നടത്തുന്നത് ഉദയ ഭാനുവാണ്. പല പോലീസ് ഓഫീസര്‍മാരുടെയും മാധ്യമ പ്രവര്‍ത്തകരുടെയും കേസുകള്‍ നടത്തുന്നത് ഉദയഭാനുവാണ്. അവരെല്ലാം വക്കീലിനു വേണ്ടി സജീവമായി രംഗത്തുണ്ടായിരുന്നു. ജോണിയുമായി ഉദയഭാനുവിന് ഒരു ബന്ധവുമില്ലെന്ന് എല്ലാവര്‍ക്കും വരുത്തി തീര്‍ക്കണമായിരുന്നു.

കേസില്‍ നിന്നും ഊരാന്‍ ഉദയഭാനു എന്തിനും തയ്യാറായിരുന്നു. അതിനദ്ദേഹം എത്ര കോടി വേണമെങ്കിലും ഇറക്കാനും തയ്യാറായിരുന്നു. നഷ്ടപ്പെട്ടാല്‍ എല്ലാം പോകുമെന്ന് ഉദയഭാനുവിനറിയാം. ഇക്കാലമത്രയും അദ്ദേഹം നിര്‍മ്മിച്ചെടുത്ത സാമ്രാജ്യം അത്ര വലുതാണ്. സംസ്ഥാനത്തിന് അകത്തും പുറത്തും വ്യാപിച്ച് കിടക്കുന്ന സാമ്രാജ്യങ്ങള്‍ നിലനിര്‍ത്തണം.

ഉന്നത പോലീസുദ്യോഗസ്ഥര്‍ തന്നെയാണ് ഉദയഭാനുവിനു വേണ്ടി രംഗത്തുണ്ടായിരുന്നത്. ഭരണപ്രതിപക്ഷ രംഗത്തെ പല പ്രമുഖരും ഇതിനായി രംഗത്തുണ്ടായിരുന്നു. ഉന്നതരായ ഒരഭിഭാഷകനെ അവഹേളിക്കാന്‍ പാടില്ലെന്ന് വാദിക്കുന്നവരായിരുന്നു പോലീസില്‍ ഏറെയും. ഊഹാപോഹങ്ങളുടെ പേരില്‍ ആരെയും അവഹേളിക്കരുതെന്നാണ് പോലീസിന്റെ പക്ഷം. ഇതിനെ യതീഷ് ചന്ദ്ര തകര്‍ത്തു.

പിണറായി വിജയന്റെ ഇമേജ് ബില്‍ഡിംഗിന്റെ ഭാഗമാണ് ഉദയഭാനുവിന്റെ പ്രതിചേര്‍ക്കല്‍. സോളാറും സരിതയും ദിലീപും സമ്മാനിച്ച ഖ്യാതി നിലനിര്‍ത്തണമെന്നു മാത്രമാണ് പിണറായിക്കുള്ളത്.