ഹര്‍ത്താല്‍ നിയന്ത്രണത്തിനെതിരെ രണ്ട് വര്‍ഷം മുമ്പ് ഉറഞ്ഞുതുള്ളിയ പ്രതിപക്ഷനേതാവ് രമേശ് ചെന്നിത്തലയെ സോഷ്യല്‍ മീഡിയയില്‍ ട്രോളുന്നു. പ്രത്യേകിച്ചും സി.പി.എം അണികളുടെ ഫെയിസ്ബുക്ക് പോസ്റ്റുകളില്‍. ആഭ്യന്തരമന്ത്രിയായിരിക്കെയാണ് ഹര്‍ത്താല്‍ നിയന്ത്രണബില്‍ കൊണ്ടുവരാന്‍ രമേശ് ചെന്നിത്തല ഉദ്ദേശിച്ചത്. ഇതിനേക്ക് ജനാഭിപ്രായമറിയാന്‍ താല്‍പര്യമുണ്ടെന്ന് ഔദ്യോഗിക ഫെയിസ്ബുക്ക് പോസ്റ്റിലൂടെ ആവശ്യപ്പെടുകയും ചെയ്തു. ഹര്‍ത്താല്‍ ജനജീവിതത്തെ ദു;സഹമാക്കുന്നു, വ്യാവസായികളും മറ്റ് നിക്ഷേപകരും കേരളത്തോട് മുഖംതിരിച്ച് നില്‍ക്കുകയാണ്, ടൂറിസം മേഖലയ്ക്കും ഹര്‍ത്താല്‍ തിരിച്ചടിയാണ്, ഹര്‍ത്താല്‍ കാരണം ഒരു ദിവസം കോടിക്കണക്കിന് രൂപയുടെ നഷ്ടമാണ് സംഭവിക്കുന്നത് ഇക്കാര്യങ്ങള്‍ ചൂണ്ടിക്കാട്ടിയാണ് അന്ന് ആഭ്യന്തരമന്ത്രിയായിരുന്ന ഇന്നത്തെ പ്രതിപക്ഷനേതാവ് ഹര്‍ത്താലിനെതിര രംഗത്തെത്തിയത്. 

കെ.പി.സി.സി പ്രസിഡന്റായിരുന്ന എം.എം ഹസന്‍ ഉള്‍പ്പെടെയുള്ള നിരവധിപേര്‍ ചെന്നിത്തലയെ പിന്തുണിച്ച് രംഗത്തെത്തിയിരുന്നു. എന്നാല്‍ ആ ഹസന്‍ രമേശിനേക്കാള്‍ മുന്നേ ഹര്‍ത്താല്‍ പ്രഖ്യാപിച്ച് ജനങ്ങളെ വെട്ടിലാക്കി. അതിന് പിന്നാലെയാണ് പ്രതിപക്ഷനേതാവായ ചെന്നിത്തല ഹര്‍ത്താല്‍ പ്രഖ്യാപനവുമായി എത്തിയത്. ഇന്ഢനവില, വിലക്കയറ്റം എന്നിവയായിരുന്നു വിഷയം. പഴയപ്രസ്താവന ചൂണ്ടിക്കാട്ടിയപ്പോള്‍ ജനജീവിതം ദുരിതമായതിനാല്‍ നിവൃത്തിയില്ലാതെയാണ് ഹര്‍ത്താല്‍ പ്രഖ്യാപിച്ചതെന്ന് പറഞ്ഞു. ആദ്യം ഈമാസം 12നായിരുന്നു ഹര്‍ത്താല്‍ പ്രഖ്യാപിച്ചത്. പക്ഷെ, അണ്ടര്‍ ലോകകപ്പ് ഫുഡ്‌ബോള്‍ പ്രേമികള്‍ എതിര്‍പ്പുമായി രംഗത്തെത്തിയതോടെ 13ലേക്ക് മാറ്റി. വേങ്ങരെ ഉപതെരഞ്ഞെടുപ്പ് നടക്കുന്നതിനാല്‍ അതുംമാറ്റി 16ലേക്ക് ആക്കുകയായിരുന്നു. അങ്ങനെ ആകെ മൊത്തെ കണ്‍ഫ്യൂഷനിലാണ് ഹര്‍ത്താല്‍ പ്രഖ്യാപിച്ചത്. 

ഹര്‍ത്താല്‍ ഞങ്ങളുടേതായാല്‍ അത്യാവശ്യവും, ജനക്ഷേമത്തിനും എന്നും മറ്റുള്ളവരുടേതായാല്‍ ജനദ്രോഹവും എന്ന പ്രതികരണങ്ങള്‍ തനി ആഭാസമാണെന്നാണ് ചെന്നിത്തലയ്‌ക്കെതിരെ സോഷ്യല്‍മീഡിയയില്‍ ഉയരുന്ന പ്രധാനവിമര്‍ശനം. അക്രമവും സംഘര്‍ഷവുമില്ലാതെ സമാധാനപരമായിരിക്കും ഹര്‍ത്താലെന്ന് കഴിഞ്ഞ ദിവസം ചെന്നിത്തല ആവര്‍ത്തിച്ച് വ്യക്തമാക്കി. അത് വിശ്വസിച്ച് പാവം ജനം രാവിലെ നിരത്തിലിറങ്ങി, പലരും കടകമ്പോളങ്ങള്‍ തുറന്നു, ബസുകള്‍ റോഡിലിറങ്ങി. ഇതോടെ സര്‍ക്കാര്‍ ഹര്‍ത്താല്‍ പൊളിക്കാന്‍ നടത്തുന്ന നീക്കമാണെന്ന് ആരോപിച്ച് യൂത്ത്‌കോണ്‍ഗ്രസുകാരുടെ നേതൃത്വത്തില്‍ വാഹനങ്ങള്‍ തടയാനും അക്രമങ്ങള്‍ നടത്താനും തുടങ്ങി. പൊതുജനം പരസ്യമായി ഹര്‍ത്താലിനെതിരെ രംഗത്തെത്തി. ഇതോടെ പ്രതിപക്ഷനേതാവ് വാര്‍ത്താസമ്മേളനം നടത്തി. ഹര്‍ത്താലിനിടെ പ്രകോപനം സൃഷ്ടിക്കാന്‍ മുഖ്യമന്ത്രിയും സര്‍ക്കാരും ശ്രമിച്ചു. ചില മാധ്യമങ്ങളും അതിന് കൂട്ടുനിന്നെന്നും ആക്ഷേപിച്ചു. പക്ഷെ, ഇതുകൊണ്ടൊന്നും ജനങ്ങളുടെ എതിര്‍പ്പില്‍ നിന്ന് രക്ഷപെടാനാവില്ല.