ശബരിമല ദര്‍ശനത്തിനായി മുഖ്യമന്ത്രി ഇന്ന് വൈകീട്ടോടെ പമ്പയിലെത്തി. പിണറായിയുടെ ആദ്യ ശബരിമല സന്ദര്‍ശനം ആണ് ഇത്. ശക്തമായ മഴയാണ് ശബരിമലയില്‍. നാളെ തുലാം ഒന്നിന് നട തുറക്കുന്നതിനാല്‍ ഭക്തരും സന്നിധാനത്തേക്ക് പ്രവഹിക്കുന്നുണ്ട്. മഴ വകവയ്ക്കാതെ കാല്‍നടയായി തന്നെ മല ചവിട്ടാന്‍ മുഖ്യമന്ത്രി തീരുമാനിക്കുകയായിരുന്നു. പമ്പയില്‍ പൊന്നാട അണിയിച്ചാണ് മലകയറുന്നതിന് എത്തിയ മുഖ്യമന്ത്രിയെ ദേവസ്വം അധികൃതര്‍ സ്വീകരിച്ചത്. ദേവസ്വം മന്ത്രി കടകംപള്ളിയും ഉദ്യോഗസ്ഥരുടെ സംഘവും കൂടെയുണ്ട്. കനത്ത സുരക്ഷയിലാണ് മുഖ്യമന്ത്രിയുടെ മലകയറ്റം.

ശബരിമലയിലെ സ്ഥിതി വിലയിരുത്തുന്നതിനും മണ്ഡലകാല ഒരുക്കങ്ങള്‍ അവലോകനം ചെയ്യുന്നതിനുമായി മല ചവിട്ടി മുഖ്യമന്ത്രി പിണറായി സന്നിധാനത്തേക്ക് എത്തിയത്. നാലുകിലോമീറ്ററോളം വരുന്ന കാനനപാതയിലൂടെ നടന്നാണ് മുഖ്യമന്ത്രി സന്നിധാനത്തെത്തിയത്.

ഇന്ന് രാത്രി സന്നിധാനത്ത് ക്യാമ്പ് ചെയ്യുന്ന മുഖ്യമന്ത്രി നാളെ രാവിലെ സംസ്ഥാന വിനോദ സഞ്ചാര വകുപ്പ് നിര്‍മ്മിക്കുന്ന പുണ്യദര്‍ശനം കോംപ്ലക്‌സിന്റെ ശിലാ സ്ഥാപനം നിര്‍വഹിക്കും. തുടര്‍ന്ന് ശബരിമല വികസന പദ്ധതികളും അദ്ദേഹം അവലോകനം ചെയ്യും.

കഴിഞ്ഞ മണ്ഡലകാല ഒരുക്കങ്ങളുടെ ഭാഗമായി അദ്ദേഹം പമ്പയിലെത്തി ദേവസ്വം ബോര്‍ഡ് അധികൃതരുമായി ചര്‍ച്ച നടത്തിയിരുന്നുവെങ്കിലും സന്നിധാനത്തേക്കു പോയിരുന്നില്ല. 4.99 കോടി രൂപ ചെലവിലാണു വിനോദസഞ്ചാര വകുപ്പ് ഇവിടെ കെട്ടിടം നിര്‍മ്മിക്കുന്നത്. 24 മുറികള്‍ ഉള്‍പ്പെടെയുള്ള സൗകര്യങ്ങള്‍ അടങ്ങുന്നതാണു പദ്ധതി. അവലോകനത്തിന് ശേഷം വൈകീട്ട് മൂന്നുമണിയോടെ മുഖ്യമന്ത്രി പിണറായി മലയിറങ്ങി പമ്പയിലെത്തും. മുഖ്യമന്ത്രിയുടെ സന്ദര്‍ശനം പ്രമാണിച്ച് അതീവ സുരക്ഷയാണ് പമ്പയിലും സന്നിധാനത്തും ഒരുക്കിയിട്ടുള്ളത്.