വടക്കന്‍ ടെക്‌സസിലെ റിച്ചര്‍ഡ്‌സണില്‍ കാണാതായ മലയാളി ദമ്പതികളുടെ വളര്‍ത്തുപുത്രി മൂന്നുവയസ്സുകാരി ഷെറിന്‍ മാത്യൂസിന്റെ തിരോധാനത്തിലെ ദുരൂഹത തുടരുന്നു. പാലു കുടിക്കാത്തതിനു ശിക്ഷയായി പുലര്‍ച്ചെ മൂന്നിനു കുഞ്ഞിനെ പുറത്തിറക്കി നിര്‍ത്തിയെന്നും 15 മിനിറ്റ് കഴിഞ്ഞു നോക്കുമ്പോള്‍ കാണാനില്ലെന്നുമാണു വളര്‍ത്തച്ഛന്‍ വെസ്‌ലി മാത്യൂസിന്റെ മൊഴി. ഈ മൊഴി ആരും വിശ്വസിച്ചിട്ടില്ല. എന്നാല്‍ കാണാതായി ഇത്രയും ദിവസമായിട്ടും ഒരു തുമ്പും കിട്ടാത്തത് അന്വേഷണത്തെ തളര്‍ത്തിയിട്ടുണ്ട്.

കുട്ടിയെ അപകടകരമായ നിലയില്‍ ഉപേക്ഷിച്ചതിന്റെ പേരില്‍ വളര്‍ത്തച്ഛന്‍ വെസ്‌ലി മാത്യൂസിനെ അറസ്റ്റ് ചെയ്തു ജാമ്യത്തില്‍ വിട്ടിരുന്നു. വെസ്‌ലി കുറ്റക്കാരനാണെന്നോ അല്ലെന്നോ പൊലീസ് സ്ഥിരീകരിച്ചിട്ടില്ല. അതേസമയം ഭാര്യ സിനി മാത്യൂസ് നിരപരാധിയാണെന്നാണു പൊലീസ് നിഗമനം. കുട്ടിയെ പുറത്തേക്കു കൊണ്ടുപോകുന്ന സമയത്ത് സിനി ഉറക്കത്തിലായിരുന്നു. അഞ്ചുമണിക്കൂര്‍ മകളെ തിരഞ്ഞതിനാലാണു പൊലീസിനെ അറിയിക്കാന്‍ വൈകിയതെന്നും കുഞ്ഞിനെ നിര്‍ത്തിയ സ്ഥലത്തു കുറുക്കന്മാര്‍ ഇടയ്ക്കു വന്നുപോകാറുള്ളതാണെന്നും വെസ്‌ലി പറഞ്ഞിട്ടുണ്ട്. മൂന്ന് വയസ്സുള്ള ഷെറിന്‍ മാത്യൂസ് കാണാതായിട്ട് പത്ത് ദിവസത്തിനു ശേഷവും പല ചോദ്യങ്ങള്‍ക്കും ഉത്തരം ലഭിച്ചിട്ടില്ല.

ഷെറിനെ കാണാതായ ദിവസം പുലര്‍ച്ചെ ആരോ വീട്ടില്‍നിന്നു വാഹനത്തില്‍ പുറത്തു പോയിട്ടുണ്ടെന്ന നിര്‍ണായക വിവരത്തിനു പിന്നാലെയാണു പൊലീസ് എന്നാണു പ്രാദേശിക വാര്‍ത്താ ചാനലുകള്‍ പറയുന്നത്. ഇരുണ്ട ചുവപ്പു നിറത്തിലുള്ള വാഹനം ആരാണ് ഓടിച്ചിരുന്നതെന്നു കണ്ടെത്തിയിട്ടില്ല. പരിസരങ്ങളിലെയും റോഡുകളിലെയും നിരീക്ഷണ ക്യാമറകള്‍ പരിശോധിച്ചുവരികയാണ്. ഈ അന്വേഷണമാകും നിര്‍ണായകം. മെറൂണ്‍ നിറത്തിലുള്ള ഈ എസ് യു വി വാഹനത്തെക്കുറിച്ചു സമീപവാസികള്‍ക്കു എന്തെങ്കിലും വിവരം ഉണ്ടോ എന്ന് പൊലീസ് ആരാഞ്ഞു. ശിക്ഷിച്ചു പുറത്തു നിര്‍ത്തിയ കുഞ്ഞിനെ പുലര്‍ച്ചെ 4 നും 5 നും ഇടയില്‍ കാണാതായെന്നാണ് വളര്‍ത്തച്ഛന്‍ വെസ്ലി മാത്യൂസ് പൊലീസിനെ അറിയിച്ചത്. ഈ സമയത്താണ് എസ് യു വി അപ്രത്യക്ഷമായത്.

അതേസമയം ഷെറിന്റെ രക്ഷിതാക്കള്‍ പൊലീസുമായി സഹകരിക്കുന്നില്ലെന്ന പരാതി പൊലീസ് ആവര്‍ത്തിച്ചു.
ഷെറിന്‍ മാത്യൂസ് എന്ന മൂന്നു വയസുകാരിക്കു വേണ്ടി പ്രാര്‍ത്ഥിക്കുന്നതിനിടയിലും സ്വന്തം മകനെക്കുറിച്ചുള്ള ആശങ്കയിലാണ് എറണാകുളം െവെറ്റില എല്‍.എം. പൈലി റോഡില്‍ നടുവിലേഴത്ത് മാത്യു. ഷെറിന്റെ വളര്‍ത്തച്ഛനാണ് മാത്യുവിന്റെ മകന്‍ വെസ്ലി. കാണാതായതെന്നു മകന്‍ പറഞ്ഞതുതന്നെയാണു സത്യമെന്നു വിശ്വസിക്കാനാണ് അദ്ദേഹത്തിന്റെ ശ്രമം. പൊലീസ് കസ്റ്റഡിയിലെടുത്ത ശേഷം വെസ്ലിയെ ജാമ്യത്തില്‍ വിട്ടയച്ചിരുന്നു. വെസ്ലി പറഞ്ഞതു പൂര്‍ണമായും വിശ്വസിക്കാന്‍ പൊലീസ് തയാറായിട്ടില്ല.