സോളാര് കമീഷന് റിപ്പോര്ട്ട് പുറത്തുവിടാന് സര്ക്കാറിന് മേല് സമ്മര്ദ്ദം മുറുകുന്നു
സോളാര് കമീഷന് റിപ്പോര്ട്ട് പുറത്തുവിടാന് സര്ക്കാറിന് മേല് സമ്മര്ദ്ദം മുറുകുന്നു. വേങ്ങര ഉപതെരഞ്ഞെടുപ്പ് ദിനത്തില് സോളാര് കമീഷന് റിപ്പോര്ട്ടിലെ പ്രധാന നിഗമനങ്ങള് പുറത്തുവിട്ട സര്ക്കാര് പക്ഷേ, ഇപ്പോള് 'പുലിവാല്' പിടിച്ചിരിക്കുകയാണ്. കമീഷന് റിപ്പോര്ട്ടിലെ നിഗമനങ്ങളുടെയും നിയമോപദേശത്തിന്റെയും അടിസ്ഥാനത്തില് മുന് മുഖ്യമന്ത്രി ഉമ്മന് ചാണ്ടി ഉള്പ്പെടെ നേതാക്കള്ക്കെതിരെയും കേസന്വേഷിച്ച മുന് പ്രത്യേകസംഘത്തിനെതിരെയും
മുഖ്യമന്ത്രി പിണറായി വിജയന് അന്വേഷണം പ്രഖ്യാപിച്ചിരുന്നു.
എന്നാല്, പ്രഖ്യാപനം നടത്തി ആഴ്ച ഒന്നുകഴിഞ്ഞിട്ടും ഇതുസംബന്ധിച്ച സര്ക്കാര് ഉത്തരവ് പുറത്തിറക്കാനായില്ലെന്നത് സര്ക്കാറിന് തിരിച്ചടിയാണ്. കമീഷന് നടപടികളെ പരസ്യമായി വിമര്ശിച്ച് മുന് അന്വേഷണ സംഘാംഗങ്ങള്തന്നെ രംഗത്തെത്തിയതും സര്ക്കാറിനെ വെട്ടിലാക്കി.
അന്വേഷണ കമീഷന് റിപ്പോര്ട്ടിന്റെ പകര്പ്പ് ലഭ്യമാക്കണമെന്ന ആവശ്യത്തില് മുന് മുഖ്യമന്ത്രി ഉറച്ചുനില്ക്കുകയാണ്. റിപ്പോര്ട്ട് നല്കില്ലെന്ന് സര്ക്കാര് വ്യക്തമാക്കുമ്പോഴും അതിനു കാരണം വ്യക്തമാക്കുന്നുമില്ല. കമീഷനെ നിയോഗിച്ചതിലെ ചട്ടവും നിയമവും ചൂണ്ടിക്കാട്ടിയാണ് റിപ്പോര്ട്ട് നല്കാനാകില്ലെന്ന് സര്ക്കാര് പറയുന്നത്. എന്നാല്, എങ്ങനെ മുഖ്യമന്ത്രി അതിലെ വിശദാംശങ്ങള് വെളിപ്പെടുത്തിയെന്ന മറുചോദ്യമാണ് പ്രതിപക്ഷത്തിന്േറത്.
കമീഷന് റിപ്പോര്ട്ട് കൈമാറണമെന്ന ആവശ്യം പ്രതിപക്ഷനേതാവ് രമേശ് ചെന്നിത്തലയും ഉന്നയിച്ചിട്ടുണ്ട്. അതിനായി പ്രത്യേക നിയമസഭ സമ്മേളനം വിളിക്കണമെന്ന ആവശ്യവും അദ്ദേഹം ഉന്നയിച്ചിട്ടുണ്ട്.
റിപ്പോര്ട്ടില് സര്ക്കാറിന് താല്പര്യമുള്ള കാര്യങ്ങള് മാത്രം പുറത്തുവിടുകയാണുണ്ടായതെന്ന ആരോപണവും ശക്തമാണ്. കമീഷനും സര്ക്കാര് നടപടികള്ക്കുമെതിരെ കേസന്വേഷിച്ച പൊലീസ് സംഘാംഗങ്ങള്തന്നെ രംഗത്തെത്തിയതും അതിനെ ചൊല്ലി പൊലീസ് സേനയിലുണ്ടായ അതൃപ്തിയും സര്ക്കാറിന് തലവേദനയായിട്ടുണ്ട്.
തങ്ങള്ക്കെതിരെ നടപടി കൈക്കൊണ്ടതില് അന്വേഷണ സംഘത്തലവനായിരുന്ന ഡി.ജി.പി എ. ഹേമചന്ദ്രന് ഉള്പ്പെടെ അസംതൃപ്തരാണ്. സംഘത്തിലുണ്ടായിരുന്ന മൂന്ന് ഡിവൈ.എസ്.പിമാര് ഇപ്പോള് എസ്.പിമാരാണ്. സ്ഥലംമാറ്റിയതോടെ ഇവര് അന്വേഷിച്ചുവന്ന പല കേസുകളും വഴിയിലായെന്നും ചൂണ്ടിക്കാട്ടുന്നു. അതൃപ്തി സര്ക്കാറിനോടല്ല കമീഷനോടാണെന്ന് വിശദീകരിക്കുമ്പോഴും ഹേമചന്ദ്രന്റെ ഉള്പ്പെടെ നിലപാട് സര്ക്കാറിനെതന്നെയാണ് സമ്മര്ദത്തിലാക്കുന്നത്. തങ്ങള്ക്കെതിരെ സര്ക്കാര് സ്വീകരിച്ച നടപടിയെ ചോദ്യം ചെയ്യുന്ന ഈ ഉന്നത പൊലീസ് ഉദ്യോഗസ്ഥര് സോളാര് കമീഷന് റിപ്പോര്ട്ട് ലഭിക്കാനും സോളാര് കമീഷന് നടപടികള്ക്കെതിരെയും നിയമനടപടിക്കും ഒരുങ്ങുന്നത് സര്ക്കാറിന് സമ്മര്ദമാകും.
https://www.facebook.com/Malayalivartha
