സോളാര്‍ കേസില്‍ അന്വേഷണ കമ്മിഷന്‍ പരിഗണനാ വിഷയങ്ങള്‍ മാറ്റിയിട്ടില്ലെന്ന് സര്‍ക്കാര്‍ തിങ്കളാഴ്ച ഹൈക്കോടതിയെ അറിയിക്കും. സത്യവാങ്മൂലത്തിലൂടെയാണ് അറിയിക്കുന്നത്. ഇത് സംബന്ധിച്ച് ഉമ്മന്‍ചാണ്ടി നല്‍കിയ ഹര്‍ജിയില്‍ കോടതി സര്‍ക്കാരിന് നോട്ടീസ് അയച്ചിരുന്നു. അതിന് മറുപടിയായാണ് ഇക്കാര്യം വ്യക്തമാക്കുന്നത്. സരിതയുടെ കത്തിന്റെ അടിസ്ഥാനത്തില്‍ മാത്രമല്ല ജുഡീഷ്യല്‍ കമ്മിഷന്‍ അന്വേഷണം നടത്തിയത്. അന്വേഷണത്തിന്റെ ഭാഗമായി സരിതയുടെ കത്തടക്കം നിരവധി രേഖകള്‍ പരിശോധിച്ചു. ഉമ്മന്‍ചാണ്ടി സ്വാഭാവിക നീതി നിഷേധിച്ചിട്ടില്ല. ആരോപണങ്ങള്‍ സംബന്ധിച്ച് ഉമ്മന്‍ചാണ്ടിക്ക് നോട്ടീസ് നല്‍കിയതിന്റെ രേഖകള്‍ കമ്മിഷന്റെ പക്കലുണ്ട്. ഓരോ ആക്ഷേപത്തിനും പ്രത്യേകം നോട്ടീസ് നല്‍കേണ്ട കാര്യമില്ലെന്നും സര്‍ക്കാര്‍ അറിയിക്കും. വിചാരണ വേളയില്‍ ഉന്നയിക്കാത്ത കാര്യങ്ങളാണ് ഇപ്പോള്‍ ഉന്നയിക്കുന്നതെന്നും സരിതയുടെ കത്തിന്റെ പൂര്‍ണരൂപം ഉമ്മന്‍ചാണ്ടിക്ക് നല്‍കിയിട്ടുണ്ടെന്നുമാണ് സര്‍ക്കാര്‍ നിലപാട്. 

നിയമസഭയ്ക്ക് അകത്തും പുറത്തുമുള്ള ആക്ഷേപങ്ങള്‍ കമ്മീന്‍ പരിശോധിച്ചു. അന്വേഷണം തുടങ്ങിക്കഴിഞ്ഞ് ബി.ജെ.പി നേതാവ് കെ. സുരേന്ദ്രനെയും അഭിഭാഷക സംഘടനയായ ഇന്ത്യന്‍ ലോയേഴ്‌സ് യൂണിയനെയും കക്ഷിചേര്‍ത്തതില്‍ നിയമവിരുദ്ധമായി ഒന്നുമില്ല. ഇത് നിയമവിരുദ്ധമാണെന്നാണ് ഉമ്മന്‍ചാണ്ടിയുടെ ആക്ഷേപം. കമ്മിഷന്‍ റിപ്പോര്‍ട്ട് നിയമസഭയില്‍ വയ്ക്കും മുമ്പ് പ്രധാനഭാഗങ്ങള്‍ മുഖ്യമന്ത്രി വാര്‍ത്താസമ്മേളനത്തിലൂടെ പുറത്ത് വിട്ടത് സ്വാഭാവിക നീതി നിഷേധിക്കലാണെന്ന് ഹൈക്കോടതി നിരീക്ഷിച്ചിരുന്നു. പൗരന്റെ വ്യക്തിസ്വാതന്ത്ര്യം സംരക്ഷിക്കേണ്ടത് സര്‍ക്കാരിന്റെ കടമയാണെന്നും കോടതി പറഞ്ഞിരുന്നു. വിചാരണ വേളയില്‍ പരിഗണിക്കേണ്ട വിഷയങ്ങളാണ് മുഖ്യമന്ത്രി മാധ്യമങ്ങളിലൂടെ അറിയിച്ചതെന്നും കോടതി കുറ്റപ്പെടുത്തിയിരുന്നു.

ഉമ്മന്‍ചാണ്ടിയുടെ ഹര്‍ജിയുടെ അടിസ്ഥാനത്തില്‍ സരിതയുടെ കത്ത് പൊതുസമൂഹം ചര്‍ച്ച ചെയ്യരുതെന്ന് ഹൈക്കോടതി ഉത്തരവിട്ടിരുന്നു. കമ്മിഷന്‍ റിപ്പോര്‍ട്ട് നിയമസഭയില്‍ വയ്ക്കുന്നതിന് മുമ്പ് മാധ്യമങ്ങളിലൂടെ ചില ഭാഗങ്ങള്‍ പ്രചരിപ്പിച്ചത് നിയമലംഘനമാണെന്നും ഉമ്മന്‍ചാണ്ടി നല്‍കിയ ഹര്‍ജിയില്‍ ആരോപിച്ചിരുന്നു. റിപ്പോര്‍ട്ടില്‍ സര്‍ക്കാര്‍ തിടുക്കപ്പെട്ട് നടപടി സ്വീകരിക്കുകയായിരുന്നെന്ന് ഹൈക്കോടതിയും നിരീക്ഷിച്ചിരുന്നു. റിപ്പോര്‍ട്ടിലെ കാര്യങ്ങള്‍ അന്വേഷിക്കാന്‍ സര്‍്ക്കാര്‍ പ്രത്യേക അന്വേഷണ സംഘത്തെ രൂപീകരിച്ചെങ്കിലും ഇതുവരെ അവര്‍ കേസെടുത്തിട്ടില്ല. മതിയായ തെളിവുകളുടെ അഭാവമാണിതിന് കാരണമെന്ന് അറിയുന്നു.