റേഷന്‍ മുന്‍ഗണനപ്പട്ടികയില്‍ തെറ്റായ വിവരങ്ങള്‍ നല്‍കി കടന്നുകൂടിയ 10 ലക്ഷത്തോളം പേരെ സംസ്ഥാന സര്‍ക്കാര്‍ പുറത്താക്കുന്നു. മോട്ടോര്‍ വാഹനവകുപ്പും തദ്ദേശസ്വയംഭരണ സ്ഥാപനങ്ങളും നല്‍കിയ റിപ്പോര്‍ട്ടിന്റെ അടിസ്ഥാനത്തിലാണ് നടപടി. രണ്ടു മാസത്തിനിടെ നടത്തിയ പരിശോധനയില്‍ മുന്‍ഗണനപ്പട്ടികയില്‍ ഉള്‍പ്പെട്ട 2,51,476 റേഷന്‍കാര്‍ഡുകളാണ് അനര്‍ഹമെന്ന് കണ്ടെത്തിയത്.

മോട്ടോര്‍ വാഹനവകുപ്പിന്റെ സഹായത്തോടെ ഭക്ഷ്യവകുപ്പ് നടത്തിയ പരിശോധനയില്‍ മുന്‍ഗണനപ്പട്ടികയില്‍പെട്ട 41,312 റേഷന്‍കാര്‍ഡുടമകള്‍ സ്വന്തമായി നാലുചക്രവാഹനമുള്ളവരാണെന്നും അതിനാല്‍ അനര്‍ഹരാണെന്നും കണ്ടെത്തി.

ഉപജീവനത്തിനായി ഓട്ടോ, ടാക്‌സി ഉപയോഗിക്കുന്നവരെ ഒഴിവാക്കിക്കൊണ്ടുള്ള കണക്കാണിത്. സ്വന്തമായി നാലുചക്ര വാഹനമുണ്ടെന്ന വിവരം മറച്ചുവെച്ച് സൗജന്യ റേഷന്‍ വാങ്ങുന്നവരില്‍ മലപ്പുറം ജില്ലക്കാരാണ് ഒന്നാം സ്ഥാനത്ത്. ഇത്തരം 5700 കാര്‍ഡുടമകള്‍ ജില്ലയിലുണ്ട്. ഇവരില്‍ 5149 കാര്‍ഡുകാര്‍ (നീല കാര്‍ഡ് )ആളൊന്നിന് നാലുകിലോ അരിയും ഒരു കിലോ ഗോതമ്പും സൗജന്യമായി കൈപ്പറ്റുന്നവരാണ്. പരമദരിദ്രര്‍ ഉള്‍പ്പെടുന്ന അന്ത്യോദയ അന്നയോജന (എ.എ.വൈ) വിഭാഗത്തില്‍ (മഞ്ഞ കാര്‍ഡ് ) 551 അനര്‍ഹര്‍ 32 കിലോ ഭക്ഷ്യധാന്യം സൗജന്യമായി വാങ്ങുന്നു.

നാലുചക്ര വാഹനമുണ്ടെന്ന വിവരം മറച്ചുവെച്ച് സൗജന്യ റേഷന്‍ വാങ്ങുന്നവരില്‍ തൃശൂരാണ് രണ്ടാം സ്ഥാനത്ത ്5501 കാര്‍ഡ്. ഏറ്റവും കുറവ് വയനാട് 907. മുന്‍ഗണനപ്പട്ടികയില്‍ 1000 ചതുരശ്ര അടിയില്‍ കൂടുതല്‍ വിസ്തീര്‍ണമുള്ള വീടുള്ളവരെ കണ്ടെത്താനുള്ള തദ്ദേശ സ്വയംഭരണ വകുപ്പിന്റെ നടപടികളും അന്തിമഘട്ടത്തിലാണ്. ഇതിനോടകം 10 ജില്ലകളുടെ കണക്കുകള്‍ സര്‍ക്കാറിന് ലഭിച്ചു. 

ശമ്പളം ലഭിക്കണമെങ്കില്‍ റേഷന്‍കാര്‍ഡ് ഹാജരാക്കണമെന്ന സര്‍ക്കാര്‍ ഉത്തരവിനെ തുടര്‍ന്ന് 91,169 സര്‍ക്കാര്‍ ഉദ്യോഗസ്ഥര്‍ തങ്ങളുടെ കാര്‍ഡ് മുന്‍ഗണനപ്പട്ടികയില്‍നിന്ന് ഇതിനോടകം മാറ്റിയിട്ടുണ്ട്. ഇതുംകൂടി പരിഗണിക്കുമ്പോള്‍ കാര്‍ഡ് ഒന്നില്‍ നാലുപേരെന്ന കണക്കില്‍ 10 ലക്ഷത്തോളം പേര്‍ മുന്‍ഗണനപ്പട്ടികയില്‍നിന്ന് പുറത്തുപോകുമെന്ന് ഭക്ഷ്യമന്ത്രി പറഞ്ഞു. അനര്‍ഹരെന്ന് കണ്ടെത്തിയവരുടെ വീടുകളില്‍ ഭക്ഷ്യവകുപ്പ് ഉദ്യോഗസ്ഥര്‍ നേരിട്ട് പരിശോധന നടത്തും. അതിനുശേഷമാകും പുറത്താക്കല്‍ നടപടി.

സംസ്ഥാനത്ത് കേന്ദ്ര ഭക്ഷ്യഭദ്രതാ നിയമപ്രകാരം സൗജന്യറേഷന് അര്‍ഹതയുള്ളവര്‍ 1,54,80,042 പേരാണ്. സൗജന്യ റേഷന് അര്‍ഹരായ അഞ്ചരലക്ഷത്തോളം പേര്‍ ഇപ്പോഴും പട്ടികക്ക് പുറത്താണ്. അനര്‍ഹര്‍ പുറത്തുപോകുന്ന മുറക്ക് ഇവരെ ഉള്‍പ്പെടുത്താനാണ് സര്‍ക്കാറിന്റെ തീരുമാനമെന്നും മന്ത്രി പറഞ്ഞു.