കണ്ണൂരില്‍ യൂത്ത് കോണ്‍ഗ്രസ് നേതാവ് ഷുഹൈബിനെ വധിച്ച കേസില്‍ ഒരാള്‍ കൂടി അറസ്റ്റില്‍. സി.പി.എം പ്രവര്‍ത്തകനും പാലയോട് സ്വദേശിയുമായ സഞ്ജയ് ആണ് പിടിയിലായത്. കൊലപാതകത്തിന് ശേഷം ആയുധങ്ങള്‍ ഒളിപ്പിച്ചത് സഞ്ജയ് ആണെന്ന് പൊലീസ് പറയുന്നു. ഇതോടെ കേസില്‍ ഏഴ് പേര്‍ അറസ്റ്റിലായി. സി.പി.എമ്മിന്റെ സജീവ പ്രവര്‍ത്തകനായ ആകാശ് തില്ലങ്കേരി ഉള്‍പ്പെടെ റിമാന്‍ഡിലാണ്.
ആക്രമണ സമയത്ത് ബോംബെറിഞ്ഞ ജിതിനെ മുഴക്കുന്ന് ക്ഷേത്രപരിസരത്ത് നിന്ന് കഴിഞ്ഞയാഴ്ച പിടികൂടിയിരുന്നു. കുറ്റകൃത്യത്തില്‍ നേരിട്ടു പങ്കെടുത്തതായി ചോദ്യം ചെയ്യലില്‍ സമ്മതിച്ചു. സ്‌ഫോടനത്തില്‍ ജിതിന്റെ മുഖത്തു പരുക്കേറ്റിട്ടുണ്ട്.

മുഴക്കുന്നിലെ ജിതിന്‍ (23), തില്ലങ്കേരി ആലയാട്ടെ പുതിയ പുരയില്‍ അന്‍വര്‍ സാദത്ത് (24), മീത്തലെ പാലയോട്ടെ മൂട്ടില്‍ വീട്ടില്‍ കെ.അഖില്‍ (24), തെരൂര്‍ പാലയോട്ടെ തയ്യുള്ള പുതിയ പുരയില്‍ ടി.കെ.അസ്‌കര്‍(25), തില്ലങ്കേരിയിലെ എം.വി.ആകാശ് (24), രജിന്‍രാജ്(23) എന്നിവരാണ് കേസിലെ മറ്റ് പ്രതികള്‍. ഇവര്‍ റിമാന്‍ഡിലാണ്.

പ്രതികള്‍ കൃത്യംനിര്‍വഹിക്കാന്‍ ഉപയോഗിച്ച ആയുധങ്ങള്‍ കഴിഞ്ഞ ദിവസം കണ്ടെത്തിയിരുന്നു. ചോര പുരണ്ട നിലയിലുള്ള മൂന്നു വാളുകള്‍ കാട് വെട്ടിത്തെളിക്കാന്‍ പോയവരാണ് കണ്ടത്. ഷുഹൈബിനെ വെട്ടി വീഴ്ത്തിയ എടയന്നൂര്‍ തെരൂരില്‍ നിന്ന് ഒന്നര കിലോമീറ്റര്‍ അകലെയുള്ള വെള്ളപ്പറമ്പിലെ കശുമാവിന്‍തോട്ടത്തില്‍ ഉപേക്ഷിച്ച നിലയിലായിരുന്നു വാളുകള്‍. ശാസ്ത്രീയ പരിശോധനയ്ക്ക് ആയുധങ്ങള്‍ വിധേയമാക്കി. പരിശോധനാ ഫലം വന്ന ശേഷമേ ഇവ കൊലപാതകത്തിന് ഉപയോഗിച്ചതാണോ എന്ന് വ്യക്തമാകൂ എന്ന്്് ജില്ലാ പൊലീസ് മേധാവി ജി.ശിവവിക്രം പ്രതികരിച്ചു. 71 സെന്റീമീറ്റര്‍ നീളമുള്ള വാളുകള്‍ അടുത്തിടെ നിര്‍മിച്ചതാണെന്ന് ഒറ്റനോട്ടത്തില്‍ വ്യക്തമാകുമെന്നും അദ്ദേഹം പറഞ്ഞു.

കസ്റ്റഡിയിലെടുത്ത രണ്ടാമത്തെ കാര്‍ ഫൊറന്‍സിക് വിഭാഗം പരിശോധിച്ചിരുന്നു. ഫെബ്രുവരി 15നു വെള്ളപ്പറമ്പിലെ ചെങ്കല്‍ക്വാറിക്കു സമീപത്തെ കുറ്റിക്കാട്ടില്‍ നിന്ന് ഒരു വാള്‍ പൊലീസ് കണ്ടെത്തിയിരുന്നു. 12നു രാവിലെ, അക്രമിസംഘത്തിന്റെ കയ്യില്‍ നിന്നു നഷ്ടപ്പെട്ടതാണ് ഈ വാളെന്ന് പൊലീസ് പറഞ്ഞിരുന്നു. അന്നേദിവസം അര്‍ധരാത്രിയോടെയാണു ഷുഹൈബ് കൊല്ലപ്പെടുന്നത്. ഷുഹൈബ് വധത്തില്‍ ആയുധങ്ങള്‍ കണ്ടെത്താത്തതിനെതിരെ കഴിഞ്ഞ ദിവസം കോടതി പൊലീസിനെതിരെ രൂക്ഷവിമര്‍ശനം നടത്തിയിരുന്നു.