രണ്ട് ദിവസങ്ങള്‍ക്ക് മുന്‍പാണ് വിശ്വ ഹിന്ദു പരിഷത്ത് നേതാവ് സാധ്വി ബാലിക സരസ്വതി വിവാദം പ്രസ്താവന നടത്തിയത്. പശുവിനെ കൊല്ലുന്നവര്‍ക്ക് ഇന്ത്യയില്‍ താമസിക്കാന്‍ അവകാശമില്ലെന്നും കേരളത്തില്‍ പശുവിനെ കൊല്ലുന്നവരേയും വെട്ടാന്‍ തയ്യാറാവണമെന്നും സാധ്വി പറഞ്ഞിരുന്നു. സ്വാധിയുടെ ഈ പ്രസ്താവന ഏറെ വിവാദം സൃഷ്ടിച്ചിരിക്കുകയാണ്. സ്വാധിയെ പോലെയുള്ളവര്‍ ഈ കേരളത്തെ വര്‍ഗീയ കേരളമാക്കി മാറ്റുമോ എന്നാണ് സോഷ്യല്‍ മീഡിയയിലൂടെ പലരും ചോദിക്കുന്നത്. 

ബീഫ് കഴിക്കുന്നതില്‍ എന്താണ് തെറ്റ്, ഇത്തരം വര്‍ഗീയ പ്രസംഗം കൊണ്ട് ഇന്ത്യയെ മാറ്റാനാകില്ലെന്ന് ഫെയ്‌സ്ബുക്കിലൂടെ ചിലര്‍ വിമര്‍ശിക്കുന്നത്.എന്നാല്‍ സ്വാധിയുടെ ഫെയ്‌സ് ബുക്ക് പേജില്‍ ഇന്നലെ മലയാളികള്‍ ബീഫ് കൊണ്ട് പൊങ്കാല തന്നെയിട്ടു.ബീഫ് വിഭവങ്ങളുടെ നീണ്ടനിര വെളിപ്പെടുത്തിയും പാകം ചെയ്യേണ്ട രീതിയും സൂചിപ്പിച്ചാണ് മലയാളികള്‍ പ്രതിഷേധ പൊങ്കാല തീര്‍ത്തിരിക്കുന്നത്. ബിജെപി നേതാക്കളായ കെ. സുരേന്ദ്രനും, എം. ടി രമേഷും ബീഫ് കഴിക്കുന്നതിന്റെ ചിത്രവും സാധ്വിയുടെ പേജില്‍ പോസ്റ്റിയിട്ടുണ്ട്.

'ഇന്ത്യയില്‍ താമസിക്കണമെങ്കില്‍ ഭാരത് മാതാ കി ജയ് എന്ന് പറയണം. അയോദ്ധ്യയില്‍ എന്നല്ല ഇന്ത്യയില്‍ ഒരിടത്തും ബാബറിന്റെ പേരില്‍ പള്ളി നിര്‍മ്മിക്കാന്‍ അനുവദിക്കില്ല...' എന്നും സാധ്വി പറഞ്ഞിരുന്നു.കലാപത്തിന് ആഹ്വാനം നടത്തുന്ന രീതിയില്‍ പ്രസംഗം നടത്തിയ വിഎച്ച്പി നേതാവ് സാധ്വി ബാലിക സരസ്വതിക്കെതിരെ ജാമ്യമില്ലാ വകുപ്പ് ചുമത്തി കേസെടുത്തു. ബദിയടുക്കയില്‍ ഹിന്ദു സമാജോത്സവത്തില്‍ സംസാരിക്കവെയാണ് സാധ്വി ഇത്തരത്തില്‍ പരാമര്‍ശം നടത്തിയത്.

മതവികാരം വൃണപ്പെടുത്തുന്ന തരത്തിലുള്ള പ്രഖ്യാപനം നടത്തി, ബോധപൂര്‍വ്വം കലാപത്തിന് ആഹ്വാനം ചെയ്തു തുടങ്ങിയ വകുപ്പുകള്‍ ചുമത്തിയാണ് സാധ്വി സരസ്വതിക്കെതിരെ ബദിയടുക്ക പൊലീസ് കേസെടുത്തിരിക്കുന്നത്.കേരളത്തില്‍ ഗോമാംസം ഭക്ഷിക്കുന്നവരെ ആക്രമിക്കണമെന്നും അവര്‍ ഇന്ത്യയില്‍ ജീവിക്കാന്‍ അര്‍ഹതയില്ലാവരാണെന്നും, ഹിന്ദു പെണ്‍കുട്ടികളെ ലൗ ജിഹാദിനിരയാക്കാനെത്തുന്നവരെ വാളുപയോഗിച്ച് നേരിടണമെന്നുമായിരുന്നു ഹിന്ദു സമാജോത്സവത്തില്‍ സംസാരിക്കവെ സാധ്വി ബാലിക സരസ്വതി പറഞ്ഞത്.