മന്ത്രിമാരെ പിടിക്കാന് മുഖ്യമന്ത്രി; വിമാനത്തില് കറങ്ങണ്ട സോദരാ!
മന്ത്രിമാരെ ക്ലിപ്പിടാന് മുഖ്യമന്ത്രി തീരുമാനിച്ചു. മന്ത്രിമാര് വിമാനങ്ങളില് യാത്ര ചെയ്യുന്നത് പരമാവധി നിയന്ത്രിക്കണമെന്നതാണ് പ്രധാന നിര്ദ്ദേശം . സ്വകാര്യചടങ്ങുകള്ക്കു പോകുന്ന മന്ത്രിമാര് പോലീസും ഔദ്യോഗിക വാഹനങ്ങളും ഒഴിവാക്കണമെന്നും മുഖ്യമന്ത്രി നിര്ദ്ദേശം നല്കിയിട്ടുണ്ട്. മന്ത്രിമാര് കഴിയുന്നതും തീവണ്ടിയില് യാത്ര ചെയ്യണമെന്നും മുഖ്യമന്ത്രി നല്കിയ നിര്ദ്ദേശത്തില് പെടുന്നു.
സെക്രട്ടറിയേറ്റില് മന്ത്രിമാരുടെ പേഴ്സണല് സ്റ്റാഫിന്റെ ചായകുടി നിയന്ത്രിക്കാനും നിര്ദ്ദേശമുണ്ട്. പേഴ്സണല് സ്റ്റാഫ് അംഗങ്ങള് സ്വകാര്യാവശ്യങ്ങള്ക്കായി ഫോണ് ഉപയോഗിക്കരുത്. ഓരോ മന്ത്രിമാരും അവരുടെ ഓഫീസുകളിലെ വൈദ്യുതിയും വെള്ളവും നിയന്ത്രിക്കണം. ഓഫീസ് സമയം കഴിഞ്ഞാല് ആരും ഓഫീസിലിരിക്കേണ്ടതില്ലെന്നാണ് സര്ക്കാര് നല്കിയിരിക്കുന്ന നിര്ദ്ദേശം. ഓഫീസ് സമയം കഴിഞ്ഞും സേവനം വേണ്ടെന്നാണ് സര്ക്കാര് നിലപാട്.
വൈദ്യുതി പാഴാക്കുന്ന സ്ഥാപനങ്ങള്ക്കെതിരെ കര്ശനമായ നടപടി സ്വീകരിക്കാനും മുഖ്യമന്ത്രി നിര്ദ്ദേശിച്ചിട്ടുണ്ട്. സെക്രട്ടേറിയറ്റിലെ മന്ത്രിമാരുടെ ഓഫീസുകളിലാണ് വൈദ്യുതി ഏറെയും പാഴാക്കുന്നത്. മന്ത്രിമാരുടെ പേഴ്സണല് സ്റ്റാഫിന്റെ അധികാരദുര്വിനിയോഗവും ധൂര്ത്തും കര്ശനമായി നിയന്ത്രിക്കണമെന്നും മുഖ്യമന്ത്രി നിര്ദ്ദേശം നല്കിയിട്ടുണ്ട്. ജനങ്ങള്ക്കുമേല് അധിക നികുതി അടിച്ചേല്പ്പിച്ച ശേഷം ഔദ്യോഗിക വണ്ടിയില് നിന്നും പുറത്തിറങ്ങാതെ നടക്കുന്ന പേഴ്സണല് സ്റ്റാഫുമാരെ കാണുമ്പോള് ജനം ഇളകുമെന്നും മുഖ്യമന്ത്രിയുടെ നിര്ദ്ദേശത്തില് പറയുന്നു.
ശമ്പളത്തിനു മാത്രം പണം അനുവദിച്ചാല് മതിയെന്നാണ് സര്ക്കാര് , ട്രഷറികള്ക്ക് നല്കിയിരിക്കുന്ന നിര്ദ്ദേശം. അതായത് യാത്രാബത്ത പോലുള്ള അധിക ചിലവുകള്ക്ക് പണം അനുവദിക്കുകയില്ല. മന്ത്രിമാരുടെ പേഴ്സണല് സ്റ്റാഫ് ലക്ഷങ്ങളാണ് യാത്രാബത്ത ഇനത്തില് സമ്പാദിക്കുന്നത്. പലരും തിരുവനന്തപുരം വിട്ട് പോകാറുപോലുമില്ല. എന്നിട്ടും യാത്രാബത്ത വാങ്ങുന്നു. ഇതൊന്നും നിയന്ത്രിക്കാനുള്ള യാതൊരു സംവിധാനവും സര്ക്കാരിനില്ല. പേഴ്സണല് സ്റ്റാഫുമാര് പലപ്പോഴും മന്ത്രിമാരെക്കാള് കൂടുതല് ചിലവ് നടത്തുന്നവരാണ്.
മന്ത്രിമാരുടെ സ്റ്റാഫിന്റെ ഔദ്യോഗിക വാഹനങ്ങളിലെ യാത്രകള്ക്കും താഴുവീഴുമെന്നാണ് സൂചന. മന്ത്രിമാരുടെ ഓഫീസുകളില് അനുവദിച്ചിരിക്കുന്ന കാറുകളുടെ എണ്ണം പരിശോധിക്കാന് സര്ക്കാര് നിര്ദ്ദേശം നല്കിയിട്ടുണ്ട്. യഥാര്ത്ഥത്തില് മന്ത്രിമാരുടെ ഓഫീസുകളില് പ്രൈവറ്റ് സെക്രട്ടറിക്ക് മാത്രമാണ് ഔദ്യോഗിക വാഹനം ഉപയോഗിക്കാന് അര്ഹതയുള്ളത്. എന്നാല് തസ്തിക ഭേദമന്യേ മന്ത്രിമാരുടെ ജീവനക്കാരെല്ലാം കാറുകളിലാണ് സഞ്ചരിക്കുന്നത്. വീട്ടിലെ ആവശ്യങ്ങള്ക്കു വരെ ഔദ്യോഗിക കാര് ഉപയോഗിക്കുന്ന ഉദ്യോഗസ്ഥര് നിരവധിയുണ്ട്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
