വരുന്ന വെള്ളിയാഴ്ച അടുത്ത കൗൺസിൽ യോ​ഗം ചേരാൻ തീരുമാനിച്ചിരിക്കുകയാണ് തിരുവനന്തപുരം കോർപ്പറേഷൻ. ഈ യോ​ഗം ബിജെപിയേയും ​കാപ്പാ കേസിൽ ജയിലിൽ കഴിയുന്ന വാഴോട്ടുകോണം കൗൺസിലർ സു​ഗതനും ഏറെ നിർണായകമാണ്. ഇത്തവണ സു​ഗതൻ കൗൺസിൽ യോ​ഗത്തിൽ പങ്കെടുത്തിട്ടില്ല എങ്കിൽ അയോ​ഗ്യനാക്കപ്പെടും.. കാപ്പാ കേസ് പ്രതിയായത് കൊണ്ട് തിരുവനന്തപുരത്ത് കാലുകുത്താൻ സു​ഗതനെ കൊണ്ട് സാധിക്കില്ല എന്നതാണ് അവസ്ഥ.

നിലവിൽ കാപ്പാ കേസിൽപെട്ട് ജയിലിൽ കഴിയുന്ന വാഴോട്ടുകോണം കൗൺസിലർ ആർ. സുഗതൻ അയോഗ്യനാക്കപ്പെടുന്നത് ഒഴിവാക്കാൻ ബിജെപി അടിയന്തര നിയമനടപടികൾ സ്വീകരിച്ചു എന്ന വിവരങ്ങൾ വരുന്നുണ്ട്. അഭിഭാഷകർ മുഖേന മേയർക്ക് സുഗതന്റെ അവധി അപേക്ഷ സമർപ്പിച്ചിട്ടുണ്ട്. ഈ അപേക്ഷ കൗൺസിൽ യോഗത്തിൽ മേയർ അംഗീകാരത്തിനായി അവതരിപ്പിക്കേണ്ടതുണ്ട്.

കഴിഞ്ഞ രണ്ട് കൗൺസിൽ യോഗങ്ങളിലും സുഗതൻ പങ്കെടുത്തിരുന്നില്ല. കോർപ്പറേഷൻ ചട്ടപ്രകാരം തുടർച്ചയായി മൂന്ന് കൗൺസിൽ യോഗങ്ങളിൽ പങ്കെടുത്തില്ലെങ്കിൽ കൗൺസിലർക്ക് അംഗത്വം നഷ്ടപ്പെടുകയും അയോഗ്യനാക്കപ്പെടുകയും ചെയ്യും. ഇത് മറികടക്കാനാണ് അവധി അപേക്ഷ നൽകിയിരിക്കുന്നത്.

അതേസമയം, ഈ യോഗത്തിലും പങ്കെടുത്തില്ലെങ്കിൽ അയോഗ്യനാക്കാൻ കോർപ്പറേഷൻ സെക്രട്ടറിക്ക് കത്ത് നൽകാനൊരുങ്ങുകയാണ് പ്രതിപക്ഷം. ജൂൺ 29-നായിരുന്നു ഇതിനു മുൻപ് കൗൺസിൽ യോഗം ചേർന്നത്.